03.12.2022 英格蘭足球乙組聯賽 第 20 週 AFC Wimbledon - Grimsby Town Plough Lane 賽果： 1:0 (0:0) 入場人數： 7962 （1071 名作客球迷） 門票：25£ 更多相片
今年仲有一日半 AL 剩，一開始諗住去馬德里探朋友，然後又改變主意諗住去柏林，因為火車飛好平，但係到睇酒店時全部都好貴；最後碌下機票好快就決定左飛倫敦。 屋企人年初搬左去英國，而家可以隨時去英國痴地方過夜～ 另一個主要原因係佢地本身係伯明翰落腳，之前我地都去左幫佢地搬屋； 而最近因為有親戚都搬左去英國，大家一齊㨂左搬落去南部一齊住有個照應，咁我地都係時候去參觀下新屋！
星期五一到 lunch time 就熄電腦出發去機場；特登預再多啲時間係機場食lunch 同過安檢；點知一切順利到完全係直行直過，入到去禁區仲有兩個鐘先起飛，然後又 delay 左大半個鐘先有得上機…. 唔知點解連 Heathrow 今日都好靜，過關都係直過，最後唔洗十分鐘就已經入左境！！
我地約左係 Selfridges 既鼎泰豐食飯先返去， 由機場可以搭新線 Elizabeth Line 直出 Bond Street。 我地以為同搭 Underground 一樣價錢….. 後來先知原來由機票出發係唔同價錢，搭左成 13£!!! 下次繼續被 This is a Piccadilly Line service to Cockfosters 洗腦算。
食完飯之後就南下去新屋，目的地係 Winchester， 由倫敦揸車唔塞車的話個半鐘左右就可以到達，再揸多半個鐘車就可以去到 Southampton。 由 Heathrow 直落的話就一個鐘內可以到達！
訓飽第二日一早就起身，因為我地要再出倫敦去睇波。 英國同德國一樣，世界盃期間仲有低組織可以睇，當我地決定去英國就即刻睇下有咩波睇，睇左好多路線之後睇 AFC Wimbledon 最岩心水，可以由 Winchester 搭火車直達！
場波 12 點半開波，我地買左九點半車飛，十點半就會到 Wimbledon 可以慢慢行半個鐘路程去到球場，仲有時間可以食個批同飲杯啤酒先入座。 ….. 去到火車站見到個牌寫住我地班車會 delay 十分鐘； 過左一陣就話 delay 廿分鐘，最後就只係話 delayed 同埋話班車好滿唔會有位坐。 站長話班車 delay 係因為車上有乘客不適… 等下等下，去到再一下班車都黎左，好好彩我地迫到上車。
一上車個車長就道歉話 sorry for the delay and overcrowded train…. 話本來係有十卡車，但尋晚因為信號故障所以好多車去泊錯地方搞到今日唔夠車用； 話上唔到車既話麻煩等下一班車, there will be a train in… some time in the future… 完全唔敢同窗外出面既人對望，好驚佢地會嬲到爆窗！！
去到 Woking 我地要轉車，唔係每架車都會停 Wimbledon，有啲車會直去 Waterloo （如果我地想出倫敦市中心就會㨂快車直出）。 最後我地十一點半先到站； 英國火車如果 delay 既話係可以要求賠錢，所以買飛記得要 keep 任何形式既單據，我地最後比原定時間遲左超過 60 分鐘先到達目標地，而我地張飛係來回飛，可以得到車飛票價既 50% 賠償！ 對我地黎講，最緊要趕得切去睇場波，而家變左好似半價出倫敦咁～～
去到球場已經十二點三， 入場後即刻衝去廁所，仲有大約十分鐘剩就試下排隊買埋野食先入場。又好好彩佢地好有效率，我地最後係開波前五分鐘拎住兩個批入座！！！ 只係未坐得切啲球員就已經入場，拎住個批既同時又要拎機影相好忙！！！ 等到開波我地都終於可以坐低抖下… 由今朝出門口到而家我地已經企左三個鐘好攰….
講起溫布頓，你可能第一時間會先諗住網球。 呢隊波雖然只係一隊係英乙打滾既蚊型球隊，但佢地足球界其實都好出名，因為佢地可以話係其中一隊最先被金主足球玩殘既球隊。 AFC Wimbledon 只有 20 年既歷史；佢地既前身係1889 年成立既 Wimbledon FC。 隊波去到 2000 年因為財困而要賣盤； 新班主竟然話要將隊波搬到去離倫敦差唔多 100 公里以外既 Milton Keynes，仲要改名做 Milton Keynes Dons。
去到 2002 年， 一班 Wimbledon FC 既球迷自己組成 AFC Wimbledon 由零開始，由最低組別開始慢慢踢起，暫時最高成功上到去英甲，今季先降返落英乙。 而佢地既主場 Plough Lane 亦都有一段故事。
Plough Lane 一直都係 Wimbledon FC 既主場，後來足總因為希斯堡慘劇而改例規定職業聯賽既球隊一定要係全坐位，The Dons 即時唔可以再係 Plough Lane 出賽；被逼要借用水晶宮既球場。 後來球隊一直都未能搵到改建或者搬遷球場既方案，最後連球隊都消失埋都未能重返自己既家。
AFC Wimbledon 成立後，球迷一直想完成重返自己地區出賽既心願。 佢地知道要返去原本既 Plough Lane 已經係無可能，但佢地地同市政府商討希望可以係區內重建球場， 最後佢地成功搵到發展商合作興建一個多用途住宅社區。 現今要係倫敦就算你有地有錢，政府都唔會咁易批比你用黎起球場，所以啲新既倫敦球場全部都係屬於「屋苑」既一部份，就好似我地早前去 Leyton Orient 一樣。
班球迷最後透過眾籌同各種方法終於係 2020 年有一個屬於自己既新球場，改名為 Plough Lane！除左個主看台，其餘三個看台都係只係臨時看台，容納人數大約 9300 人，目標係一步一步加建到最後可以容納超過二萬人為止。
今場波我地總共只係影左十張相就已經夠數， 其餘時間我地都好專心睇波。雖然全場又係得一個入球，但場波有攻有守係幾好睇既！！ 客隊 Grimsby Town 來自東北部沿海地區，無諗過竟然會有成千人入場！ 班作客球迷心情好靚咁唱足全場，就算輸波都無損佢地既心情。 佢地其中一個打氣節拍係拍拍拍 Fish! 一開始唔知佢地叫乜，後來周圍望下先發現佢地球隊 logo 上面有三條魚先知佢地原來叫自己做魚！！因為佢地城市最出名就係魚業，太可愛啦～～
完場後我地行返去火車站，先去超市買幾個 Krispy Kreme 同薯片，然後再搭車返去。 回程終於可以輕鬆一下唔洗再同人逼！ 返到去有得打邊爐～～～ 最後一日係 Winchester 市內參觀，我地以為呢度只係一個鎮仔無咩特別，但原來好有歷史同埋好多本地遊客會黎一日遊！ 真心，呢度靚過同舒服過伯明翰好多。 以後仲可以有多啲機會見多啲英國南部！