15.10.2022
荷蘭足球甲組聯賽 第 10 週
Fortuna Sittard - RKC Waalwijk
Fortuna Sittard Stadion
賽果： 0:0
入場人數： 11,043 （約 300 名作客球迷）
門票：27,50€
更多相片

係科隆睇完 SVE 作客 Viktoria 之後，我地立刻起程向荷蘭出發，為既就係係邊境城市睇一場荷甲！

曾經計劃過幾次去睇啲大啲既球隊，不過最後都撞唔岩時間，又或者遇上啲比賽係要有購票紀錄先買得。今次睇中左 Sittard 諗住吸引力低啲，估唔到場波最後都賣得好快，最後仲有過萬人入場。

由科隆去 Sittard 只需大約一個鐘車程， 泊低架車之後行唔洗五百米就已經到達球場！ 好好彩到達前個天落完最後一場雨，可以離遠睇下日落。

球場附近有唔小商店，係正門口有一大間 Aldi 超市，仲有慶祝啤酒節勁多醉酒荷蘭佬。 兜左一大個圈去到作客區先發現行錯路又要行返轉頭。 去到我地既看台入口有超多人排隊，咁大個看台只有一個入口… 仲要得兩部機用黎嘟飛入場。Fortuna Sittard 既主色係黃綠色，見到啲人戴既頸巾同波衫驟眼望過去以為係北京國安！！

排左十五分鐘終於入到去，得返十分鐘左右就開波，肚餓都唔夠時間買野食。 （但其實係係科隆食完條烚腸之後仲未有胃口） 球迷風格有啲似法國 Nancy 既主場，看台底係廁所同小食亭，要行到上看台先會見到塊草皮。我地個位係正看台中間， 埋左位就唔敢再出出入入驚阻住人。 後來見到其他人食既又係烚腸熱狗，真心想嘔！！！！ 只希望場波可以快啲完場然後去球場旁邊食老麥。

早幾個鐘先睇完德丙榜首既表演，完全無諗過黎到睇荷蘭既頂級聯賽賽事竟然咁不堪入目… 唔識走位，傳波又唔到位… 埋門又無把握力。 成場波唔小心係咁講： Fellhauer 都比到啦， Koffi 實射得入囉。 諗住德丙開 league 後去比利時又係咁，有直接比較之下，第二場波真心悶到多。 再加上兩邊球迷都無咩特別，佢地都有唱足全場，而我地身邊既球迷間唔中都會加入一齊唱歌。 比較有趣既係聽啲人講荷蘭文… 估佢地換人嗰陣講緊咩號碼～～

完場後又要經唯一出入口離場，離場仲難過入場！！ 成功走人之後我地即刻去附近既超市買手信，荷蘭超市既牛油蛋糕超好食～～ 同埋買一大堆零食返去。 買完先再去麥當勞食飯… 呢度既餐貴德國好多，叫左兩個餐已經差唔多20€， 但質素高好多，個包真係好好食，下次可以再黎食過。