12.08.2022 英格蘭足球冠軍聯賽 第 3 週 屈福特 對 般尼 Vicarage Road Stadium 賽果：1:0 (1:0) 入場人數： 19,225 （約 1000 名作客球迷） 門票：28£ 更多相片
本來計劃左上年去倫敦過聖誕，食返啲正宗港餐。 點知遇上第 N 波武肺搞到要改期，當然諗住改去暑假會比較穩陣。 等左大半年終於成行，出發前一直捕住啲倫敦球會想買飛睇下英超，唔洗講緊係買唔到飛啦！ 去下市郊睇下英冠都好。
上年十月訂機票同十二月決定改期時無諗過 SVE 會升班上丙組，諗住改去暑假開左季 miss 一兩場波都唔會蝕左啲咩。 點知呢個 trip 我地 miss 左既係 Zwickau 黎作客同我地作客 Dynamo Dresden！ Zwickau 場波都算，反正下半季可以去佢地主場。 但我地一直都想可以去 Dresden 睇多次佢地既 K-Block！！！ 唉，唔改都改左，好在隊波都生性兩場贏哂！
我地出發嗰日係倫敦熱浪既第一日， 係德國都係好熱，但室內同交通公具入面都還可以。 係倫敦落機後搭上 Underground… 已經開始覺得焗焗地。 好在我地今次住得夠市中心，好多想去既地方都可以行去。 我地日日都行去Soho 食飯，係倫敦最後我地一餐港餐都無食過，硬係覺得全國都係大陸人拎香港個名黎呃飯食，唐人街入面又勁多遊客唔想同人迫，最後食左幾餐烏冬～～
去到星期五比賽日，我地朝早先去左 Camden Market 行一個圈，然後返酒店抖下就行去 Euston 搭火車去 Watford。 去 Watford 主要有兩個選擇，London Northwestern Railway 火車或者 Overground。 火車就快好多只需大約半個鐘，搭 Overground 就要一個鐘。 不過因為天氣太熱既關係，有好多路軌都受唔到熱令到有好多 Overground 班次要取消。
我地好好彩趕到搭火車，一上車真係喊出黎。 室外 35 度，車箱內我估超過 40 度，好似行左入一個大焗爐咁！！！ 最嘔心係啲毛座位都係熱既！！！！焗左十分鐘之後終於開車… 但就算開左窗都唔會有啲咩涼風吹入車…. 開左窗仲食哂火車所有燥音，耳朵被轟炸足半個鐘！！！ 火車一到站即刻衝落車抖大啖氣，難得既新鮮空氣！！！
去到 Watford 我地去 Wetherspoons 食飯，食飽就穿過住宅區行大約二十分鐘到球場。 沿路經過一啲路邊餐廳仔，全部都企滿哂人。唔怪之得 Wetherspoons 唔係好多人啦！去到球場先去 fanshop 買頸巾，然後就入場去我地既 Sir Elton John Stand. 去呢場波最唔開心係佢無得 print 波飛，就連 e-ticket 都無，只會比人加張飛入 Apple or Google wallet ，係球場門口用 nfc 嘟電話入場。 （如果有人知有咩妙計可以問到球隊 print 正式波飛做紀念既話… 求下你話我知！！！
屈福特呢個名對大家黎講都唔算陌生， 以為佢都有啲歴史，睇返先知原來佢地係有 Elton John 做金主之後先開始有成績去到而家間唔中做下英超升降機咁。大半年後重返英國啲足球場，咁近球場草皮既感覺真好！
客隊般尼離倫敦要最少四個鐘車程，無諗住竟然會有一個差唔多滿哂既作客看台！ 兩邊既氣氛都有啲驚喜，有人用鼓聲間唔中帶領啲人一齊打氣。 呢個球場可以容納大約二萬二人， 英冠岩岩開季，驟眼望落個場都應該差唔多滿哂，所以氣氛唔錯。
主隊係上半場補時階段射入全場唯一入球，下半場一開始就已經開始守多過攻。 客隊狂攻但都過唔到對方個龍門。 場波即刻好睇左好多，兩邊球迷都睇得好肉緊！ 呢三分令屈福特升上今週既榜首。
完場後我地好快速咁行返去火車站，但得返 Overground 可以搭返返去 Euston，要搭一個鐘。 今晚十二點開始全英國既火車公司就會開始罷工，所以我地仲有車搭到返去已經好好彩！ 太陽落左山之後氣溫都即刻回落左好多，係條街度逗留左一陣先返去酒店。 下一日我地會去倫敦東部睇一場低組別比賽～