30.10.2022
捷克足球甲組聯賽 第 14 週
FK Teplice - SK Sigma Olomouc
Stadion na Stínadlech
賽果：2:1 (1:1)
入場人數： 2316 （8 名作客球迷）
門票： 170czk/55czk
更多相片

跟住 SVE 去到咁遠作客，一定要睇多一場波先回程。 本來係諗住星期五就出發，係波蘭睇一場波，睇完德丙再去捷克睇多場波。 但係啲酒店完全睇唔啱，然後又慢慢覺得個行程有啲太趕，最後係捷克邊境城市 Ústí nad Labem 搵到一間係山上面既舊城堡酒店，幫我地決定最後係邊度過夜同睇波～

天氣預報話第二日一早會大霧，去到中午先會見到太陽。 咁呢個城市位於山谷同 Elbe 河旁，去到秋冬天大霧都正常。 我地屋企附近得條溪仔朝早都係好大霧，等到太陽一出黎就會慢慢散。

第二朝一起身望出窗真係大霧到咩都睇唔到！ 食完早餐 check out 後，我地就去到離 Ústí 大約二十分鐘車程既 Teplice。 場波三點開波，我地十一點左右就到左，可以去行下商場同舊城區，感受下東歐風味。 當時仲係好大霧同得返十一二度左右，泊低左架車之後就即刻衝入去商場取暖。

係歐洲咁耐到而家都唔明點解歐洲啲商場真係勁悶同唔好行… 呢個大商場有三層，好多賣衫賣鞋既舖頭但完全唔想入去睇… 但為左 hea 時間就入左去 H&M 同運動舖兜個圈。 諗住係入面行左大半個鐘，出到去啲霧應該慢慢散啦卦？ 點知出到去都仲係一片灰色…. 只係暖左少少。 咁我地就去超市買啲手信先，去捷克一定要買返枝 Becherovka 返去看屋，喉嚨一痛就要飲返一杯黎消毒！ 然後睇定陣間睇完波要買邊款 Klobasa 返去食～～

買完手信就去舊城行，沿路見到好多同貝多芬相關既野，即刻上 wikipedia 睇下呢個度貝多芬有咩關係。 原來佢曾經兩次到訪過呢個蚊型城市，一次係醫生叫佢黎做 spa 休息，另一次係黎到同歌德會面！ 行行下見到呢一個商場就諗住入去借廁所黎用，同埋去行個圈暖返個身同 hea 時間。 係呢個 up dup 商場入面竟然有間 Bossini!!! 我話呢間野香港野黎架喎？？ 定係我記錯好似 Giordano 先係？ 上佢地個網 bossini.eu 翻譯佢地既名牌故事原來真係來自我故鄉既 Bossini~~~ 仲話佢地而家集中係歐洲發展，係捷克有兩間分店，分別位於 Teplice 同 Cheb! 正常有邊個會去呢兩個邊境城市？ 更加想知既係佢地點樣㨂呢個兩地方黎開店….？？

行完 Bossini 出到去啲霧仲係度，到底個太陽係咪真係會出黎！！？ 我只係著緊 t-shirt + uniqlo 既 ultra light 羽絨，係十三度既氣溫下好在無風，如果唔係我應該唔到捱得住！ 去到球場門口買飛同買頸巾之後就入場。估唔到睇甲組都有分男女門票價錢… 男人比 170czk （大約7€），而女人只需比 55czk （約2,5€)，唔知幾時會有人走出黎鬧性別歧視呢？？首先就係要搵 Klobasa，捷克辣肉腸～ 人地話 Teplice 既 Klobasa 係全個甲組聯賽最好食野既！！！的確係我地暫時食過最好食既腸，又香又多汁～～

我地㨂左坐係後備席後面，可以直望對面看台頂既主場球迷，同時又可以見到作客區。 接近開波前，我地右邊角落突然有班人係度掛旗，睇過其他人黎呢度睇波既相都無人提過呢隊波有兩班球迷組織？ 睇落對面看台頂係普通球迷打氣團，而企係角落既呢十幾個人似係由打氣團分列出黎自成一角。

佢地呢班阿叔係我地今場波既一大娛樂，睇住啲保安係咁走入黎想㩒住佢地。唔比佢地爬欄杆，又唔比佢地用大聲公，但最後都係無佢地符只可以由佢地以自己想用既方法打氣。 佢地又真係唱足全場，只係每一兩首歌就要一齊飲啖啤酒回下氣。

場波下半場好睇過上半場好多，上半場雙方互有攻守各入一球，去到下半場主場踢得愈黎愈主動，啲球員好落力咁追波去製造到好多機會。當中有個黑人前鋒我地話佢 Koffi 上身一定會入到一球波，果然講完無耐佢就入波幫隊波贏三分！

完場後我地去球場旁邊既超市買多少少野食同一箱啤酒返去，展開我地六個鐘既車程返屋企～