04.09.2022
德國足球丙組聯賽 第 7 週
SV Meppen - SV Elversberg
Emslandstadion
賽果：0:0
入場人數： 6471 （80 名作客球迷）
門票： €11
更多相片

呢個比賽週末我地跟 SVE 到西北部近作客，原本諗住如果場波係星期六既話，星期日就會去荷蘭北部睇另一場波。 後來賽程定左今場波係星期日，咁我地就留返係德國，係西北部睇兩場波。

我地係 Oldenburg 過左一晚夜之後，係酒店食埋早餐就出發，只需大約個半鐘車程，十二點就到達 Meppen 球場外既作客停車場。 球迷巴士今朝五點半由 Elversberg 出發，車程要五個半鐘，佢地架巴士早我地大約三個字就到左。大部份人已經買左飛入場，我地算係最後兩個入場。

售票姐姐問我地仲有無搭巴士黎既人，原來佢地本來只預先印左十張飛 -_- 大佬… 球隊公佈左會有球迷巴士黎作客架喎， 成得團都起碼三四十個啦！ 洗唔洗咁睇唔起我地….

Meppen 同 Elversberg 差唔多都係一個邊境鄉下地方，我地近法國佢地近荷蘭。 不過佢地既球隊歷史就成功過我地， Meppen 曾經長期係乙組打滾，所以都儲落有一大班球迷長期入場睇波。

賽前睇天氣預報話得 22 度仲會有大風， 咁尋日係 Oldenburg 24 度大風之下係幾涼爽既，諗住今日應該都係差唔多。 點知個太陽愈黎愈猛，就算有層薄雲係太陽底下都擋唔到啲乜，反而令到個天氣更加焗。 開波前個個仲有 motivated 所以無視左個太陽。

呢個球場好簡單，四邊單層看台，主隊既球迷組織企係後備席嗰邊既看台，並唔係大家常見既龍門後面。 佢地既球迷看台企得唔多人，但佢地將個細區企到滿哂所以望落都好有氣勢。 我地今日架巴士唔係普通旅遊巴，而係雙層旅遊巴，加加埋埋都有 80 個球迷隨隊！2013 年第一次升班時，跟隨球隊去遠征既只有小貓三四隻。 去到而家每場作客賽事都可以成團出發真係好感動！

等到球員入場時，雙方球迷都開始出力打氣。 由開季到而家我地一直比人讚踢得好好，但我地都唔敢比自己離地。 對方早兩場先大炒升班熱門 Mannheim 六球波，如果我地唔企穩陣腳我地都可以會比佢地收皮。 開波後我地好快有一次攻擊， SVE 前場球員既默契真係唔錯，好多下可以幾腳就帶到個波入禁區，可惜對方龍門上身救哂我地既射門。 球王 Koffi 呢排自信心爆棚，但佢今日係賓迪基球王，勁輕佻咁了起個波想笠過人地個頭，然後又勁獨食，睇到勁嬲！！！但同時佢搶迫又做得好好，好多下都係靠佢迫甩人地個波然後搶返個控球權返黎。

不過我地要既係入波，好在領隊 Steffen 都睇得出，半場就已經即刻作出兩個調動換走左 Koffi。 我地上半場唱左十五分鐘左右就已經無氣力再唱落去，真係好焗。然後明明人地後防係咁犯錯我地都把握唔到機會。 個感覺好似係要睇邊個有運行可以負碌入到球波就贏到….我地有一下個波方左黎後防，然後差啲笠死自己個龍。 然後我地射門又中楣頂彈出…. 所以一分真心收貨，仲成功保住第二位。

下個星期會係主場迎戰榜首 1860 慕尼黑，認真，今場和左係好事。 如果唔係下場一定壓力超大，又或者個個又有啲不切實際既期望然後接受唔到輸波咁。

完場後我地要開四個鐘車返去法蘭克福，沿路睇足總盃第二輪抽籤。 睇 Twitter 見其他球隊問啲球迷最想或者最唔想抽中邊隊。 有好多球隊都話唔想抽中 SVE，笑死！！！ 最後我地抽中左德甲既波琴～～ 啲球迷好大反應話，下咁快就要對我地下季既聯賽對手？？？ 😀