30.07.2022 德國足總盃 第一圈 SV Elversberg - Bayer 04 Leverkusen Waldstadion an der Kaiserlinde 賽果： 4:3 (3:2) 入場人數： 7,414 （約 1200 名作客球迷） 門票： 10€ （企位） 更多相片
今年我地再次以莎蘭盃冠軍晉身足總盃首圈，對手係德甲既利華古遜。 同上場開咧戰一樣，我對呢場波無咩期望，覺得隊波出盡力唔好輸得太難睇就得。
早兩年雖然對聖保利成功突圍去次圈，我地要係場外爬牆睇波，不過聖保利本來就係一隊唔太被睇好既球隊，所以 SVE 出到線唔算係啲咩驚喜。去到第二圈遇上慕遜加柏被大炒出局，係 Saarland 有好多慕遜加柏球迷，但我記得嗰陣除左有第二次 lockdown 之外，比賽當日仲落大雨，我地連球場都無去係屋企睇直播算。
黎到今場，我地既對手係上屆德甲季軍，今屆既歐聯球隊。 雖然好多球員我都唔識，就咁睇名淨係識有個捷克名既芬蘭龍（後來發現原來係斯洛戈克名）同德文名既捷克前鋒，其他…. err…. anyway，總之人地大把大國腳係我有眼不識泰山。 就算我地上場踢得幾好都好，對手同樣都係岩岩升班，所以完全無諗過將兩場波拎黎一齊講。
再加上比賽當日圍內有人結婚，幾乎所有人都選擇左去飲而唔睇呢場波。其實真心唔明點解會㨂呢啲日子黎結婚，當然我唔可以投訴人地結婚，但就算未知隊波會升班或者有得踢足總盃，都會知道如果真係發生既時候七月尾跟本唔係一個好日子，比我會㨂六月或者冬天囉。 係德國有時真係足球行先的，法蘭克福贏歐霸第二日要返黎慶祝，雖然隊波夜晚先返德國，但市政府即刻取消哂八對當日要註冊結婚既預約。 如果係啲大球隊有大型組織，可能少咁一小班核心成員都仲有啲新血搭救；但今次少左班核心成員即係得返一兩個人可以撐下場。 所以今日一直都處於又開心又嬲既心情下睇波。
球場係開波前一個半鐘開門，我地趁早入場唔洗排隊。 一入場就見到個 upgrade 左既小食亭，有收銀機同埋可以用卡比錢，忍唔住係啲人面前係咁 wow wow 聲！ 不過點解個看台仲有未上蓋既？ 五月尾篤定升班後，球隊勁實牙實齒咁話幫 C1 起上蓋係 priority，開季前會搞得掂。 可惜無天時地利，好多材料都趕唔切送到… 工程只好延遲，而家話雨季之前會搞掂，希望真係唔洗再日曬雨淋！！
望住對面作客看台既紅海慢慢形成， 利華古遜既球迷組織係開波前大約 45 分鐘入場，佢地想係看台前掛起 Forza (logo) Bayer 既大橫額，不過基於球場保安規定，啲大橫額唔可以橫跨緊急出口，佢地由左邊既緊急出口旁邊掛起，拉到去 Bay.. 即時候發現 ..er 太長（蓋住左個出口）。不過佢地好似就搵到解決方法，就係摺起中間球會 logo ，起碼可以見到 FORZABAYER 呢幾隻大字。 同時佢地都準備左一個簡單既 choreo，看台上個個舉起紅色膠布，看台前幾隻大字寫住： Macht es nochmal – Holt den Pokal，贏多次足總盃！
今場波本來係 15:30 開波，足總無啦啦話要延遲一分鐘開波用黎關注氣候變化喎。 作客球迷有另一條大字報投訴： 用一分鐘黎關注氣候變化？係卡塔爾好好享受九十分鐘既冷氣吧！ 然後雙方一齊唱起盃賽必唱既歌： Scheiss DFB! Scheiss 完佢之後就向德國名伯 Seeler 默哀致敬。 以為終於可以開波，點知對面龍門個網有個 lone 要即時修補返又 delay 多幾分鐘。 五分鐘過後終於開波…..
