15.10.2022
德國足球丙組聯賽 第 12 週
FC Viktoria Köln - SV Elversberg
Sportpark Höhenberg
賽果： 0:2 (0:0)
入場人數：2653 （290 名作客球迷）
門票： 10€ （另加 2€ 手續費）
更多相片

今個星期我地到科隆作客，對手今季成績一般係聯賽榜中游唔上唔落咁。 而 SVE 今季既作客成績表現極佳，只要可以保持水準既話要拎呢三分應該無咩難道。

由法蘭克福揸車出發去科隆只需大約兩個鐘（搭高鐵只需 45 分鐘！），由莎蘭出發就大約三個鐘。 而科隆係離莎蘭其中一個最近既大城市，有唔少人一早訂定酒店順便係科隆有個 weekend getaway，再加上今次有兩架球迷巴士出動，預計今場既作客人數應該比得上開季作客 Essen 場波！

天氣靚左幾日之後呢兩日又開始陰陰沉沉，到達球場前咁岩遇上同樣岩岩到埗既球員巴士，可以親眼見到架巴士既新拉花～～ 作客巴士未到場內就已經有十幾個 SVE 球迷入左場… 對比起九年前德丙咁既人數已經係齊人！

趁未多人就先買野食…. 作客球迷不嬲都比人當係狗，上年黎呢度嗰陣係主場區有好味既咖哩腸同薯條。 咁佢唔炸薯條我都理解既，但明明網站話作客區會有燒腸 (Bratwurst)，點知最後只得烚腸 (Bockwurst)… 一心諗住係球場食 lunch 點知得垃圾， 最後食左半條真係啃唔落 -_- 仲有，唔知兩隊波係咪完全無溝通過，我地有兩架巴士黎作客，個小食亭竟然只係準備左一煲腸仔，我諗大約得 3-40 條。 好多人要捱餓睇波！！（最後我無胃口到夜晚睇完第二場波先再食得落野）

開波前九個字，作客區愈黎愈多人，多人到有啲難以置信，驟眼睇應該最少有二百人！！ 難得咁多人一齊作客我一定要影多幾張靚相～ 咁多人聚埋一齊唔只視覺上好睇，我地既聲勢都成功蓋過主場球迷！！（坐對面看台既人話返比我地知）

科隆有三隊波，Viktoria 可以話係最細同最無組織既… 佢地既球迷組織被同市死敵 Fortuna 偷左枝旗所以被迫解散。 上年我地黎睇佢地主場對 Zwickau 時佢地仲係一盤散沙咁，今場佢地睇落好左啲但而家佢地有兩大組織各有各唱。

講返場波，上半場我地表現麻麻地，一直搵唔到機會埋門，睇得出對方係有針對我地既踢法做部署，唔比我地既主力搵到空位同時間策動攻勢。 開季至今， SVE 其中一個策略係快痕準，一開波趁人地未企穩就送個波入網打亂人地陣腳，上半場做唔到既… 就下半場黎做！ 開波唔夠兩三分鐘，SVE 係右路突然搵到個機會入禁區然後將個波送去遠柱，入波！！ 嗰陣我諗住係我地既神射手入波覺得好理所當然。

入左第一球之後，看台上面既球迷個個都愈黎愈投入～～ 好開心見到好多年輕人一齊跟住作客仲會一齊唱歌。 佢地最中意既係 Allez allez allez 搭哂膊頭一齊跳！ 二十分鐘後，我地再係同一個位入波～～～ 認真當時我完全唔知邊個入波。 後來睇返入球精華先知原來係後閘 Fellhauer。 一見到個名時我心諗 邊個黎？新加盟架？ 原來.. 佢已經踢左三年 xD 今日無啦啦入左兩球波佢自己都覺得難以置信。 兩球波都係佢係後面無啦啦搵到空位標出黎然後仲成功入波，係我地既前鋒同中場都無能為力既時候就連我地既後防都可以有進帳！！！

完場後班球員即刻黎搵我地慶祝，同我地一齊唱 Allez allez allez～ 除左難以置信之外都係難以置信，十二個比賽週後我地只輸兩場和一場… 週中我地係主場迎戰德甲既波琴踢德國足總盃。 對方已經驚到腳震，德甲榜尾對德丙榜首， 係咪即係呢一刻大家都係德乙水平？ 希望我地可以繼續贏波一齊創造歷史晉身第三圈十六強？！！