27.08.2022
德國足球丙組聯賽 第 6 週
SV Elversberg - SV Waldhof Mannheim
Waldstadion an der Kaiserlinde
賽果： 1:0 (1:0)
入場人數： 5181 （約 1300 名作客球迷）
門票： 10€
更多相片

過去兩週主場大炒 Zwickau 同作客輕取 Dynamo Dresden，錯過左呢兩場精彩賽事之後，我地終於返到德國可以繼續跟隊波出戰德丙。賽前 SVE 四勝一負，入球差係 16:7，好多人即刻開始關注隊波！ 玩估波我求奇估 4:3，因為今日既客隊都入左好多波既同時失左好多球。 後來我地話：我估最後應該得一個入球。

一早由法蘭克福出發去莎蘭，沿途係公路休息站見到唔少作客球迷同我地一齊上路。 賽前大約一個鐘到球場，睇住個看台慢慢多人。 今次我㨂左企係看台最頂，可以飽覽作客球迷區，同時可以聽同睇哂兩邊球迷既打氣氣勢。

我企係班球迷既後面，所以主場打氣聲比較細聲係正常。無諗過對方既聲勢都只係一般般，我已經算係係一個比較安靜既區域都唔覺得對面既聲音有幾震撼。 對比起上場對 FCS 時，我企係球迷中間都仲聽到作客球迷既聲音真係有分別！

SVE SVW 對戰係地區聯賽通常都係榜首之爭，所以每場都聚到好多球迷。 黎到丙組我地對 SVW 黎講應該唔再有啲咩特別，唯一一個好處就係車程比較短囉～ 我地既往績係輸多過贏，今場波我地繼續以護級心態黎睇，係強隊身上搶到一分就當贏波。

開波後，SVW 即刻搶住黎攻，造左幾個有威脅既攻勢。 比佢地玩左廿分鐘左右我地班球員終於開始上腳出力。去到近完上半場時，我地有一次攻擊由半場造上去，四腳短傳之後個波落左去球王 Koffi 腳下，佢借勢一射個波就入左網！！！ 不過佢無慶祝，因為佢係 19 同 20 年曾經為 SVW 效力，SVW 啲球迷都好中意佢。 無諗過今場波同季前最後一場熱身賽一樣，係 Koffi 為 SVE 射入唯一入球～

下半場我落返去看台中心，唱下歌傾下計～ 直覺話我知今場波應該唔會再有入球，特別係我地個門神 Kristof 繼續上哂身撲哂所有向佢飛過去既波，令我地完全唔覺得有危機感！ 去到最後五分鐘我地有球員兩黃一紅離場，但都幫唔到客隊啲乜。 就係咁，我地六戰五勝一負企係第二位！

下星期我地又要遠征去北部作客 Meppen，然後下次重返主場就要迎戰榜首既1860慕尼黑。 都係嗰句，希望我地可以一直保持水準，有穩定既發揮。 贏一場就開心一場，最重要既目標係留係德丙累積經驗！