06.08.2022
德國足球丙組聯賽 第 2 週
SV Elversberg - 1. FC Saarbrücken
Waldstadion an der Kaiserlinde
賽果：0:2 (0:0)
入場人數： 7,237 （約 3500 名作客球迷）
門票： 10€ （企位）
更多相片

今季開波後，SVE 一連兩仗大炒對手成為一時佳話。 黎到聯賽第二場波，我地係主場迎戰同州對手沙布魯根，即係吸引左好多人買飛入場，好耐無試下比賽日之前已經賣哂所有門票。 我地同 FCS 唔算係咩死敵，只係人地州首都大球隊睇唔起我地呢隊蚊型球隊，但同時我地都有好多朋友係來自對方既球迷組織，場上我地係對手，場外我地有唔少交情。

賽前我地已經話之前嗰兩場我地完全無期望下，意外地有驚喜。第一場德丙同足總盃第一圈本來都覺得唔輸波都偷笑。轟轟烈烈咁贏左兩波後，雖然我地口講話唔好有咁大期望，但心裡面唔多唔少都希望（甚至覺得） 隊波可以繼續贏落去。

本來去到星期五我都仲係平常心咁對待，點知其他人係咁講起 FCS 自 2007 年起已經無係 Kaiserlinde 聯賽作客贏過波，同埋 SVE 係唯一一隊 2022 年不敗球隊。 我即刻話， PK 做乜要話我知呢啲紀錄….. 以我多年睇波經驗，一提起呢啲紀錄下場波就會即刻被破…….. 唉。 我地係拜仁既話我唔介意瘋狂提呢啲紀錄，但我地只係鄉下隊……唉！！！！！！！！！

雖然唔 gur 今場多左好多突然球迷，但始終佢地都係入黎撐 SVE 既，見到球場比之前少左好多藍衫同多左好多著 SVE 波衫入場都好感動！！！ 繼續有好多後生仔走到看台中間一齊企，有啲上半場都係望住啲大佬聽下佢地唱咩點樣跟拍子，去到下半場好多都放膽一齊打氣！ 希望呢個風氣可以維持落去～

今場波其實 SVE 踢得一啲都唔差，策略同組織方面同上兩場差唔多，兩邊造到好多空位攻上去；只係客隊踢得比我地更加好。 佢地既後防係完全零漏洞，龍門亦都上身救哂啲波。 去到半場我地已經覺得 0：0 都收貨。 可惜去到下半場我地先失一球十二碼，然後再比對方搵到多一個機會埋門入波。 就係咁，啲乜9紀錄比人破左～

輸波都好，起碼將我地拉返落地下。 唔好唔記得我地只係升班馬，唔好有咁多幻想！ 今季只要護到級同埋唔洗驚到最後一場打護級戰已經好感激。如果我地繼續可以保持呢三場波既水準，我都幾肯定我地可以護到級。 希望真球迷仍然繼續保持希望繼續入場支持球隊！！

黎緊幾場聯賽我地都去唔到，最唔開心係唔可以跟去 Dresden 作客 （好在已經去過，如果唔係會更加dum 心） 我地有個 short trip + 好朋友結婚（頂呀又係婚禮累事～～～） 要暫別一下德國足球，投身英國既懷抱…

Btw 準備出呢篇既時候睇緊德丙週中直播，我地作客北部升班馬上半場領先一球，然後下半場比人反超前。個個勁絕望咁話原來我地其實好廢，點知去到最後十分鐘我地竟然入到兩球反勝。心情由地獄上返人間！！曾經有段時間我地一落後就知無可能追得返，而家竟然可以反勝。 呢三分超級重要，下星期繼續！！！