01.10.2022 意大利足球甲組聯賽 第 8 週 國際米蘭 對 羅馬 Stadio Giuseppe Meazza 賽果： 1:2 入場人數：75,389 （約 4000 名作客球迷） 門票：25€ 更多相片
自從近年傳出米蘭有計劃興建新球場，我地就將米蘭放係其中一個必去地方，好在遇上武肺佢地都將計劃延期，終於成功今年去見識下足球球迷其中一個必到既朝聖地方。
其實今次係我第二次黎朝聖，第一次係十年前睇 AC 對祖雲達斯，比賽場地係 San Siro 聖西路球場。今次黎到係睇國米主場，叫 Giuseppe Meazza 球場（好似係譯做梅亞查），，就好似哈林同庾澄慶咁我成日都分唔清楚。 好簡單： 兩隊波係共用同一個球迷做主場，但佢地各自對自己既主場又唔同稱呼。 球場位於米蘭既 San Siro 地區，所以原名係叫 San Siro，亦都係大眾所認識既名。 後來球場改名為 Stadio Giuseppe Meazza 用黎記念呢位曾經為意大利贏過兩次世界盃既名宿。
我由細到大對意大利足球都無咩興趣，所以一直都無研究相關歷史，只有一般見識。 不過係球迷文化方面，意大利絕對係一個聖地。 如果你曾經有睇過球迷文化相關既資料應該有見過 Ultras 呢隻字。 Ultras 可以解一種文化、一種球迷、一個組織… 唔係只係一個普通既「打氣團/文化」，內裡有好多含意，而內裡既含意唔係係 wikipedia 或者 YouTube 就可以感受或者理解到。Ultras 一詞源自意大利，但呢種「打氣文化」係更早既時候係南美或者東歐已經出現過。 德國大部份既 Ultras 組織都係係 90 年代成立，而今場波主隊國際米蘭既組織 boys San 係成立於 1969 年；啲創會成員可以做得我爸媽！好多德國球迷就係當年去意大利見識下佢地既文化然後順便偷下師學下野，將佢帶返去發揚光大。
而我都係無意中接觸到呢種球迷文化，呢個氹就愈踩愈深，再加上係德國好多人會寫足球遊記分享下佢地係世界各地見識到既人事物。呢種足球遊記唔係 d KOL 寫十個必到景點嗰啲，亦都唔係我寫既呢種… 我知香港無咩人睇所以好多都係輕輕帶過就算，當係我既日記保存下。 佢地寫既係會翻查哂球隊、球場同球迷組織既歷史，甚至會嘗試聯賽球迷組織既人交流下，然後結集成書 “Fan-zine” 向同好分享。有啲可以就咁上網買到，有啲就係社交媒體上面主動問你有無興趣，有啲就要識人搭路先買到。成件事好 old school 但呢個亦都係球迷文化其中一個重要元素。
好啦講返米蘭，十年前我仲未對球迷組織有太多認識，知道佢地會放「煙花」，唱下歌 fing 下旗咁，記得嗰陣係球場門口係咁比佢地啲響炮嚇親，然後係場內係我記憶之中最嘈最大聲既一場波，係完左場對耳都仲係嗡嗡聲好似係演唱會企正係個喇叭前面咁。仲有記憶最深既係嗰條永遠唔會完既樓梯，行到想死！！ 今場波我地仲要坐係第三層，要行幾耐？？
我地星期五朝早由法蘭克福出法，機程一個鐘都唔洗就到達米蘭 Linate 機場。 米蘭有三個機場， 一個係 Malpensa，離米蘭 50 分里、第二個係 Bergamo，離米蘭 70 公里，然後就係 Linate，離米蘭市中心 8 公里。 最煩係條地鐵線仲未開通，要搭 73 號巴士搭一個鐘左右先到米蘭市中心再轉地鐵先去到我地既酒店。
