23.07.2022
比利時足球甲組聯賽 第 1 週
Sint-Truidense VV - Saint Gilloise
Stayen
賽果：1:1 (1:0)
入場人數：5,500 （約 300 名作客球迷）
門票：20€ （坐位）
更多相片

超興奮睇完 SVE 大炒 RWE 之後，我地就繼續我地既 football weekend，向西出發去比利時。

難得去到咁遠又近邊境，只需大約個半鐘車程就可以到達我地第一個目的地， Sint-Truiden! 其實我地對呢隊波同個城市仔無咩認識，一心只係想搵由 Essen 出發有邊場波我地可以趕得切即日睇第二場；然後發現呢個球場有一個特色，就係其中一個看台背後係酒店二合一！ 有幾間房有球場內景，甚至有得直接走出特別看台睇波。

所以我地就決定去睇呢場波。 一開始諗住訂連看台既特別房，但手腳太慢已經滿左。 訂普通房時講左話想要球場景，但佢地話唔可以保證安排到呢種房，仲特別提我地話因為保安同轉播權關係，比賽日佢地要遮掩望球場既窗，所以我地要睇波就要買飛 -_- 真係有會有想坐係間房入面睇波咩？

我地大約六點鐘到達酒店， 搞左一大輪先 check-in 到。 球場保安唔比我地直接入酒店/球場地下停車場，話要我地 check-in 左先有房卡先比我地入去。 但條街又無地方比我地泊低架車幾分鐘，要兜到勁遠行返轉頭，然後又行返去架車度先搞掂。 係地下停車場可以通去球場旁邊既商場，又可以通去球場既 vip room，又可以通去酒店房。 好可惜，我地都無未被分到球場景～

放低啲野就去食飯，去到比利時一定要食薯條！ 係正酒店對面就係一間餐廳，叫左兩個漢堡包連薯條（超好食）。 係 Essen 食完垃圾之後，而家終於上返天堂！！！食飽就行返對面去 fan shop 買手信，入面勁多日本人。 有啲指示牌仲有日文！！ 原來呢個球隊既大股東係一間日本娛樂公司，所以同啲日本球隊有合作關係。 但我心諗，咁都唔洗咁多人黎朝聖下話？ 愛國愛到咁？

由酒店門口行去我地既球場入口唔知有無 100 米，開波前大約半個鐘入到場。 個看台入口奇醜，唔知點解佢地要用大排檔嗰啲膠窗簾，仲要已經變哂色灰灰黃黃咁完全唔想掂囉。 以為佢地真係好似大排檔咁想 keep 住啲冷氣，但入到去第一層又唔見有冷氣…

入到看台埋位之後，右邊龍門後面就係主場球迷既看台，酒店房就係呢邊，左邊龍門後面就係來自布魯塞爾既作客球迷。 佢地人唔多但個看台夠矮同有上蓋所以聽落好大聲。 等開波時大會就宣讀出場陣容，讀左主場幾個日本球員，然後最後係… Shinji Kagawa. 我：？？？？ Kagawa 我識喎，係咪同一個人黎？ 上網一睇，妖，真係香川真司。 拿，我就真係對佢無咩興趣，踢過兩隊我最憎既球隊， 但覺得件事好好笑。 原來啲日本人黎到唔係為左睇啲無名日本球員，而係黎睇香川真司。 諗返轉頭，我地泊低架車去 check-in 時，返轉頭嗰陣見到 STVV 既球員向住我地既方向行，如果中意香川又想去追星既話，應該可以好容易係呢度捕捉佢。

等到開波，望下啲酒店房，又話會遮擋球場景既？？ 見到有幾間房啲人企係窗前睇波喎！！ 間酒店 9 up定點？ anyway… 反正我地本來都係想入場睇波。 只係想夜晚可以望下無人既球場！

主客兩隊既主色都係黃藍色，主隊既吉祥物係一隻黃色既雀，球迷畫出黎既就似翠兒。 今場波對比起頭先場德丙，兩個字黎形容： 超悶。 雖然有兩個入球，但緊張程度完全唔同。 我地好安樂咁睇住波既同時又享受下兩邊球迷打氣。 無諗過主隊都會有咁多球迷聚埋一齊而且仲要全場唱歌。

比利時係一個好有趣既國家，係人都知佢分左荷法兩區。 St-Truiden 係荷語區，所以個球迷文化都係偏向荷蘭/德國多啲。 係比利時你仲會見到好多英國文化，係房屋風格就睇得出，佢地好多紅磚屋同排屋，再加上佢地唔抗拒講英文（起碼荷語區啲人唔抗拒），所以啲球迷都唱好多香港球迷都有唱既英文歌。

完場後離開球場，去對面間酒店買左杯啤酒，然後再行返酒店，成個過程 5 分鐘都無！第二朝發現原來 lobby 有個區都可以直望入球場，要留返幾個倩影，無幾可可以有 VIP view! Check-out 之後就出發去比利時首都，準備睇今個週末既第三場波。