01.05.2022 西班牙足球甲組聯賽 第 34 週 巴賽隆拿 對 馬略卡 魯營球場 賽果：2:1 (1:0) 入場人數： 62,789 （約 100 名作客球迷） 門票： 59€ 更多相片
又一次我地同法蘭克福作客之旅擦身而過… 上一次係 Tallinn，而今次就係巴塞隆拿。 當法蘭克福晉身八強之後我地都有碌過下睇巴塞波飛（主場一定無可能買到飛），當時見到仲有好多波飛剩，好可惜一早已經訂好哂兩星期之後去旅程，唔會為左法蘭克福特登飛多轉。
法蘭克福呢隊波成績一般，唔好話香港，就算歐洲其他國家都未必知佢地有咁多球迷，我估巴塞都無諗過班球迷可以咁癲。 唔只法蘭克福，好多其他德國球隊既球迷就算買唔到飛都會跟球隊作客國際賽，但法蘭克福啲球迷係癲癲地既。 魯營果五千張作客球門票光速賣哂… 但就如我頭先話我都有碌過下呢場波既波飛， 其他人都一定有咁做，而且唔係淨係得個睇字，係見到有飛就即刻買。 仲有一班照飛左去巴塞隆拿既球迷係比賽當日一早企係場外售票處等佢開門買飛；更多既就係搵黃牛買飛。
普通球迷一定覺得好不可思議，堂堂巴塞隆拿係魯營竟然咁樣比一隊德國中游球隊落面，最後仲要輸波出局。後來巴塞主席出黎話本來個售票系統 block 左德國信用卡等德國人買唔到主場飛，但有啲季票持有人同售票團體搵到系統漏洞令到有最後總共有近三萬個法蘭克福球迷成功買到飛入場。另外又有球迷組織號召大家著白色衫，所有法蘭克福既球迷無論有無波飛都好，係比賽當日都著上白衫將巴塞隆拿既街道漂白！ 然後到有波飛既入到球場後，大家先覺得越黎越唔對路，點解看台上越黎越多白衫！！ 完場後啲球迷聚哂係作客看台下面，睇相都覺得超震撼，真係幾乎半個球場都係作客球迷，三萬幾人！！！啲球迷同啲球員完全唔願走，我地係電視佢地玩左差唔多成個鐘先想去訓。
出戰魯營可以話係所有球隊同球迷既其中一個夢想，而普通球迷都一定會想去呢個殿堂級既球場朝聖。我地好好彩可以係球隊決定翻新球場前去睇返一場波！ 巴塞宣佈今季完結後魯營翻新工程就會動工，翻新期間佢地會搬去奧運球場（Yeah! 又多一個借口去巴塞同去多一個球場打卡～）
比賽當日我地先去左奧運區就遊客，然後係市中心散下步就返酒店換返長褲（日頭好熱但太陽落左山好涼）。 先去左市郊睇一場低組別既升級戰，然後就搭地鐵去到魯營附近既車站。 當時離開波仲有大約半個鐘，街上面好多球迷向住球場方向行，見到咁多人有啲擔心要係閘口排隊然後 miss 左開波。 出奇地雖然場外人山人海，但入場係完全唔洗排隊好勁有效率。連埋我地要行果條樓梯好似永遠行唔完既樓梯，上到山頂都仲有成 20 分鐘先開波！
未入到看台時有少少失望，應該話同想像中既有啲出入。 諗住咁大個球隊個球場一定保養得好好… 但球場內既通道勁 up dup，有好多安全網圍住，應該係準備緊翻新工程？ 上到一半可以望到下層看台既座位（但望唔到球場草皮），上到我地果層之後就先想買野食同野飲，但啲野食見到就唔開胃，仲要勁貴！！！一個火腿三文治加野飲要成11€ ._.
買完食就終於可以步入看台！ 最近因為武肺所以上網買波飛時只可以㨂想坐咩區，無得㨂位； 要等佢比賽日前1－2 日先 send 張波飛比你連埋被分配既座位。 呢個安排主要係用黎比佢地安排社交距離。 好似下場開始球迷已經可以自己㨂位～ 我地個位係上層既第二行，對我地黎講其實坐邊都無咩所謂，因為坐邊都望到塊草皮，最緊要望得哂所有看台！
入到看台望到場內既一切，好耐未試過有呢種視覺上既震撼！果然係魯營，一個可以容納九萬人既全座位球場…. 如果將佢搬到德國然後有一邊看台改做企位看台既話會更加震憾！！ 我地企係條樓梯度影左幾張相就要向下行去我地既第二行座位。呢個位又有少少失望，爛地黎既！ 啲欄杆生酒銹啲座位又甩哂色，個感覺好落後。 但坐低左回下氣再望下個球場個腦先識郁，其實個看台咁樣日曬雨淋法唔爛到咁先奇！
咁大個球場竟然得一個看台有上蓋，但其實好多其他西班牙同南美國家既球場個建築風格都係咁。球迷文化係西班牙唔算盛行，巴塞有幾個球迷組織會聚集係龍門後看台一齊唱歌打氣，似香港啲打氣團多啲，一個規模咁大既球隊竟然得幾十個人企係龍門後面打氣，佢地間唔中會唱啲好易上口既歌等全場球迷可以一齊唱。 例如 Allez allez allez, 仲有應該係巴塞會歌唱到最後全場一齊大叫 Barca, Barca Baaaaarca! 有幾萬人一齊叫既話又係好震撼既！
魯營既作客球迷區係完全與世隔絕… 我地後面最頂果幾行係有有透明圍板隔開一細細個作客區， 由第三層第二行望上去都已經幾乎見唔到入面到底有無人。 歐霸佢地擴大左個作客區去到差唔多球場中間，但咁樣被隔絕既作客區對法蘭克福既球迷組織黎講完全係一個惡夢，因為佢地打氣聲完全落唔到球場….
等到開心聽佢地講啲球員既名…. 我識既只得幾個老餅….. 完全認唔到邊個打邊個。 淨係知好多人件波衫係印左 Pedri， 第一球波迪屁入，然後第二球好似係隊長。碧基又唔知做乜傷出提早收皮？然後下半場有個球員熱身果間啲人拍哂手咁，到佢被換入場果間啲人又好興奮，果陣先見到個名應該係 Fati？ 如果要我提下球員個名既話就應該係呢堆啦…. 去到下半場尾段馬略卡拎個尾彩入返一個，我地後面傳來一陣極微弱既歡呼聲，呢個時候我地先知原來有作客球迷到場！！！
完場後啲人走得勁快，唔洗五分鐘個看台就已經半空咁濟。 然後我地影多幾張相就落去，當時仲可以走到下層看台影幾張由下望上去既相，同埋想親眼望巴塞名句 Més que un club， 都係果句，好震憾！影唔夠幾張就已經比啲保安推我地走… 到底佢地有幾趕住收工！！啲保安組成人鏈將我地呢啲唔願走既人一路向住出口推進…. 離場後我地就行返去地鐵站搭車返酒店。