21.01.2023
德國足球丙組聯賽 第 19 週
SV Elversberg - FC Ingolstadt
Waldstadion an der Kaiserlinde
賽果： 4:3 (3:1)
入場人數： 4434 （約 70 名作客球迷）
門票：10€ （企位）
更多相片

過左兩個月，我地終於返到黎主場出戰首循環最後一場賽事，對手係剛由乙組降班落黎既 Ingolstadt。

天氣預報一早就預計今個週末會落大雪，星期五晚係法蘭克福附近的確落左一陣大雪，無諗過既係莎蘭落得仲勁，降雪量應該有法蘭克福既一倍！ 星期六我地早啲起身出發預多少少時間，落完雪啲交通情況通常都好混亂。 另外就係要睇下咁樣落雪法仲開唔開到波…

一起身就到 SVE 係網上面叫人黎幫手剷雪，落左一晚大雪之後成個球場都積左好厚雪，即使球場係星期二已經開定草皮暖氣都唔夠。 有部份職員今朝四點就已經係球場幫手，最後搞唔掂就唯有吹雞！ 最後有超過五十人一早就自備定架餐去幫手剷雪，有人仲帶埋剷雪機去幫手。莎蘭有愛～～ 大家努力左三個鐘之後，球證睇完場宣布球賽可以如期進行。 就連班作客球迷都好感激去左幫手既球迷，等佢地唔洗一早出發坐左幾個鐘車黎到先要回頭。

當我地去到球場時，見到塊綠色既草皮同樣同好開心同感恩～ 個場乾淨到連橙波都唔洗用。 只係場邊廣告板後面同看台底下堆滿左好多雪，啲小朋友係底下玩雪玩得好開心。

雖然我地岩岩輸完波，但仍然氣勢如虹。係 C1 看台仍然有好多後生仔走到龍門後面企埋一齊唱歌打氣，而家係連啲生面口既人都會大部份跟住時間一齊唱歌！！！對面作客看台企左大約七十人左右，比預期中少，但我地估好多都諗住場波會延期所以廢事出發。 當球場靜落黎時間唔中都會聽到對面既打氣聲，但我地呢面都不停唱歌所以都唔會聽得好清楚。

一開波對面就已經勁主動咁搶擊，好在我地仲捱得住。 去到 17 分鐘全靠對方個 17 號唔知做乜唔追波，Feil 係個波底線出界前傳中比神射手 Schnellbacher 射入第一球。 幾分鐘後，來自不萊梅（+小腳國）既高佬 Woltemade 搏到十二碼，比我地既防中 Jacobsen 操刀射入，拉開成二比零。 入波後，佢兩個走到去看台前，戴起由球迷組織推出既冷帽，配上剷雪既動作黎多謝球迷～ 太可愛啦！！

過多幾分鐘， Jacobsen 唔知點樣去到底線超窄角度入波，好癲，八分鐘內我地射入左三球波！！？ 但係無諗過對方竟然一球一球咁追，係上半場完場前追返一球。 去到下半場佢地成功突擊嚇到龍門出迎失位入追到第二球。 呢個時候我地有球員兩黃一紅被趕離場…. 呢刻真係有啲覺得氣數已盡，但又唔知點解面入左波之後好似無人有反應咁，我地歌照唱，又聽唔到對面慶祝。 突然 Nick 又搏到多一個十二碼，我地既防中成功戴帽～ 後來先知原來對面個 17 號唔只犯錯搞到失第一球波，就連兩個十二碼都關佢事，最後仲食埋兩黃一紅離場。

呢個時候我地放心少少，起碼唔係人多打人少先。 客隊最後射入多兩球，其中一球好在旁證發雞盲判錯越位變做詐糊，最後以七個入球做終結。 睇返啲人講，今場個球證執法水準奇差，而我地既水準都唔值得贏波。 只可以話：三分以袋。

希望領隊同班球員睇到呢兩場個問題係邊然後慢慢執返好隊波。 踢埋今場終於踢完首循環～ 下星期我地又再係主場迎戰我地德丙開咧戰既對手: RWE！