23.07.2022 德國足球丙組聯賽 第 1 週 Rot-Weiss Essen - SV Elversberg Stadion an der Hafenstrasse 賽果： 1:5 (1:4) 入場人數： 16,347 （約 150 名作客球迷） 門票： 14€ （企位） 更多相片
等左兩個月終於等到德丙開波啦！ SVE 德丙首仗對住同樣係升班馬既 RWE。對手由西部地區聯賽升上德丙，係魯爾區其中一隊傳統球隊，雖然無史浩克同黃色嗰隊咁出名，但 Essen 一樣有一個強大既 fan base， 今次係十四年來首次重回職業聯賽，迎接佢地既係滿座既主場，今季佢地仲賣出左近一萬套季票！
佢地既對手（即係我地） 只係一隊鄉下隊， 號召到三架球迷巴士係相對 2013 年黎講係一大進步。我地由法蘭克福直接出發， 大約三個鐘車程到達球場場外。 第二次黎到呢個球場，不過今次企係作客球迷區，可以有完美視覺去睇主場球迷準備左既 choreo 黎慶祝球隊升班。
一入場就先買野食，二話不說㨂左魯爾區名產 Currywurst！ 打中文無人睇到，所以要用英文打希望有人睇到唔好中伏： In Essen I have had the WORST currywrust ever. 佢就咁用茄汁再倒啲咖哩粉我都無咁嬲，佢個汁又苦又無味，狗也不吃囉好無！！！！食到超嬲，然後心入面瘋狂咒對方輸波。
主場區可以容納 16000 人，睇住個球場越黎越滿，間唔中佢地叫下口號，我地呢班鄉下仔完全無力還擊。不過有一首歌我地可以一齊唱： Nie mehr vierte Liga – 唔要再重返第四級聯賽！ 等到球員入場時，係正我地對面既看台開始放出濃厚既紅白煙，正式宣布 RWE 重返職業聯賽！
球員入場後去左中間圍圈向剛過身既德國名宿 Uwe Seeler 默哀然後拍手致敬。 但西看台前既球迷安排不當係呢個時候點火慶祝其中一個組織既五週年紀念。 嗰五團火仲要唔係同一時間燒起，時間錯組織又錯！
大家係今季最主要有一個願望： 唔好好似上年咁做升降機，可以出盡全力好好睇睇咁踢每人場波。 今場都無諗太多，西部聯賽好多有底子既球隊，但對方都係升班馬，我地既實力應該唔會差過對手好多卦？ 終於等到開波！！ 當我差唔多影完相岩岩埋位… 當時個波仲係後場… 去到中場長傳上去… 個波去到背住龍門既 Koffi 腳下。 嗰刻個腦仲未有「射個波入網」既諗法，佢就已經轉身一腳射左個波入網。 只係開波後既六分幾鐘！！！！！！ 我地竟然入場先，我地竟然領先，竟然係由 Koffi 開齋！！！
個個都好興奮大聲打氣時…. 對方係我地前面搏到個十二碼。 呢下即刻靜哂，都估到劇本係會咁走既啦， 人地射入十二碼然後反勝嘛。 點知，我地既 22 歲門神竟然連救兩下力保不失。係呢一刻大家越黎越正面！！ 後來睇波精華先發現呢球根本唔係十二碼囉， 我地個龍門 Kristof 已經雙手拎起左個波對方先叉隻腳埋黎踢到佢，然後佢仲要係踢到個波無犯規。 真係好彩無輸呢球冤枉波！！
氣都未抖順又見到個波無啦啦見到 Koffi 追住個波跑落底線，然後逗起個波笠過龍門… 入左！！！ 只可以用一個字黎形容：難以置信。 Koffi 係 2017 年加盟 SVE，踢左兩季個個都叫佢做球王，但係係賓迪基之流。 一開始完全係賓迪基表現空門飛機，後來慢慢有啲神來之筆做救世主咁，然後仲比 Mannheim 睇中左跟佢地上左丙組。 2020 年重返 SVE 有時都仲係賓迪基，但佢為球隊入左好多球重要既波，佢已經 36 歲啦，仲可以 expect d 乜？但今場波兩球都真係球王級表現～～～ 流暢轉身射波再加呢下輕鬆逗個波入網…
但呢兩球波序幕… 三分鐘後對方一次反擊追返一球。 跟住嗰十分鐘互有攻勢… 但 SVE 既球員迫得好緊，迫甩左個波之後個波又落到 Koffi 腳下，今次佢係右路傳中， Schnellbacher 用頭一頂入網！一球唔夠，兩分鐘後再用頭入多一粒。 今次真係 OMGGGG！！ 開波唔夠半個鐘我地已經入左四球波，仲要唔係負碌波… 呢隊係咪真係我地睇開既 SVE??
主場球迷一定已經失望至極，但佢地打氣既聲勢一啲都無減弱過。 話哂都只係第一場波，早啲搵到隊波有咩問題仲可以有時間執！ 去到下半場終於平靜返啲… 但 SVE 無放鬆到無比到機會 RWE 造出一啲有威脅既攻勢。 去到完場前大約五分鐘射入埋第五球埋齋….
呢場波 SVE 創下左幾個紀錄： 第一隊德丙球隊係第一個比賽週射入五球波；德丙首週史上最高得失球差，同埋係我地係德丙最佳一戰！賽後好多人都恭喜我地，特別係魯爾區其他低組別球隊既球迷，話多謝我地摑 RWE 一巴等佢地面對現實。就連 RWE 球迷都話今場波完全係被技術性擊倒，完全無話可說。
今場只係今季 38 場比賽既第一場，對方亦只係岩岩升班。睇返八年前第一次升上丙組時，隊波去到第七場波先贏到波，最後全季最有三次成功作客贏波，唔多唔少都有少少陰影。 班球員今場既表現帶比我地好大既希望；希望隊波可以 keep 住呢個水盡去挑戰其他實力更高既球隊，可以帶領大家留守德丙甚至挑戰德乙！
下個星期德丙將會停戰一週，因為係德國足總盃首回合，我地會係主場迎戰利華古遜！唔知可唔可以食住個勢偷到雞呢？