24.07.2022
比利時足球甲組聯賽 第 1 週
RSC Anderlecht - KV Oostende
Stade Constant Vanden Stock
賽果：2:0 (1:0)
入場人數： 19000 （約 150 約作客球迷）
門票：40€ (坐位）
更多相片

係 St-Truiden 過左一晚，第二日就出發去比利時既首都布魯塞爾。 Anderlecht 係布魯塞爾既一部份，類似法蘭克福既 Offenbach 咁… 係一個比較雜既地方。 但正正係因為地區夠草根先可以出到全國最佳球迷！

我地既行程係下午一點左右到 Anderlecht ，然後係嗰度行下坐下等開波。 係球場附近泊低架車之後，我地就向 Anderlecht 既中心方向行。 一開始覺得啲街幾特別，好似英國 mix 法國咁，一條超長既排屋街，但越行就覺得越唔對路。 今日係星期日所以條街好靜都無咩所謂，但每幾百米就會見到有啲奇怪既人係條街度遊盪。 再加上個太陽又越黎越猛，市容差加天氣熱，令到我地好想快啲離開呢度。

諗住去到 Anderlecht 中心會好啲，行行下就到左布魯塞爾既中央火車站。 我話下?？ 幾年前我搭過 Eurostar 係度轉車喎，完全唔知呢區其實係 Anderlecht! 係車站附近搵間有正常人既餐廳坐低，叫左兩杯啤酒同小食… 然後就係度苦惱我地點樣可以度過淨返嗰四個鐘….

曾有比利時人同我講過布魯塞爾唔係一個好地方，因為被法荷兩國文化分割，市內唔多唔少都有少少衝突咁。 所有本來我就對布魯塞爾無咩興趣，再係 Anderlecht 過左一個鐘之後，真係即刻對呢個城市大扣分，唔想再黎！！如果唔想再黎既話我地應該把握機會去睇尿尿小童，google 下發現原來佢只係離我地一公里既路程！

行左大約十分鐘，一轉個彎發現真布魯塞爾市中心原來好有生氣，啲建築物仲要好靚。 （開始好後侮點解我地唔早啲離開 Anderlecht） 見到尿尿小童真身後，我地就跟住其他遊客行，周圍都係薯條同 waffle 店～～ 但呢啲呃遊客既價錢係唔會呃到我既。 啲小巷仲有好多小商店同 coffee shop，勁有生氣！ 真係早知唔浪費時間直衝黎市中心。。。 搞到最後想坐低食埋飯先返去球場都要勁趕。

食完野我地就搭地鐵返去 Anderlecht，今次上返地面條街終於有返啲正常人。 我地入場後仲有大半個鐘先開波， 睇住個球場慢慢多人，望下主客球迷兩邊準備佢地打氣要用既野。 原來佢地有兩個打氣組織位於兩邊龍門後面。 本來以為佢地好似德國啲組織咁大家唔岩牙所以各行各路，但比賽期間雖然佢地各有各唱，但有時後又會呼喚對方一齊唱同一首歌。 最開心係可以聽佢地唱 Everywhere we go! 同埋大叫 We are Anderlecht。

講起布魯塞爾無一隊以自己城市為名既球隊，我話倫敦都係咁。 然後德國人話：唔係喎，有 Arsenal London 喎。 我話阿仙奴叫阿仙奴喎，倫敦二字同隊波無關架喎。 上網睇先發現原來係德國人先會叫佢地做 Arsenal London, Chelsea London 咁，仲以為自己睇左咁多年英超連啲球隊叫咩名都唔知！

今次賽前特登睇下兩隊波有無邊個球員係我識既… 可惜係一個都唔識。 作為爭標熱門既 Anderlecht 今場好輕鬆咁贏兩球波，唔算有咩驚喜。 只係開心可以見到主場球迷入波後點樣慶祝，同之前睇 Genk 一樣佢地會播 techno 歌然後全場球迷好興奮咁叫喊球員同球會個名。

完場後離場大塞車，場外多左好多攤擋賣野食。 見到有人食薯條包（長法包夾薯條）， 唔明點解可以食得落 sosad 好似白飯配意粉咁。 我地架行離球場唔洗五分鐘腳程，仲要咁岩我地條街無被封路，好快就可以離開。 然後就開始漫長既回家之路！