18.10.2022
德國足總盃 第 2 圈
SV Elversberg - VfL Bochum
Waldstadion an der Kaiserlinde
賽果： 0:1 (0:0)
入場人數： 6911 （約  800 名作客球迷）
門票： 10€
更多相片

足總盃既第一圈我地遇上德甲既利華古遜，點知佢地作為爭標熱門竟然比一隊德丙升班馬羞辱，去到而家已經過左三個月佢地仍然一沉不起。每個利華球迷都有 PTSD，每輸一場波就回想起 SVE 然後要講如果唔係輸得咁慘佢地一定唔會踢得咁差。

第二圈我地再次抽中德甲球隊，今次係波琴，抽籤結果出爐時我地都已經覺得有機會一搏。 過左兩個月佢地仍然企係榜尾，而我地狀態大勇企係德丙榜首， 波琴球迷真心驚到震。 有啲網站仲講笑話佢地希望弱隊可以贏波，當中包括波琴，希望 SVE 唔好去得太盡！

第二圈麻煩之處係週中波，星期二早少少收工就揸兩個鐘車去莎蘭，可以食埋飯先行去球場。 我地係開波前個半鐘已經入場，當時 C1 已經人山人海，個個都諗住早啲入霸個靚位。 呢場波我地準備左一個簡單既 choreo， 係門口每人派個氣球同一袋碎紙，係看台前掛左大字報同準備左係球場外放煙花 （咁就唔洗比足總罰錢）。 我地去到開波前幾日先確定可以偷偷買到煙花，然後好急咁準備所有野， 最後出黎既效果麻麻，但都算出左力～

等到球員入場時，我就企係看台底搵機會影相。 我地既看台竟然有條友運左兩枝黑白煙入場，仲好笑係佢竟然無遮住塊臉先放煙。 （賽後見到場外有人比狗照， 發現就係放煙條友，問佢點解要放煙，佢話因為之前見 60 放煙好型所以佢都想放下…. 呢啲咪傻仔囉。）同時又見到對面都準備左閃光彈，好忙咁要影兩邊！ 波琴離莎蘭要大約 3-4 個鐘車程，週中要黎鄉下地區係唔容易，有 800 人黎都算係咁。

上半場我地向住作客看台攻， 睇落對手的確有研究我地過去幾場波既踢法，無咩點走甩過我地既球員。另外波琴球員大隻超多，如果要講今場波睇得出既分別就係球員身型。 佢地幾乎玩 man mark，只要我地有波在腳佢地有人埋黎輕輕一撞我地啲球員就會被撞飛咁。

下半場佢地終於看我地呢邊攻… 但成個球場愈黎愈大霧，係大霧到對面作客看台唔見左，龍門又見唔到，個波飛高少少又見唔到… 感覺好似去左深山只係靠聲音去辨識對方既存在咁。 波琴龍門都投訴話好大霧見唔到對面，但球證企係底線話佢仲見到對面龍就話比賽可以繼續。 有段時間我地見到呆望住一座白牆，係靠唱歌先可以令自己集中到知道前面有場波踢緊 -_-

去到就黎完場都仲未有入球，唔係要加時卦… 雖然明天拎左半日假但就算準時完場我返到法蘭克福都已經一點！！ 仲有如果要射十二碼，佢地係對面龍射的話我地睇乜？？我地入左球波但被吹越位。 突然霧中傳來一遍歡呼聲。 對方入波了…. 後來睇返精華先知個入球好 -6 囉，對方球員係遠柱接應篤到個波，射中我地龍門反彈出黎中左佢個身再入網… 就係咁弱隊波琴爆冷贏波～～

人地始終係德甲球隊，我地可以同佢地拉鋸到最後輸運輸波都可以話係雖敗猶榮～ （過去幾年足總盃出局都係雖敗猶榮…） 完場後，班球員好唔開心咁走到埋黎，我地用唔同方法話佢地知我地唔可以氣餒，一齊提醒佢地就算而家出局我地都仲係德丙榜首， 星期六我地係同一個地方一齊企返起身繼續踢好波！！！