03.09.2022
德國足球丙組聯賽 第 7 週
Marschwegstadion
VfB Oldenburg - VfL Osnabrück
賽果： 4:3 (1:2)
入場人數： 8222 （1500 名作客球迷）
門票：22€
更多相片

今季第三週本來我地係作客 Oldenburg 既，但賽期定左係週中，而 Oldenburg 位於西北部百無地區，所以最後只可以係電視睇直播。 但我地又唔憤氣唔想錯過 Marschweg 球場，因為佢地個球場無射燈，即係唔可以進行夜賽… 所以佢地要用超高價租流動射燈同時要搵辦法安裝射燈。 過多一兩場波佢地將會被迫要租用漢諾威既主場，相差超過 150km!! 好好彩今個星期 SVE 要作客 Meppen 既前一日 Oldenburg 都有主場，仲要係打北戰對 VfL!

我地朝早七點鐘出發，沿路經魯爾地區再向北上最後一點前到達 Oldenburg。 由停車場行去球場只需十五分鐘。 今次係我地第一次黎西北部，你開地圖由漢堡打直畫一條線，然後係多蒙特畫條橫線，就係呢個西北部正常無人會去 ._. 今次終於算係正式踏入呢一區。

嚴格黎講我都有去過 Osnabrück 既，但嗰陣只係朋友帶我去佢朋友度借宿一晚… 然後訓左三四個鐘又要起身去球場跟佢地一齊搭球迷巴士南下作客，搭左七個鐘…. 我第一次「作客」既經歷～ 就係嗰次之後我先開始覺得其實去小西灣都唔係去遠…. 隊波最近仲有大豬 Tobias Schweinsteiger 成為領隊，第一仗就係作客 Oldenburg! （你話如果係小豬你話幾好呢，我一定會賽前去追星….）

今次就係第一次日頭見到呢個地區既風景，好多紅磚屋好靚！！！ 同埋呢區係平原所以好多人都會用單車代步。行去球場時要係咁讓路比單車！ 去到球場門口我地好醒咁行去一個遠少少既入口避開人群，好快就入左場，買咖哩場同薯條去看台食。

Oldenburg 地區好多人都係漢堡、不萊梅或者係漢諾威球迷。 如果你有望下個地圖既話就知發現呢個地區無咩大球隊。 就好似莎蘭好多人都係支持凱莎羅頓咁！ 去到而家自己既城市終於有一隊波挑戰下職業聯賽，好容易就聚集到好多球迷。

Marschweg 係一個運動場，草皮外面有田徑跑道，我地買飛時㨂左有上蓋既主看台，對面有企位看台，而右手邊彎位都有企位看台，其中一半分左黎做作客區。 我地入場時，紫色既 VfL 球迷已經企滿哂熱身等開波。 佢地一開聲…. 我地主看台呢邊有好多卧底勁厚顏咁和應一齊唱。

球員進場時，班作客球迷放左一陣紫煙，好開心好耐無見過咁靚既 pyro!!! 最好笑係我今日先講完唔記得有無見過紫色既煙，VfL 今日就放比我睇解開我地謎團 :-))) 成個球場都變左紫色～～

當我地仲沉醉係啲紫煙時，Oldenburg 第一個攻勢就已經入左波！ 但三分鐘後佢地既後衛多腳犯規送左個十二碼比客隊… 啲卧底無視所有主場球迷好開心咁慶祝。去到二十分鐘 VfL 再射入一球反超前。 我後面嗰兩個 VfL 係咁話呢隊波有機會可以再次挑戰升班。

暑假知道北部地區聯賽既升班馬係 Oldenburg 之後， 我以為佢地只係啲蚊型球隊無咩球迷。 後來係電視先知原來佢地都有球迷組織。 Oldenburg 有兩隊波 VfB 同 VfL，而升班呢隊係 VfB 只係老二，都有咁多球迷入場支持！ 可惜既係上季季尾佢地既球迷組織突然宣布話唔會再以組織名義黎組織打氣，看台前只會掛上球隊大旗。 所以而家係球場見到既只係大大隻字寫住 OLDENBURG。

下半場一開波 VfL 即刻入多球拉開比數到 1:3，但 VfB 反而踢得越黎越放，兩分鐘後反擊追返一粒。 睇得出佢地唔想輸波，十分鐘後再次追和。 然後完場前十五分鐘射入第四球收客隊皮，贏得三分！我地呢啲花生友睇得好開心，反超前再反超前。我地後面嗰兩個卧底最後話我一早都話我地今年可以要護級架啦，踢得咁差點同其他隊爭呀！！

完場後我地就去左酒店休息一陣，然後就出去市中心行下，周圍影下啲紅磚屋拎下 idea～ 夠鐘就去河邊既餐廳食飯，有好多球迷都係度聚集！ 飲飽食醉後就返酒店～ 第二朝可以訓飽食飽先再出發去睇 SVE 🙂