14.01.2022
德國足球丙組聯賽 第 18 週
SV Wehen Wiesbaden - SV Elversberg
BRITA-Arena
賽果：1:0 (1:0)
入場人數： 7526 （616 名作客球迷）
門票：11€ （另加 2€ 手續費）
更多相片

2022 年我地有一個完美既總結，成為有史以來德丙最佳既升班馬。等左兩個月終於再次開波去作客其中一隊主要競爭對手 Wiesbaden。 2022 年保持作客不敗既 SVE，黎到 Wiesbaden 應該唔會太難應付？

SVE 既佳績吸引愈黎愈多球迷入場支持，今場波離莎蘭只有需大約兩個鐘車程，球會一早就推出作客套票，巴士連波飛只需 23€～ 一開始就已經宣布已經有四架巴士滿座，去到賽前幾日正式宣布會有六架巴士由 Elversberg 出發，預售左超過五百張飛！ 六架！！ 對上一次有咁多人出征要數到上次係德丙既最後一場波對多蒙特二隊，當時已經篤定降班，球會就話請球迷去睇波好好享受最後一次作客職業聯賽。

我地由屋企出發就只需二十分鐘車程，但我地決定開波前個半鐘就要到球場，唔洗同幾百人一齊係雨下排隊入場。 我地想見證下六架巴士到場既情景，係門口買左飛之後就企左度食左半個鐘西北風先再入場。 當然呢個場面同大球會相北都只係小毛見大毛，不過對我地黎講可以話係其中一個歷史性時刻。

仲記得上年年頭啲防疫政策開始放緩時，我地仲未有過可以升班既念頭去作客榜首既緬恩斯二隊，當時有近 250 人到場一齊唱歌已經超感動。 今年係德丙我地有過 300 人去到科隆作客又係一大驚喜。 今日我地又再令人跌眼鏡，如果真係保持到水準的話，呢隊鄉下隊既支持度應該可以繼續上升。

一來莎蘭人其實好愛「國」，佢地個個都好自豪自己係莎蘭人，好自豪自己既美食、鄉下話同文化。 呢個州有幾隊波曾經風光過，最受歡迎既一定係首都 Saarbrücken，然後點數都唔會數到去 Elversberg。 去到呢幾年 SVE 成績愈黎愈好就多左人留意，去多唔中意 FCS 既人或者睇開德甲既球迷突然多左個選擇可以去捧為莎蘭之光。 希望我地可以留住啲突然球迷然後借機會一齊發展落去！！

不過人一多就開始會亂！ 啲大隊球既球迷入到場會知道要留返中間靚位比球迷組織，而我地既組織都無咩經驗去處理咁多人。我地啲球迷就攤哂上看台搵到靚位就企，而組織班人最後先入場只可以㨂剩返既位聚集，廢事令到其他球迷唔開心～ 唯有吸收教訓下次早啲入場霸位，等其他人都慢慢習慣。

我今場波全場企左係看台頂，最主要係想由後面影多啲相，後來發現無路走又廢事走上走落就決定全程企後面，以另一個角度感受下我地既作客氣氛。 企係看台最後其實係唔太聽到前面唱緊咩，佢地企得太低同太出，用唔到有上蓋既優勢制造更大既迴音。 有時以為前面已經停左無唱，但又原來只係聲向向前，企係後面既人唔太聽到就停左無唱。

主隊過去十年都係德乙或者德丙打滾，但呢隊波對好多人黎講都不值一提。 隊波原本來自 Wiesbaden 西北部一個小鎮 Taunusstein，係 2007 年贏得地區聯賽冠軍升班上乙組。可惜佢地既球場唔合資格踢職業聯賽，最後球隊管理層決定將隊波「搬」去 Wiesbaden，借贊助商班主既銀彈極迎以半年唔夠既時間起左個鐵通球場，仲將隊波由 Wehen Taunusstein 改名做 Wehen Wiesbaden。直到現時為止個球場就好似香港啲「臨時天橋」咁臨時左十年都仲係度。 上次我地黎呢個球場係為左睇 Magdeburg 作客，當時落住雨球場比泥氹包圍，個個變哂 Peppa pig；今日同樣係暴雨下到場…. 再一次出現泥氹！

係歇冬期間 SVE 有幾場友賽都輸哂，唔知算唔算係一個唔好既預告呢？ 今日可以用幾隻字黎形容：力不從心，抵輸。 對方既陣容本來就唔差，我地就係一個唔小心比對方搵到機會係禁區邊逗個波笠死龍入網。 再加上班球員好似唔係好上心咁，好多不必要失誤，傳波又唔到位。 成場波可以大部份時間都係捱打，只輸一球算係好彩。

估唔到保持左一整年既作客不敗紀錄，黎到 2023 第一場波就被打破。 學我地領隊話齋：今日輸波好正常，上年所發生既一切先唔正常！完場後所有球迷仍然為自己隊波鼓掌，一齊大叫 Elversberg。雖然無人鬧班球員，但班球員企係我地面前都笑唔出。 不幸中既大幸係，今場波 Wiesbaden 係爭升班份子既唯一得益者，FCS 同 1860 同時失分，就算 Wiesbaden 贏波升上第二都仍然落後我地七分。下場我地主場迎戰另一個爭升班既 Ingolstadt ，希望我地重整旗鼓向升班之路出發～