02.10.2022 意大利足球甲組聯賽 第 8 週 阿特蘭大 對 費倫天拿 Stadio Atleti Azzurri d'Italia 賽果：1:0 (0:0) 入場人數： 18265 （約 400 名作客球迷） 門票：29€ 更多相片
係意大利睇過兩場波，兩次都係同一個球場… 今次係時候去第二個城市開下眼界。首選係去 Bergamo，買唔到飛就會南下去 Reggio Emilia 睇低組別聯賽。 好好彩捕左一個朝頭早比我地成功搶到飛去睇阿特蘭大！
星期日朝早由酒店搭地鐵去到米蘭中央火車站，上到地面見到個火車站外觀時嘩左一聲，好靚！！！ 圍住個火車站兜左個圈先再入去睇下我地班火車由邊個月台開出。 一如所料係仲未有資料既，同英國一樣你班車由邊個月台開出只會係開車前十分鐘左右先會顯示，然後一大堆人同時奔向自己個月台….
由米蘭去 Bergamo 一個鐘都唔洗，車票 6€ 之內就有。我地架火車係來自德國既舊火車… 車窗仲可以打開，窗邊有德文同英文警告唔好亂弄垃圾出窗外。 呢條路線每個鐘都有一兩班，好多遊客都會搭呢條線去 Bergamo 再轉巴士去廉航機場。
去到Bergamo 後，拎住行李既人就向巴士站方向，我地就直行向舊城方向出發。 一出火車站就已經見到屹立係山上既舊城建築物，沿路見到阿特蘭大 fan shop 就先入去買紀念品，咁今晚就唔洗係球場度同人迫！ 行左大約半個鐘我地就到左山腳既䌫車站。 阿特蘭大波飛係包埋比賽當日既當地交通， 不過我地唔係好 sure 係咪真係可以用黎搭上山， 係售票處排隊問係咪包埋，個女人話唔知叫我地問門口查飛條友。 咁我地去問查飛友，佢又話唔知，然後走左入去售票處問個女人，再走返出黎話 ok。 hello??? 咁個女人一開始耍我地做乜？＿？ 就算最後話唔包，一程車飛都只係 1.8€ 我地都會比..
山腳條商店街無咩人，以為呢度無咩遊客，但原來個個係哂山上… 超多人！！！ 我地上到山已經一點幾，想搵餐廳食晏都行到好遠先搵到一間個門面唔似餐廳既餐廳！ 食飽之後就搵雪糕食，米蘭市中心食一球要 4€ 但 Bergamo 遊客區 2.5€ 有雙球～～ 降溫後就搵䌫車上山頂（第一程車只係去山腰！），上到山頂要再行大約五分鐘既山路先上到去觀景台，可以飽覽 Bergamo 市景同埋阿爾卑斯山脈，仲隱約見到米蘭 Skyline.
睇完靚景就慢慢行落山，沿路已經見到阿特蘭大既主場。 落到山開始見到啲球迷向住同一方向行… 跟住佢地行一定無錯！ 同米蘭一樣佢地會好認真咁對波飛上既名，但入場時既安檢佢地淨係問我有無火機或者煙花，我話無佢地就比我入。
入到場之後即係喊出黎，我地個看台要睇住太陽落山…. 氣溫本來其實唔算太熱，25度左右，但坐係大太陽下就即刻加十度… 最慘係個太陽係正作客看台後面，影相既話背哂光。 好在都仲可以望到我地右手邊既主場球迷看台！阿特蘭大既前組織自從解散左之後一直都未有成立新組織，球迷們一只以球隊名字企係北看台上打氣，看台前只有好簡單既 Magica Atalanta 大字報。 不過黎緊佢地打算重組旗鼓，成立新既球迷組織，係球場內外呼籲球迷下星期週中係市內集合表態。
阿特蘭大有兩班球迷位於南北看台上， 今場波佢地一齊準備左 choreo， 一邊用藍白黑紙砌成 1907 － 但佢地啲紙太細，搞到紙同紙中間好多空位搞到視覺上麻麻地！ 而另一邊就用藍黑長布做底，然後蓋上塊寫住 You’ll Never Walk Alone 既大旗。 而作客區去到開波前一刻都仲係吉既，我地以為費倫天拿球迷無黎作客。 同時我地又比太陽曬住望唔清，班作客球迷唔知幾時突然成班出現哂仲已經掛好哂旗！
費倫天拿球迷雖然只得大約四百人，但作客區內既球迷全部都有加入一齊打氣。 呢樣就係意大利足球吸引之處，好多人都話要睇 Ultras 就要去睇意大利低組別聯賽。 場內可能得幾百人入場，但呢班人有近七八成都會企埋一齊唱歌打氣，對自己球隊極之忠心。 將來有機會我地都一齊要去見識下。
上半場為左避太陽就順理成章擰側個頭望向北看台，佢地咁大個北看台都只係得一個人企係看台前帶領球迷打氣，佢仲要只係拎住大聲公，唔係無線咪連喇叭！今日係我人生中第一次見證球證出完紅牌之後收返，多得 VAR….
曝曬左半場個太陽終於落山可以望向南看台同作客區。 費倫天拿應該係我細個認識既唯一一隊紫色波， 見到佢地既紫色旗就喚起左一啲童年回憶。去到下半場開波後大約十分鐘，主場就射入全場唯一入球，球迷即刻放煙慶祝。 去到尾段我地開始專心唔到，首先發現射燈前面勁多蟲係度飛黎飛去都無咩野，但愈夜啲蟲就飛得愈低，勁嘔心！！
去到賽事尾段本來慶祝緊既北看台突然收哂旗，見到啲球迷好緊張咁叫看台下既保安搵救護員入去。 看台上啲有啲山頂既球迷想帶起唱歌但比其他人叫停。 懷疑有球迷興奮得濟碌左落樓梯跌傷… 去到最後班救護員抬走左一個個頭包實哂既球迷… 然後球證就吹雞完場。
呢個時候我地前面出現左好多拎住大字報既細路想叫球員送波衫， 唔怪之得咁多人咁做… 有兩個球員賽後繞場一週時都送左波衫比啲細路… 原來啲波衫真係每場只著一次._. 上面有個章係今場波既對手同比賽日期。 完全理解到嗰兩個小朋友收到衫之後既心情，好多其他小朋友走去圍觀爭住一齊影相。
離場後，我地有一個鐘時間去火車站搭車返米蘭… 最簡單就係行去咁就唔洗怕塞車。 Bergamo 好多人揸綿羊仔/電車車， 啲人完場後係條街度瘋狂響安，超級煩！！！ 大佬前世未贏過波咩…
今個行程如果唔係有兩場波睇既話其實幾悶，我自己對米蘭真係無咩興趣。 希望下次可以去意大利中部睇下風景同建築，去佛羅倫斯睇費倫天拿主場～～ 或者去帞爾馬同芝士同火腿，又或者要趁啲蝗未出到國時去威尼斯… 見識下水上球場。