29.10.2022
德國足球丙組聯賽 第 14 週
FC Erzgebirge Aue - SV Elversberg
Erzgebirgsstadion
賽果：1:1 (0:0)
入場人數：6733（50 名作客球迷）
門票： 15€
更多相片

賽前又唔小心睇到啲數據，話德甲乙丙只有兩隊波今季仍然作客不敗，一隊係凱莎羅頓，另一隊就係 SVE。 然後仲有人指出 SVE 唔係只係今季作客不敗，而係 2022 年作客不敗，對上一次輸波係聖誕二次 lockdown 前。 見到呢啲數據我又開始不安，硬係有種不祥既預感… 特別係對手仲要係尾二……

Aue 來自東德，位近捷克邊境既 Erzgebirge 山區。地方細細但當地人對球隊十分忠心，亦都係其中一隊可以證明比人地鄉下隊都可以有一大班會追隨球隊既球迷！ 今場波之前我已經睇過佢地幾次作客，見識過佢地既球迷的確係幾有氣勢。 佢地同史浩克一樣有好重既礦工文化，賽前同樣會播礦工歌，其中一首打氣歌會將雙臂交叉舉起。 球隊上季由乙組降班落丙組一沉不起現時排係降班區，但呢啲球隊先最難搞！！

由法蘭克福出發直踩車程要大約五個鐘，由莎蘭坐巴士出發就要大約八個鐘… 我地七點先出發去食個早餐，大約八點左右上路，最後一點前到達。 出戰德丙既好處係啲球隊一定有作客球迷停車場，今次我地可以將架車泊正係作客區門口！！！ 一落車就拿拿聲入場去廁所…. 然後再入看台見到有個爸爸同一個小朋友已經到左場。 佢話早排唔得閒帶小朋友去睇波， 咁岩呢個星期放假就想跟埋一齊作客，但 Aue 呢啲牛屎地方完全唔知有咩好做，最後一家三口去左 Dresden 玩幾日，然後落黎睇場波先再返去莎蘭。

我地既行程就相反，睇完呢場波會南下落捷克過夜睇多場波先回程～ 傾左一陣我地就去買野食，之前有其他球迷知我地會去 Aue 作客就已經叫我地要食 Wurstgulasch，其實即係茄汁腸仔燴意粉咁，話係東德美食！ 咁就當然唔可以錯過…. 5€ 一大兜仲可以免費加芝士！！！ 美食就唔係… 但係球場既特色小食囉，唔洗次次都淨係食腸仔。

Aue 既 Erzgebirgsstadion 係 2018 年開幕，花費只需大約二千萬歐元用三年就完工。 對比起我地既隣居 Saarbrücken 翻新個球場搞左五年仲要年年超資，去到最尾唔夠錢爛尾。 東德既好處就係人工平同物資平。 球場可以容納接近一萬七千人，成條村既人入哂球場都仲可以有位剩。

今場波我地有大約 50 人黎到作客都算係咁，巴士到場無耐就開波。 SVE 一如以往用同樣既陣容同策略去出戰， 但係 Aue 睇準哂策略黎應戰，係中場防守得超好，完全無比時間我地既球員去諗同搵空氣，總之我地一有波在腳就會有人黎迫，同時附近會有兩三個球員圍住準備反攻。 SVE 既踢法之前都有比其他球隊睇穿，但佢地守得黎又攻唔到。 但今場主隊無論攻定守都好得心應手好流暢，完全唔似德丙榜尾。。。

成個半場主隊都係向住自己既球迷看台攻， 幾經辛苦先捱到去半場，暫時黎講係我地今季睇過表現最差既半場波，仲有球證旁證都勁廢囉！！！希望領隊可以作出應變扭轉局勢。 去到下半場唯有希望佢地繼續留返係對面半場唔會過黎我地面前。 最後我地終於成功靠角球開出接應頂去遠柱入波， 點知唔夠幾分鐘我地後防甩碌送左個機會比人追平。 講左好多場真心唔明點解咁中意係自己禁區內玩短傳，仲要人地迫得咁埋都仲係度慢慢黎。 如果唔係對方球員本身有信心危機今場一定可以大炒到我地囉。

我地只想場波快啲完，一分真係 more than deserved！ 對方球迷話今場波係佢地呢兩年來踢得最好既一場波，仲問我地踢成咁點解可以企係榜首。 我都想問點解今場咁都仲可以守到一分返黎… 不過！！！ 完場後我地望下其他賽事…. 德丙上游既球隊全部都輸波 ._. 睇黎物極必反係真，榜尾嗰幾隊今季未贏過波咁濟，係要有個時候可以迴光反照。 1860 仲慘過我地，輸比包尾既 Bayreuth。我地呢一分竟然成為大贏家！～～

賽後有啲球迷好嬲話班球員踢得差，咁佢地既表現的確係差。 但拉返遠啲黎睇，我地仍然企係榜首，而係踢得咁差既情況下都仲可以有一分。 最緊要啲球員咪再以為隊波係榜首就離哂地，甩波唔追又成日企係度等波到… 希望呢一場波可以打醒返班球員，好波唔係必然的。

完場後我地就繼續向東出發去捷克邊境過夜，第二日睇多場波先返去。 下星期我地決定休息一日留返係法蘭克福… 因為再下個週中我地會近球隊去巴伐利亞作客。