16.08.2022
英國足球甲組聯賽 第 4 週
Burton Albion FC – Ipswich Town FC
Pirelli Stadium
賽果： 0:1 (0:0)
入場人數： 3562 （約 1500 名作客球迷）
門票：22£
更多相片

八月既英國之旅本來只係諗住去倫敦，但因為朋友結婚所以改機票留係英國多一個星期，然後順便去伯明翰探屋企人。 星期一晚由倫敦搭巴士上去，車費只係 8£ 搭三個鐘直通！ 第二朝仲係放假諗住可以大覺訓， 點知啲仆街海鷗天未光就瘋狂9叫，叫足一個鐘等全城既雀同人都醒哂先肯收聲！

好嬲咁醒左就出左兜左個圈，睇下我地未去過既地方，然後再同屋企人出去飲茶。大約三點我地就去火車站搭火車去 Burton。 唔係有波睇應該永遠唔會識同埋去呢個地方！ 火車車程唔洗半個鐘，我一上車就恰著左，最後訓左成個鐘竟然都無 miss 左個站。 架火車開車無耐就停左係度話要比兩架貨車爬頭，停左係度半個鐘… 其他人好嬲但我因為真係熟睡左完全唔知時間… 到終於落車嗰刻個人都係仲係飄下飄下咁。

個車站乜都無，係有好多指示牌教你點樣去國家森林度郊遊行山。 一出左車站就見到一間大型工廠； 係我地決定去 Burton 時都有做過啲資料搜集睇下呢個鎮下有咩好做，發現原來 Burton 係一個好重要既釀酒業城市；現時仍然有八間酒廠以 Burton 做基地。

我地行去市中心時經過一間酒廠既門口，個門口印左佢地旗下既啤酒牌子，然後有少少 my life is a lie 既感覺。 例如原來有隻捷克同波蘭啤酒都係來自 Burton ._. 唔知係咪英國買到既先係佢地造既呢？ 早兩日係倫敦飲 Asahi，佢既製造商係意大利既 Peroni。 即係係香港飲既 Carlsberg 其實係來自青島咁。 Ok, 好在我飲 craft beer 唔洗理太多呢啲咁複雜既商業關係。

當日係星期二下午，市中心無咩人，個天又陰陰地想落雨咁。 行左一陣就去左一間 pub 度試下當地既 microbrewery， 英國既啤酒出名唔凍同無泡，如果真係一款釀得好既啤酒我真係無咩所謂，但試左幾款都真係麻麻地。 坐左差唔多兩個鐘，我地就行去球場。 由市中心行去要大半個鐘當做下運動～

離遠見到一個大肚腩 logo 好得意。 Burton Albion 既別名就 The Brewers，會徽係一個有啤酒肚既肥佬踢波～ 係 fan shop 買左條經巾後就先入場，因為落完雨又入黑開始愈黎愈凍。 當時仲有個半鐘先開波，球迷入得球場但看台仲未開， 個個都係入去買野食吹下水先。 我地都買左兩個好hea 既漢堡包（兩塊包夾一塊漢堡扒同芝士，一塊蕃茄或者菜都無），配薯條同一杯local brewed Carling，加埋 10£ 都唔洗超抵食！

開賽前一個鐘個看台終於開門，一入到去個感覺好似去左柏林聯個主場咁！ 我地呢邊係座位看台，其餘三邊都係企位看台，係英國應該算罕見。另一樣驚訝既係葉士域治既看台竟然企滿哂！ 我地左邊既龍門背後就係主場球迷打氣既集中地，遠睇佢地應該係一大班後生仔，雖然唔係全場無間斷咁打氣，但佢地一出聲就可以唱好耐。 到客隊領先一球之後佢地唱得多左，然後就話呢度係圖書館。 Brewers 球迷回應：你咪又係贏波先會出聲唱歌…

完場後我地行返大半個鐘返去火車站去伯明翰， 然後準備第二朝返工….