26.12.2022 法國足球乙組聯賽 第 16 週 FC Annecy - AS Saint-Etienne Parc des Sports Annecy 賽果：2:1 (1:0) 入場人數：12,180 （約 3000 名作客球迷） 門票：19€ 更多相片
黎到 2022 年最後一個星期，我地同一班親朋戚友去左法國過聖誕。係暑假期間已經訂左一間可以容納十四人既雪屋，幾家人可以一齊過冬～
如果唔係因為班親戚，我地自己應該唔會㨂冬天去阿爾卑斯山，一來我地唔係特別好滑雪，二來天寒地冬既天氣下揸車上山好危險… 點知黎到十二月冬左幾日之後去到聖誕左右就回暖。 我地先去左莎蘭過兩日，然後係聖誕正日一早就南下，先經過法國再返德國上高速公路，然後穿過瑞士再多一個鐘車程就到達位於 Mont Blanc 山腳既雪屋。
由於天氣太暖，山腳已經無咩雪，好處就係揸車輕鬆好多，壞處就係無嘩一聲既雪景睇。 我地間屋 360 度都見到阿爾卑斯山山脈，淨係見到山頂上先有雪… 好多 ski lift 都因為唔夠雪而停駛。 我地都搵左幾個山頭先搵到多雪既 slope 可以開心咁玩！啲細既日日就㨂去滑雪，我地就玩左一兩日已經覺得好攰，反而想留返係間屋度攤下，游下水同浸下按摩池～～～ 無諗過十二月竟然可以係雪山落水，仲要出奇地好玩！
多得今年既世界盃，法國竟然係 boxing day 就已經復賽，我地一早就睇中左離我地落腳地 Saint Gervais 大約一個鐘車程既 Annecy。 佢地會遇上法國勁旅 Saint-Etienne，今場波應該會係成個比賽週最有吸引力既一場波。
本來我地諗住 26 號起身食完早餐就會出發去 Annecy，去睇下當地既名勝同搵間餐廳食個靚飯，點知當日天氣預告會落大雨，最後我地決定同親戚一齊去附近一個小鎮觀個光同食埋晏先出發，直接去球場。
最後我地兩點半出發，法國既高速公路大部份都係收費既，收費方式好似香港啲隧道咁係出入口都會有閘口（其他國家例如瑞士係要買個貼紙貼係車頭，唔洗逐次比）。 當我去到 Annecy 出發時，有警察爬我地頭然後擋住所有閘口，原來啲作客球迷巴士咁岩同時到達… 啲警察想比佢地一次過過哂先。 我地企係個閘口前面差唔多五分鐘，部機突然有人開咪 Bonjour? fjshdfqhiuhfkj 我估佢地係閉路電視見到架車塞左係閘口前面咁耐又唔嘟信用卡比錢就想問我地咩事， 我地用英文話有警察封路我地唔行得，然後就開始雞同鴨講，佢係度 visa master 應該想同我地講用信用卡比錢，我地就話 police – block – cannot drive。 等到嗰十架巴士過左閘之後我地終於可以比錢開閘離開…
去到球場門口時仲有大約半個鐘就開波，但門口仍然仲係超長龍。 係閘口有個女人話女人要排右邊，咁我就過去排隊，通常女人隊快好多，我仲諗住可以拿拿聲入場去埋個廁所先埋位。 點知原來得一條女人隊，排左十分鐘先郁左幾步。 個保安好認真咁 check 每個人既身同袋，去到差唔多開波時啲拖住小朋友既媽媽開始發火，個保安終於放棄，總之有飛就入得。 最後我係開左波先入到場….
埋到位一坐低主隊 Annecy 就入左波～～～ 當時我都仲未搞清左狀況，唔知邊隊打邊隊。 回過神來先知入波既棗紅色衫係就係主隊。 係我左邊既看台企滿左身穿綠黑白色衫既作客球迷， 佢地係失波時完全無停過唱歌打氣，由開波到完場都無停過， 法國球迷係呢一方面係幾吸引～
雖然今日係劃左左邊龍門後面做作客看台，但主隊其他都無特別限制，好多作客球迷就咁買普通飛入場，例如係我地呢個看台就有好多作客球迷走哂去最近作客看台既區域跟埋一齊打氣，仲會好唔客氣咁好光明正大鬧返主隊球迷。
今場波入得場既主場球迷大部份都應該係突然球迷，球隊從來無咩成績，今年亦只係岩岩升班上乙組，一直都無咩點吸引到球迷。 唔係因為世界盃所以無啦啦十二月尾有賽程加上對手仲要係傳統班霸 St-Etienne， 都應該唔會有普通球迷都想入場湊下氣氛。 而 St-Etienne 近年既成績雖然唔係特別突出，但一直都係出戰法甲同埋間唔中有歐洲賽踢下。 上年降班後， 大家都無諗過佢地落到黎法乙竟然繼續沉淪，隨時下季法丙見。
更加估唔到既係，佢地係乙組踢得咁差，黎到星期一晚既賽事佢地都有近三千人入場支持。 乙組每週星期一都會有比賽，而 ASSE 既球迷同球隊講到明會杯葛； 星期一既主場一定唔會入場。 今日只係例外想同大家一齊過下節。
去到下半場主隊再搵到個機會入多一球，我附近既作客球迷終於收哂聲，反而係背後既小朋友主場球迷愈睇愈開心～ 多左人一齊拍拍拍 Annecy。 完場前約十五分鐘，客隊追返一粒。由呢一刻開始場波變到好近湊，兩隊都上哂身咁狂攻無果，最後升班馬主場爆冷贏 2-1!
完場後班作客球員比自己啲球迷狂噓，一定係接受唔到隊波踢得咁差，球員都唔敢走得太近個看台，例行公事企係角球位置拍幾下手就調頭走人。 而主場球迷就受到英雄式歡呼～～ 呢個時候我地就拿拿聲走人，想趁啲作客球迷搞事前離開。 係法國啲球迷一嬲嬲就會無差別攻擊普通球迷，啲警察亦都完全唔好惹，所以有咁遠避咁遠就好。
揸一個鐘車返到去 St-Gervais 後就等開飯，同啲小朋友玩一陣就準備第二日既行程。 我地會上山腰行山睇冰洞同滑雪～ 之後幾日就係真係休息日留返係雪屋度自閉，天氣靚就游下水，天氣差就睇電視，到夜晚等人齊就煮飯同大飲特飲～ 年尾返德國過新年，安安靜靜係屋企睇人放煙迎接新一年既來臨！