16.07.2022 德國足球乙組聯賽 第 1 週 SSV Jahn Regensburg - SV Darmstadt 98 Jahnstadion Regensburg 賽果: 2:0 (1:0) 入場人數: 8.509 (約 600 名作客球迷) 門票： 35€ 更多相片
原來已經差唔多兩個月無 update 過！ 新一季新開始，德乙開波先咁我地就去睇德乙囉！ 等到佢地賽程出左之後就即刻睇中左呢場波，兩隊波無咩特別，主要係想趁有 9€ 月票既時候黎個遠遊。
自六月起，德國政府推出左 9€ 全國通用既交通月票，為期三個月。即係六七八月我地總共只需比 27€ 就可以坐任何公共交通工具（除左高鐵）本地遊。 平時我地要買月票返工要 140€，唔買月票買日票出城都要 10€，係油價高漲既時期下，隨時撻著架車都已經唔只 9€。呢個月票真係恩物！！ 由法蘭克福去 Regensburg 搭慢車需時大約六個鐘，要係 Würzburg 同 Nürnberg 轉車，中間淨係轉車都已經要無左大約一個鐘。 呢三程車每程都係個半鐘左右，所以車程唔會覺得太耐。 最煩只係而家搭車要戴口罩。
我地係六月第一個週末就已經用左張 9€ 票去紐倫堡睇 Rock im Park，當時個火車站多人到以為自己去左印度！！！ 今次我地請左假星期五一早出發以為個個已經過左條火車癮會無咁多人… 點知一樣咁多人。 見到架火車黎既時候要即刻搵好個位攝上車，真係好好彩我地係總站上車， 見到中途站啲人上唔到車個樣好絕望（每個鐘得一班！）
下午大約兩點半左右就到達 Regensburg。 首先去左酒店 check-in 放低行李，坐左一陣就行去市中心。 本來我地對 Regensburg 無話有咩期待，淨係知佢成個舊城都被列為世界遺產。 去到真係好驚喜，舊城建築黎講周圍都差唔多。但係佢呢個舊城入面有好多餐廳同 cafe，條街好有生氣，好乾淨好靚。 咁岩仲遇上 Jazz festival，啲廣場中間有唔少攤位賣小食～ 每條小巷都令我諗起唔同國家，有幾條窄巷令我諗起黑山同巴塞隆拿，個大教堂就諗起科隆，仲有條舊石橋令我諗起布拉格。 仲有見到南德第一間咖啡廳、最古老既黑啤… 然後突然有個想法： 到底邊條石橋舊啲？ 「唔係掛，布拉格嗰條好舊架啦喎」最後問 Google 同維基既結果係…… 布拉格條查理橋係抄 Regensburg 既石橋架！！！ 真心晴天霹靂又覺得好好笑。
然後就覺得呢個城市越黎越有趣。 講開巴伐利亞你一定先諗起慕尼黑，然後有睇波既可以 up 多兩三隊城市名。 但 Regensburg 既歷史地位（特別係宗教）原來係好重！捷克以前既皇室係會去 Regensburg 度領洗，可能解釋到點解佢地會拎到舊石橋既 idea 返去自己起返一條。
係舊城行左一日，食飽飯就返酒店訓覺。第二日食完早餐就 check out 去球場。 由酒店搭巴士去球場只需大約十分鐘車桯，去到場外買左條頸巾做手信就入場。 市內既唯一交通工具只得巴士，好多人都選擇踩單車代步。 而球場外亦都有超過 800 個單車車位比球迷使用！
諗返對上一次係德國睇一場正常既比賽（唔計地區聯賽），已經要數返去 2020 年年頭！ 呢兩年有睇過德甲德乙，但場內都係毫無氣氛， 時隔兩年終於一切都回復正常～～～ SVE 係 2013 年升上丙組時已經對戰過 Regensburg，當時佢地仲係用緊舊球場。 去到 2015 年呢個新球場落成啟用，去到而家 2022 年個球場都仲係好新淨，啲座位係一粒塵都無勁震撼！ 球隊將舊球場既大鐘搬左去新球場場內作為紀念，而球迷就畫左舊球場大鐘長掛係看台後面。
開波前半個鐘，作客球迷既核心成員到場。 入場後當然要拿拿聲掛起啲橫額同大旗， 有幾塊橫額睇住佢地搞到就黎開波都未搞得掂， 貼好左一邊另一邊又甩！！但係等左咁耐終於可以見到年輕德仔，仲要好多都赤裸上身，真的很興奮！！！
Darmstadt 首先係中圈開波，第二腳就甩左送左比主隊，睇住主隊向我地既左邊進攻… 右路傳中，入左。。。！！？ 大家即刻笑到收唔到聲，呢球隊一定係我親眼見過既最快入球， 16 秒！！！ 咁早失波都唔算太差既，仲有 90 分鐘可以追返～ 但係客隊個右閘唔知做乜下下去盡好多無謂既犯規，最後上半場未完就兩黃一紅 byebye.
下半場客隊主動左，好多機會埋門送到個波去龍門口，就係差一個人可以篤個波入網。 如果兩邊都有利雲的話，場波應該 8:6 完場。 過去幾場有紅牌既波最後都係踢少一個嗰隊反勝，所以我地對 Darmstadt 好有信心。 Regensburg 最後係 67 分鐘射入第二球埋齋～ 淨勝兩球排係榜首。
出奇地，就算球隊已經明顯贏波，去到補時階段都只係得幾個人提早起身離場。 到完場後離場時，場外啲人散得好快，又無塞車，只係好多單車黨好順暢咁離去～ 我地就搭巴士返酒店拎行李，再去火車站搭車返法蘭克福。
下星期終於到德丙開波，我地要到 NRW 作客 Essen!!!