10.09.2022
德國足球丙組聯賽 第 8 週
SV Elversberg - TSV 1860 München
Waldstadion an der Kaiserlinde
賽果：4:1 (3:0)
入場人數： 6138 （約 1300 名作客球迷）
門票：10€ （企位）
更多相片

上星期作客和波後提醒我地唔好離地，要用平常心返主場迎戰今季暫時仍然不敗既 1860 慕尼黑。 老實講，輸波我就當然唔想啦，但如果和到波就更好，所以我賽前估波係 tip 左二比二。

夏天最近慢慢完結，但迎接秋先既係雨季… 呢幾日係屋企既時候有雨落係好開心既，起碼即係涼返好多唔洗再熱死。 但淋住雨睇波…. 球會本來又話開季前會起好個上蓋，然後又話貨期延遲左但雨季前會搞掂。 而家落左第一場雨啦！ 不過無諗過去係，落咁大雨都有超過六千人入場。 未升班之前如果比賽日係咁既天氣的話應該得幾百人入場…

一入球場就見到班作客球迷係度準備緊 choreo，我就搵個靚位準備影相。等到球員入場，天公造美竟然停雨，60球迷就打開佢地看台前既藍白大字報： Every day and night – in my heart deep inside。 龍門後既看台分成四小區，由左起一區球迷舉起藍白色既氣球、旁邊就有一班球迷舉起球隊頸巾、然後就有一班球迷揮動藍白旗幟，最後就要等佢地倒數 3 – 2 – 1，向天撤出藍白碎紙，同時放出藍白煙。 好靚！！！！ 好耐無係呢個球場見到 pyro！

我就留係 C1 既角落頭想聽下對方既氣勢先！ 人地以暫時不敗姿勢黎挑機，班球迷超積極打氣去比力量佢地隊波。 不過，開齋既係我地！！！ 十二分鐘我地就已經領先一球，但係領先一球先最危險。 60 今季都試過反勝或者最後絕殺，睇得出佢地啲球迷完全唔擔心。

但係去到 27 分鐘，我地射入第二球波。 第一下係接近底線位見到對方球員比我地撞跌左，然後係龍門出迎之前頂左個波入網。 入網個個都 yeah 左一下先但又驚會比球證吹返轉頭，過左一秒見球證無反應大家先夠膽去慶祝！！！60 既領隊即刻叫哂所有球員去brief 策略搵辦法追返場波。

幾分鐘之後我地係禁區比人拉跌搏到十二碼，射入第三球！！！！ omgomgomg 我想話去到呢一刻客隊係一啲威脅都無，完全無機會埋門。 去到下半場我地繼續 chur 住去，對方搵到一個機會追返一球… 但比球證判左越位食詐糊。 旁證後面既球迷超嬲係咁擲杯落球場， 後來係電視睇返先知點解啲球迷咁嬲，因為個旁證係盲的，勁明顯無越位喎！！！ 難怪啲球迷個個鬧爆球證。

第 70 分鐘我地射入第四球，天呀，呢隊波到底係咪我地睇開嗰隊黎？ 上季明明開季連輸 n 場去到季中都無諗過可以升班。 而家上到德丙場場都踢出水準，我地真係就黎飄上天！！即使 1860 已經輸到第四球，佢地班球迷反而豁左出去玩得更加開心，唔間中再放下煙，又將看台分成兩邊對唱。

而我地既看台多左好多後生仔聚埋一齊唱歌， 我地要趁呢個時候吸納更多新血。 希望多啲後生仔會一齊黎為自己鄉下隊波打氣！ 最後由客隊射入佢地唯一一球埋齋。 我地以較佳得失球差壓過慕尼黑獅子升上榜首。

完場後我地上網睇下啲人點講呢場波，好笑啲人雖然嬲個球證，但又無人話係黑哨， 佢地都認同今場係因為踢得差而輸波，只係投訴球證既執法水平。 下場我地要去東德作客，對方今季踢得麻麻，希望我地可以乘勝追擊搶多三分！

突然間，我地成為升班熱門。但係德丙總共有三十八週，今場波只係第八週！ 岩岩講過上年呢個時候明明踢得好差無諗過有機會升班，同樣我地而家踢得好唔代表全季都可以光芒四射。 所以我地希望可以保持水準，唔好失啲不必要既分，目標係護級成功！

中秋節大快樂！