21.05.2022 莎蘭盃決賽 FC Homburg - SV Elversberg Ludwigsparkstadion 賽果： 1:2 入場人數： 4,000 門票： 11€ （另加 1€ 手續費） 更多相片
上星期六係主場贏波成為聯賽冠軍後，今日再戰同一對手，贏左就可以出戰下季德國足總盃首圈！
莎蘭盃決賽係過去幾年無咩新意，黎黎去去都係果三隊波： SVE, FCH, FCS；而且都係係 Kaiserlinde 上演。 今年終於有一個真中立場，就係翻新過既 FCS 主場 Ludwigspark。
呢個球場係屬地區政府所有， 原來係一個有跑道既運動場連彎型看台，可以話係其中一個經典球場。 政府一直都有意翻新球場，去到 2016 年終於動工，點知工程一直超支同無限 delay，原本話兩年搞掂最後花左差唔多四年先完成，中間一度傳過工程會爛尾。 當時有球迷提議集資，但呢個因為係政府 project 所以唔可以亂咁黎。 球場最後係 FCS 兩年前成功升班後幾個月先可以再次回家。
翻新後既球場變成四四方方， 四個看台都有上蓋但勁通風，唔知如果落大雨既話係咪真係擋到雨呢？ 座位以藍色為左襯返 FCS 既主色，我地右邊既看台下層兩邊用左黎掛廣告，睇真啲其實果兩個區無翻新到，原因係因為唔夠錢… 個球場唔係唔靚，好在佢地保留左四碌射燈柱，但對比起舊球場，翻新後一啲風味都無。
雖然我地被分成客隊，反而被分配去用 FCS 球迷既看台。 係球場上 FCS 睇唔起我地，但場外我地同好多人都有啲交情所以都可以安心用佢地個看台。 個球場我就麻麻地，但其中一樣要讚既一定係佢地個小食亭售賣系統勁有系統同效率！！！ 啲野飲好多已經準備好哂，食物都好極速就準備好，完全唔洗等，仲可以用卡比錢唔洗用現金。
一直都話如果我地去到最後一週先決定贏唔贏到冠軍既話，最後既結果一定係我地會係聯賽贏 FCH，然後一星期後既盃賽輸波一人一個冠軍打和 super。 莎蘭人成日都話呢個州「賄賂」風氣好嚴重，因為好多時候都係靠關係而獲得著數，所以個個都一直認為莎蘭足總會係賽前搵兩隊波傾掂數。 但今次我地真心靠自己贏個冠軍返黎，所以今場應該唔洗放水卦？
入場大半個鐘後終於等到開波，對面係看台掛左塊綠白色既大字報，指自己第十二人支持隊波。 我地就無準備啲咩，只係準備左幾塊大字報鬧對手。 話說佢地早兩星期係巴士站埋伏 SVE 既球迷巴士，然後最後係網上同人講打左場交 30 人對 30 人然後佢地贏左。 但果架球迷巴士係普通球迷巴士，車上有老有幼，佢地竟然咁樣拎黎炫耀？ 完全係莎蘭之恥！！！以為自己痴住賀芬咸好威，但真心全國都指住你黎笑咋！
SVE 先係作客球迷面前射入第一球波， 看台上即刻有啤酒滿天飛！ 平時我真心會好嬲唔明點解啲人唔識控制自己係都要掟杯掟啤酒，但今場真的很興奮所以全身濕哂都無所謂！ 我地係咪真係可以做到雙冠王？？ 去到下半場個形勢完全調返轉， FCH 完全㩒住黎攻，久攻之下終於入到球波追和，去到九十分鐘都未能分得出勝負。 見到隊波無哂氣咁，慢慢我眼前就開始有對方係我地面前捧盃既畫面，覺得佢地好快會可以反勝幫自己既心理打返個底。 點知，去到加時下半場，第 110 分鐘我地竟然再次領先！！！！好多人即刻衝哂去看台前面同球員超激動咁慶祝！！！ 我地都唔可以再次失勢， 係下半場我地開始練新歌，係呢幾年好興既 Allez allez allez， 內容大約係講係 2022 年五月某日，我地成為西南冠軍，而家我地贏完聯賽再贏盃賽，浩浩蕩蕩咁升班！！！ 最尾果十分鐘我地不停唱呢首歌唱到完場。 Allez allez allez… JAAAAA 雙冠！！！！
球證一吹雞，啲球員都即刻跑到看台前同球迷一齊慶祝。 今次啲保安守得好嚴，無人搵到機會衝落球場。 唱左一陣歌之後啲球員就要去參加頒獎禮， 佢地拎到個盃同獎牌之後又走返過黎同我地一齊唱跳。
七月我地就要出戰德丙，仲要出戰足總盃！ 只需要贏六場波就可以參加歐州賽。 Dream on!
btw 呢個星期好攰，由星期三晚開始睇法蘭克福捧盃睇到半夜，第二日佢地返德國由機場巡遊住咁去市中心，果 12 公里佢地用左四個鐘先去到！！！班球員分批坐係開逢車頂以龜速出發， 本來係機場對出既機場都仲ok，但入到法蘭克福已經勁多球迷企係馬路上爭住見球員。 見到一個佢地咁樣可以與眾同樂，自己係電視面前都睇得超開心。 作為一隊中遊波，係國際層面無咩知名度但又有咩所謂呢？ 最緊要有自己人既支持就已經足夠！！！ 本來預計佢地八點前可以到達市政大樓，最後我飯都食埋涼又沖埋佢成十點佢地先到… 啲球員一踏出露台一句都未講，等左幾個鐘既球迷即刻瘋狂放煙花！！！！！然後有幾個球員講下感想，大家都係話無球迷既支持佢地一定無今日既成績，超感動 <3 <3 睇佢地慶祝又睇到半夜，星期五又要早起返工，然後奔去睇附加賽，黎到星期六要一早起身先去車房換軚再去睇波…. 今晚終於可以訓返一覺好。