17.08.2022 英國足球冠軍聯賽 第 4 週 西布朗 對 卡迪夫城 The Hawthorns 賽果： 0:0 入場人數：21,820 (1742 名作客球迷) 門票：25£ 更多相片
去得伯明翰就當然要睇下附近啲大球會，維拉一早去過，早幾個月去左睇伯明翰城，今次就到西布朗！ 今次佢地既對手係卡迪夫城，咁岩有一位來自倫敦既香港朋友會跟卡迪夫城黎作客，我地就相約在伯明翰一齊食個飯再出發。
呢幾日我地都要 wfh，早一晚睇完 Burton 返到去已經十一點，返到去即刻訓覺第二朝又要一早起身，早開工先可以早收工！ 我地四點左右收工，等朋友黎到我地先去食飯，然後就搭電車去 West Bromwich。 等左咁耐終於可以搭電車！！！ 但個買票 system 好弱智。 車站或者車入面無售票機… 係有一個人由車頭行去車尾，你等到條友行過黎同佢買飛就得。 好彩既話佢未行到你度就要落車，咁就可以免費搭車。
由伯明翰市中心出發只需半個鐘左右，我地先跟朋友去到作客球迷 Pub。 去到門口覺得好唔對路，個個著住西布朗衫既！ 朋友要拉埋件褸收埋佢件卡迪夫城波衫先入去… 到差唔多時間我地就行去球場，大約十五分鐘路程。
去到作客區門口先同朋友暫別，我地就要兜大圈去球場另一面拎飛。當時仲有半個鐘左右就開波，但我地前面有幾十個月係度排緊隊…. 排左二十分鐘終於拎到飛。 我地個入口其實係作客區旁邊，好好彩趕得切係佢地落閘之前穿過作客門口行去我地個入口。 到我地埋到位仲有五分鐘先開波！睇英國波既好處就係開波前無野好睇唔會 miss 左啲咩。 但如果我地遲多兩分鐘就會 miss 左移動熱水爐係我地面前經過，笑死！！ 第一次見有球隊用死物黎做吉祥物～～
係英國睇波其中一個體驗就係看台同草皮既距離。 今場波我地坐係第四行，係後備席附近，呢個視線角度係德國好少有！ 作客球迷就企係我地既右邊龍門後面，同主場球迷分隔開。呢兩班球迷幾乎唱足全場，來自英格蘭既主隊向住班威爾斯球迷唱 God Save the Queen，後來聽說卡迪夫城既球迷唱歌話等女王死後要慶祝。 （唉，估唔到唔夠一個月後女王就走左。。。）
我曾經有過一件西布朗波衫… 所以要我㨂既話我會希望佢地贏既！ 不過… 係我地最後一場英國波，送比我地既係兩隻雞蛋，無入球！四場波加埋先得三個入球… hello？同時 SVE 呢個比賽週踢左兩場波總共有十個入球囉!!
完場後搭電車返伯明翰，返多兩日工終於等到 Weekend，不過今個週末無得去睇波，因為星期六要去 Leeds 一日遊參加朋友既婚禮！同日細佬同朋友係芬蘭過左黎，一家食左餐飯同埋係伯明翰做下遊客；星期一就返德國lu. 雖然英國好多好野食，但過左兩星期之後我好掛住 Schnitzel 同薯仔！！ 返到德國就要開始忙住跟 SVE 出走全國～～