係一場咁重要既比賽下無左一大班核心成員…. 今場波既氣氛完全係一盤散沙。 即使我地有個鼓係度帶下拍子，企係我地後面既幾個中年球迷唔知點解佢地係呢啲時候把聲特別響亮。 其實佢地都係我地重要既一員，但係今日真係覺得佢地好煩，唔知點解可以唱唱下唱左第二首歌，或者甩哂拍手，然後又自己唱自己。 （平時佢地都係咁，但我地人多啲可以蓋過佢地把聲將佢地拉回正軌）好好彩就係上年季尾 SVE 越踢越好時，開始有啲後生仔走埋黎想一齊打氣。 有啲本來都仲怕怕醜醜咁，黎到今日見大台失蹤佢地反而敢出下聲，所以今日我都反而額外出力大聲唱歌，想比啲細路仔睇一個亞洲女仔都可以出聲打氣… 你地肯唱都一定得的。勉強下我地都仲可以唱到幾首歌仲 last 到一兩分鐘。
係呢個時候心情仲嬲嬲地，開波唔夠兩分鐘， 見到我地向前進攻，係中線左邊傳上去，個 8 號今季先由 Ulm 轉會過黎我都未記得佢叫咩名，自己帶住個波去到禁區頂個邊起腳就射左個波入網。 我只係瞪大對眼雙手掩住個口大叫…. 上場我地八分鐘開齋，今場就只需兩分鐘！！！！！！ ok 定啲黎，負碌姐，我地趁人地未企穩就先拎個頭籌。 仲有差唔多90分鐘比人地追呀… 果然人地唔洗三分鐘就入波追和，係我地面前一腳勁抽抽入網。
被追和都好過落後，場波仲有超過 80 分鐘～～ 好快我地搏到個十二碼，由我地既球王 Koffi 操刀，自從佢被封為真球王之後佢既自信心爆棚，睇到十二碼落腳嗰下輕鬆到…. 我地又再次領先。 但利華古遜山長水遠黎到鄉下地方唔係諗住輸波的，有一段時間主場氣氛超好，啲人話想帶動主看台球迷企起身，我即刻話千奇唔好，過往首圈我地都係係氣氛最好既時候失波飲恨，我好驚今場又要重演。 但真係勁準囉， 最後真係有人帶起叫主看台企起身…. 然後就係利華古遜再次追和…. 其實係佢地兩次追和之前同之後都有幾下有威脅既埋門，如果唔係有我地既龍門仔把關我地入多幾球都未必夠輸！！同時 SVE 班球員壓迫得好勁，完全唔比對方有上腳太耐既機會。 完半場前 Koffi 係左路傳中助攻比 Schnellbacher 射入網，令我地係半場時又再一次領先！
換邊後 SVE 向我地呢邊攻，久攻不下既情況下… 利華古遜既 Schick 遠射入網……好在係詐糊！ （係電視睇返好似無越位） 再一次大難不死…. 等多一陣後福終於來臨，去到74 分鐘 SVE 竟然又再用頭頂入…. 仲要係角球開出黎然後直接頂入 4:2!!!!! 去到呢刻又有人想叫主看台啲企起身，今次我心諗 ok 反正有兩球係手，最多送一球比對方囉！ 我地想同主看台互叫 SVE， 但我地後面班阿叔又係度搞亂拍子好嬲！！！ 但領先兩球心情極好，有人提議不如向難度挑戰下試下唱歌詞勁長 Allez allez allez，神奇地呢首竟然係今日last 得唱耐同唱得最有組織既歌！！
自上季季尾開始越黎越多人黎支持 SVE，呢件係一件好事。 但好多本來淨係支持德甲球隊，或者間唔中去睇下 Kaiserslautern 既人出現成為 SVE 球迷，呢件都唔係一件壞事。 但佢地係其他球隊學埋啲歌改幾隻字就想係度唱 （特別係侮辱人既歌），仲有拎 Lautern 既特有傳統贏波 fing 紙巾走黎 fing，仲好意思比紙巾我地叫我地一齊 fing，我地拎上手之後 dum 落地下叫佢地咪再 fing！！！ 呢度係 Elversberg 唔係其他地方囉。 唉，其他人未必睇得出，但無球迷組織既看台真係好難頂！！
去到尾段個 Schick 死心不息係都要入返球，追成 4:3。 呢啲又係要食救心既時候….. 個球證有一下比球員掃低左要軍醫療傷，最後補時補成四分鐘！！！！ 永遠去到補時階段唔知點解對方特別多攻勢，好在我地既門神一一擋下，去到最後雙下接實，球證吹雞完場。 我地出線去第二回合！！！！！
繼上星期大炒 Essen 之後，今日我地對住德甲球隊竟然能夠保持水準，最重要係前面識得入波，唔係下下賓迪基上身咁浪費機會。 SVE 今日一戰成名，幾乎所有球迷都恭喜我地踢出水準成功出線，賽後睇評論睇得十分開心～～～ 就連香港新聞都有提起「艾華斯堡」!!（條 Link 帶你去有線新聞度睇精華～～）利華古遜球迷覺得自己隊波踢得好差，不過我淨係睇到 SVE 踢得好好… 所以我都唔知係人地失準定我地發揮超水準？
話說 Essen 上場慘敗之後，球隊即刻帶隊波去瑞典集訓幾日，再同當地球隊進行友賽然後又再次八分鐘就失波，嚇到佢地死。 但佢地見到利華古遜輸波後佢地終於放下心頭大石話，原來唔係我地廢，而係 SVE 異常地勁 :-DDD
下星期我地繼續係主場出擊，迎戰同州鄉友 Saarbrücken….. 過去兩場我地無咩期待，但兩場波過去我地好似開始見到希望，唔知到時我地可以乘勝追擊定係黎個反高潮將我地帶返黎現實呢？ 而今日無入到場既朋友個個都 dum 心，錯過左一場咁精彩既比賽。 希望下個星期我地再次聚埋一齊既時候可以將 C1 看台上既氣氛一次過帶哂出黎！