由我地間酒店搭地鐵 5 號唔洗十分鐘就去到聖西路球場站， 不過因為太近球場站所以我地差啲上唔到車，要好以係北京咁撞開啲人塞入去（係意大利唔洗同人講禮貌的，反正都做啲乜佢地都會口upup），見到有位就攝入去就得。迫左六個站終於可以落車，跟住人潮出閘之後上到地面仲有另一道閘，用來係賽後控制人群。 5 號線 2016 年先開通，我都記得我黎嗰陣條路無咁靚，爛地黎仲落毛毛雨，嗰陣我攝係啲人中間係其中一間小食店前睇 F1 巴西站直播，個個支持法利拉既阿朗素，得我一個暗地裡支持 Vettel。 今次重回舊地，啲小食店好似都仲係一樣，有一兩間都仲有電視。
係意大利買波飛係實名制，而且入場前保安係會認真咁查你身份證，不過安險就好輕鬆。 我地入閘時咁岩啲作客球迷到場，佢地唱住歌入場，好正～～～ 德國啲球迷組織既成員好多後生仔好血氣方剛咁，而意大利就好似咩人都有咁，好難分得出佢地係咪真係組織成員。 不過呢，我地聽人地講某啲意大利組織係有衣著要求，例如只可以著某幾個牌子既著幾款衫褲鞋襪咁，唔似德國咁著底衫都可以埋到堆。
聖西路球場外圍有幾碌大柱可以通上去看台既第三層，呢一層係為左世界盃先後來加建，而加建既看台係同球場原體唔係連埋一齊既。 上到去最頂嗰層就會見到第二層既最後同第三層既最前都有塊好高既玻璃，就係防止有 on9 仔諗住爬過去然後唔小心跌落街。 無論係國米同 AC 主場出戰都好，作客看台都係第三層。 我地睇住啲羅馬球迷唱住歌咁行上去，到咁上下我地都搵返自己個入口行上去，圈左十幾個圈行到好頭暈！！ 上到去仲要再行上多幾行，穿過好多人先埋到位。 第三層得三面看台，我地望住米蘭大教堂方向可以睇到米蘭靚景！
等到球員入場時，兩方球迷就開始唱歌同放煙助興，雖然聲量唔夠我記憶中咁強，但場內所有球迷既歡呼聲大聲到我地連球證吹左雞開波都唔知，淨係掛住兩頭望。 開波無耐 Dzeko 入左球波後來比球證判唔入我地都係過左好耐先發現點解仲係 0:0？ 原來我地唔係又miss 左中場開波，而係球證吹返輚頭由羅馬開死球 ._. 唔怪之得班羅馬球迷無啦啦係度慶祝。
主場球迷係我地既左邊北看台中層，作客球迷就係我地右邊既上層。 如果係 AC 主場的話咁主客球迷區就會調轉。 諗返起三年前法蘭克福曾經帶住過萬名球迷到場作客，企滿哂成個第三層看台一定超震撼。 相傳就係班法蘭克福球迷係第三層跳住打氣，令到米蘭發現個球場原來已經好舊同埋承受唔到啲咁多癲佬一齊係度跳所以市政府先拿拿聲落實起新球場既計劃。班羅馬球迷係無鼓聲帶領節奏之下都可以唱同一首歌唱足幾分鐘，有時甚至仲大聲過主場球迷。
係意大利睇波好大機會會見到佢地放煙，但佢地通常一撻著枝煙或者閃光燈就會掉落地下，唔似其他國家既球迷會拎住係手。dum 左落地下啲煙好快就撞散哂，視覺上睇黎就麻麻地。 國米第一球雖然食左詐糊，但去到第三十分鐘都係先由佢地開齋，唔夠十分鐘羅馬就追和左。 下半場由個前獌埋齋助羅馬反勝完場。
完場後我地留係球場一陣聽下羅馬球迷慶祝，佢地被困係場內等主場球迷走得七七八八佢地先可以離場。 我地出去之後就係小食店買啲野食，然後買左支係意大利必飲既咖啡甜酒 Borghetti，一邊等班作客球迷出黎。 完場後大約一個鐘終於見到佢地出現，睇住佢地一路唱歌一路行落黎，行左成十分鐘先到地下！！！ 睇多一陣就搭地鐵返去酒店休息下… 第二朝一早要出發去 Bergamo 睇另一場波！