08.10.2022
德國足球丙組聯賽 第 11 週
SV Elversberg - MSV Duisburg
Waldstadion an der Kaiserlinde
賽果： 3:0 (1:0)
入場人數： 4048 （約 500 名作客球迷）
門票： 10€
更多相片

上個星期我地去左意大利，咁岩唔洗睇到 SVE 主場失分。 聽講隊波踢左三十分鐘好波之後就散哂，對方仲要係作客成績不嬲好差都可以係度反勝到！ 馬後炮咁講，我地都覺得隊波係時候要輸下波失下勢。開季至今對過唔少傳統勁旅都踢出超水準令人大跌眼鏡，甚至被睇好可以下季直升上德乙。 班球員一定離哂地，諗住迎戰西部細隊好易食就失分，最後輸波同再次比慕尼黑爬過我地頭踢返落第二。

今日再次係主場出賽，主要目的係要收復失地。 對方來自北威州魯爾區，雖然無贏過好多錦標，但佢地曾經長期係德甲打滾仲出戰過歐洲賽。 而我地既領隊係球員年代曾經效力過 MSV 直至掛靴，後來亦都重返過 MSV 做青訓領隊。 拎左啲經驗就去左德丙德乙球隊執教，不過當中有兩隊波都比佢帶領到降班。 就係咁，係我地比前教練搞到最絕望既時候搵左佢返黎執爛攤… 反而同我地一拍即合，比佢成功慢慢調教到隊波成為而家德丙最強升班馬！

德國落左兩個星期雨之後，呢幾日終於開始放晴，帶住好心情去到球場終於親眼見到加建左座位區既作客看台。 Kaiserlinde 既作客區本來只有企位，球隊要將主看台既一部份座位劃出黎比客隊。 而家加建左個座位區咁就可以將整個主看台留返比主場球迷！ 班作客球迷組織即刻就用左新看台黎做據點，由我地方向望過去既視覺效果的確唔錯。

開波後，MSV 好快有幾個攻勢射門，好在我地既龍門守得住。到我地開始企穩後就慢慢搶住黎攻，我地條中場真係好有默契，一有空位佢地就可以好順咁造個波上去，送唔送到個波入網就要睇下啲前鋒既造化。成功之處就係去到第 13 分鐘就成功送到個波入網，之後就爭一啲運先入到波。 上場都係咁樣一早入波後久攻不入就失勢失波，唔知今場會唔會都係咁呢？

氣氛黎講係呢個球場有四千個球迷在場唔會差得去邊，藍色斑馬球迷就算係落後之後都好積極用歌聲黎幫班球員打氣。 而我地既表現就麻麻地，個個好似無咩氣唱歌咁。 我都唔知點解淨係想呆企係度成日都分左心。見到球王 Koffi 成日都勁輕佻咁有時真係睇到嬲，不過佢啲神來之筆真係…. 有時真係唔知佢真係有料定只係好彩。 今場波佢已經玩左幾次後腳傳波失敗，當我地以為要好好守住呢三分既時候，去到完場前七分鐘佢竟然黎個後腳入波。即刻當我今場波鬧佢既野無講過…. 入到波既就係神！！入波後做左四個換人調動，其中兩個一入場就成功造就第三個入球。 德甲借將 Woltemade 直線餵個波比 Suero 埋齋。

同時 1860 係主場失分，即係我地以兩分之差再次成為榜首。 雖然話我地既目標只係護級成功唔洗升班，但都忍唔住日日望住個聯賽榜睇下我地成績…. 要護級就必須最少有四十分，過左十一個比賽週我地已經有一半分，再望下同第四位既積分差，我地而家領先六分… 真係好癲！！！

今個週中我地有地區盃賽事，然後德丙榜首就會到科隆作客！希望可以延續我地作客既氣勢繼續拎三分！