13.08.2022
英格蘭足球乙組聯賽 第 3 週
Leyton Orient - Mansfield Town
Brisbane Road
賽果： 1:0 (0:0)
入場人數： 6328 （ 536 名作客球迷）
門票： 20£
更多相片

係熱浪下我地要搭大半個鐘地鐵去到倫敦東部睇一場英乙，如果唔係因為一早買左飛我應該會寧願取消行程然後搵個冷氣地方度過呢一日。

一早我地去左 Wetherspoon 食早餐，要食英式早餐一係就要搵好多工人去既街坊茶餐廳，一係就去 Wetherspoon。 除非你要 d 好 fancy 既早餐，要有機蛋又要有牛油果咁，咁你可以去搵啲靚 cafe 比 15£ （未計野飲），或者去 Wetherspoon 有大中細份比你㨂，就算係倫敦市中心都只係 6£，熱飲任飲都只係加多 1.25£！ 食飽後行左一陣街就去搭移動焗爐去 Leyton。

本來諗住去 Leyton 前早兩個站落車去奧運公園行下，但真心驚會曬到個人溶左所以直去球場算。 穿過一個公園仔之後，眼前出現一個住宅區，有幾個出入口前有啲保安企係度查飛然後放人入去。 原來我地已經到左球場！

呢個球場既特別之處係佢同幾座住宅合二位一，有幾座樓既地下係停車場同埋球場入口。 球場四角都有四座樓企係度，有好多人企係露台同一班朋友一齊睇波。 入場前我地去 fanshop 買紀念品，後面有個阿伯係咁同我地傾計，話佢突登入黎買頂帽黎戴，如果唔係驚個太陽會燒爛佢個頭。

成個下午只想講一個字：好熱！ 坐低左之後大脾同座位夾雜住汗水…. 超嘔心！！ 英乙係英格蘭既第四級聯賽，即係同我地既地區聯賽一樣， 佢地球場細細都有超過六千人入場所以氣氛都唔錯。 客隊 Mansfield 來自曼市附近都帶左幾百人到場支持球隊。 我地坐係啲勁多野講既阿叔附近，好開心咁聽佢地吹水同鬧啲球員。

場上就無咩特別，感覺好似睇緊德國啲超低組別聯賽咁，無咩組織可言。 最後有一個入球都已經好感恩。 多得呢個入球班主場球迷先開始出力唱下歌打下氣，就連附近啲阿叔都間唔中唱幾句。同尋日場波一樣愈近完場氣氛就愈勁。

完場後我地又要搭移動焗爐返去市中心，去食鐵板燒～～～ 呢間鐵板燒係大學嗰陣朋友帶我去食，第一次食鐵板燒就係係倫敦，後來係東京食過覺得唔夠倫敦呢間好味 sosad 一直都想再返黎食！ 但我細個去嗰間係唐人街分店，而家執左得返間總店，位於大英博物館附近叫 Abeno。 好滿足咁返酒店坐一陣就再出去行下夜街，同去 Brewdog 飲返杯靚酒～

倫敦既睇波行程就咁完左，星期日我地約左好耐無見既台灣朋友去食鼎泰豐，然後去左遊船河，睇錯價錢以為 4£ 一程點知原來係 7£ ，都算係一個經驗黎既….. 係倫敦咁多次都未搭過船。 就係因為洗多左 3£ 所以最後決定由 Tower Bridge 行一個鐘返去酒店，咁就可以留返最後嗰 3£ 明天搭車去 coach station 上伯明翰！