17.09.2022 德國足球丙組聯賽 第 9 週 Hallescher FC - SV Elversberg Kurt-Wabbel-Stadion 賽果: 1:3 (1:1) 入場人數： 5650 （ 50 名作客球迷） 門票： 14€ 更多相片
今個星期我地跟 SVE 去東德作客，希望可以繼續見證球隊創造歷史。 剛剛過去嗰個星期我地大炒升班熱門 1860 慕尼黑升上榜首，佢地早我地一日係主場出戰贏波，經個九個比賽週末後射入 22 個入球成為德丙最高入球紀錄，但佢地既球迷已經即刻話： 睇下聽日 SVE 會唔會即刻再破紀錄先啦。
作客球迷巴士係比賽當日朝早五點半出發，我地選擇由法蘭克福搭火車去，需時三個鐘快過揸車好多！最重要係搭車去可以飲酒飲足一日唔洗擔心～ 有 road trip 我地一定會去麥當勞買早餐食，不過呢度既麥當勞早餐最近停售薯餅…. 本來以為得一兩間缺貨，但而家睇黎係全線停售，比曲奇餅取代左 -_-
拎住袋早餐行去月台等上車，咁岩有架火車剛剛到站，但係架車停左係度唔開門。 以為佢等緊由 Stuttgart 開出嗰架黎合併做一架車先開門，五分鐘之後突然開咪宣布我地班車會改由另一個月台開出… 全個月台既人即刻鬧住跑去新月台。 頂你真係 Sankiu for travejling wit Deutsche Bahn! 好在上左車之後搵到位坐，但係班車已經遲左十五分鐘，我地要 Erfurt 轉車，已經遲左十分鐘！更加嬲既係上左車先發現麥當勞比少左一塊曲奇！！！ 好在架車中途成功追返啲時間，令我地可以轉到車去 Halle。
落車之後第一感覺係：好 q 凍呀！！！！ 睇左天氣預報我知得 13 度左右以為自己著夠衫，但呢度超大風凍到入骨，不過無落雨已經好感恩。 我地係市中心兜左個圈之後就行去球場。 SVE 係 2013 年升班時已經黎過呢個球場，不過今次係我第一次黎。 個球場外面仲有一個舊石圍牆，佢地保留左舊建築再係圍牆內起左一個好簡單既四方形球場。
入場後一見到既係小食亭，佢地賣既係烚腸 (>_>)、凍既炸豬扒包 (>__>) 同埋魚包 (>___>)。 本身其實好肚餓但見到個餐牌之後即刻無左胃口….. 拎返食剩嗰塊麥記曲奇同我包 Manner 威化餅算。入到看台就聽到主隊好好咁係度介紹今日既作客球隊，原來我地而家係德丙有史以來成績最佳既升班馬～
咁我都係度介絕下呢隊來自 Sachsen-Anhalt 既球隊。 HFC 多年來既戰績平平，東德時期大部份時間係中遊徘徊，盃賽都無咩機會贏過。Sachsen-Anhalt 係德國其中一個州份，我識既城市只有 Halle 同埋….. Magdeburg。 搭車唔洗一個鐘就已經可以去到鄰州既 Leipzig。 隊波 Hallescher FC 係東德時期叫 Chemie Halle。 睇個名就知呢個城市係以咩工業著名： Chemie，化學工業。 班球迷現時仍然會以 Chemie 黎稱呼球隊，而佢地其中一個死敵係 Chemie Leipzig。 如果兩隊波對戰時佢地係咪會係咁鬧 Chemie?
作客球迷今場得幾十人，對比其他德丙球隊黎講我地可以話係一個笑話。 好在我地有班球員幫我地出一口氣。 一開波我地已經好唔客氣咁係第四分鐘入左第一球波！ 當我地以為今場波會好輕鬆既時候，主隊憑住角球機會射入追和。 呢個時候佢地團火開始黎料，係上半場迫得好勁令我地班球員係咁甩波，然後造到好多有威脅既攻勢，令到我地都開始擔心今場可能係惡夢既開始！ 我都唔明點解見到人地咁迫法都仲咁有信心黎咁多短傳想點？ 但同時見到班球員一甩左波唔係呆左，而係會即刻回後補救都算係咁。
上半場尾段我地既神射手 Schnellbacher 受傷離場換入左 Koffi，救神拜佛希望傷勢唔嚴重！！ 下半場開波時，領隊已經作出另一個調動調整中場部署，同時對方亦都換入左兩個球員。 真係唔知係我地領隊英明定對方領隊換錯人，下半場主隊慢慢我勢，主導權終於去返 SVE 度。
轉會窗完結前我地成功由不萊梅借到高佬 Woltemade， 佢又高又瘦以為佢係好似高治咁既類型，見佢帶波入到禁區時硬係覺得佢好易會訓低，但係佢好硬淨反應又快對腳又長。 有幾下見到佢甩左波一轉身隻腳就可以係人地腳下篤返個波走 😀
去到大約六十分鐘，我地龍門開死球。 心諗，對面企到咁前你仲開短？？ 唔夠兩腳個波又傳返去龍門度，對方球員越迫越前，但係我地仍然一腳一腳咁傳上去，個波由一個球員彈去另一個球員，幾腳波之後個波突然去到前場，有人即刻話： 係呢下啦，我地要入波啦！！ 然後個波由右邊去到左邊，再將個波由左邊送到入禁區，頭頂被龍門救出。 企係十二碼準備執雞既係 Rochelt，一射入網令我地再次領先！ 個組織完美到一定要用入球黎完成。
跟住去到七十分鐘左右，龍門大腳送個波去前面， 個波仲彈緊幾米高既時候 Koffi 嘗試控個波落黎，落左腳之後有幾個紅衫望住佢唔比佢有機會轉身，呢個時候唔知 Feil 係邊度彈出黎順腳立走左個波就射入今場第三球。 我後來睇返重播睇左幾次先睇得出個波點樣無啦啦去左 Feil 腳下，頭兩次我以後 Koffi 又咁得戚用後腳傳波，但無論係 Koffi 用腳踭定 Feil 好準確咁偷波都係要嘩一聲！ 到底班球員食左啲咩可以合拍到咁？
就係咁，我地再一次作客贏波，拎三分繼續坐係榜首。 睇返上季開季我地連輸三場踢得好差，但再睇返全季成績我地其實一直都踢得唔錯。 係聖誕之前作客 Offenbach 輸三球之後我地就再無作客輸過波，帶到黎今季我地仍然係德丙作客表現最佳既球隊。 今場波其實我地踢得麻麻地，但仍然入到三球波，仲要有運。 無諗過由開季以戰戰兢兢既心情去睇波去到而家每場對隊波愈黎愈有信心，要護到級就要最少拎到 40 分，去到第八場我地已經拎左一半！
係唔同網站上面好多人都開始問呢隊鄉下波係邊度彈出黎，到底點解可以踢得咁好，問我地係咪好似賀芬咸或者萊比錫咁有金主課金，大部份球迷都知我地唔係有錢隊所以都鄧我地開心。 隊波的確係有一個有錢人做主席，同利華古遜一樣係藥廠，但我地既主席無無限既金錢，佢仲講到明係有成績先可以有收穫。 例如 SVE 主場都係 13 年升到班先開始有得升級，降班之後佢都係話有成績先可以繼續擴建或者升級，所以我地個看台等到今年再次升班先話會加建上蓋。
賽後我地返去市中心度食飯，然後就搭三個鐘車返屋企～ 下個星期係國際賽週末所以德丙會暫停一週，我地都終於可以有一個星期六係可以慢慢行超市入貨！