17.04.2022 德國足球丙組聯賽 第 34 週 1. FC Kaiserslautern - 1. FC Saarbrücken Fritz-Walter-Stadion 賽果： 3:1 （1:0） 入場人數： 46,895 （5000 名作客球迷） 門票：21.50€ 更多相片
自 Saarbrücken 兩年前成功升上德丙後，佢地係丙組遇返好多舊對手。可惜撞正武肺，大戰連場但球迷無份入場。 FCS 一直都睇唔起同州既球隊，雖然 Homburg 同 Elversberg 可以話係死敵，但要講到真死敵就一定係鄰州既 Kaiserslautern。 今場仲關係到兩個州既面子之爭！
我地捕左一段時間捕到佢地有 general sale，當時只剩返近作客看台果邊有位，無諗太多就買左兩張飛。無耐 FCK 就宣布門票全部售罄！ FCK 既主場係 2006 年世界盃球場，球場規模同設備都可以話係國內數一數二，自從隊波沉淪後呢個球場都無咩點 full house 過。 今次黎到德丙遇上超過廿年無見既對手，球迷唔入場支持又點得呢！ 最正係賽事係復活節假期上演，睇完波第二日都仲係假期，贏波可以通宵慶祝；輸波可以自閉一日唔洗比人煩！
星期日食完早餐就出發，同平時返法蘭克福既路一樣，不過過左 Kaiserslautern 有個市郊既比賽日專用 Park and ride 停車場； 係 P+R 有免費巴士直達位於 Betzenberg 山上（！）既球場。 我第一次去 Betzenberg 係行上去，自始超憎呢個球場。 後來發現有 P+R 就發現佢既交通安排真心一流。 唔講世界盃果幾個星期，全盛時期佢地都要每兩星期迎接幾萬個球迷到場，唔安排好啲既話一定會癱瘓成個成市。 我地怕無位或者要等好耐所以開波前三個鐘就已經泊低左架車。 當時仲係好多架巴士係度排隊等接客，架車滿左就開車，離球場大約六公里／十分鐘既車桯…. 落車行幾步就到閘口！
我地個位係第 58 行…. 入場後要行四層樓上山頂，然後再要行多幾行先到我地個位！！！ 由於我地一早知佢地啲小食亭全部係地下同埋一定要買預付卡，所以就唔諗住買野食；又知道佢地山頂有廁所所以諗住一入場就攻頂去廁所先。 點知，山頂廁所唔係我地果區….. 保安話要落返去先要廁所 -_-
去完廁所終於可以返埋自己位睇住場內看台慢慢越黎越多人，兩邊對罵既聲音亦都越黎越響。 我地同幾個 FCS 朋友八到今場佢地準備左好多響炮同煙花，果然未開波佢地就已經係咁放響炮，之後仲掉落球場同擲左幾粒去旁邊既主場家長區果度，辣起哂所有家長團火。
去到接近開波，見到主隊既西看台啲球迷開始笠上紅白色膠袋，將成個看台染定紅白色。看台中間隨即有一塊大布升起，布上畫左一個拎左大聲公既男仔。 原來佢地球迷組織既 capo 最近突然離世，佢既兄弟朋友今日就準備左呢個 choreo 黎紀念佢。西看台係上半場一直都係紅白色，視覺上 FCK 球迷做得好靚，但聲勢完全唔掂。 真心唔知係我地離佢地太遠定點，真係完全聽唔到佢地既打氣聲。 間唔中見到佢地係龍門後有一少部分人會跳下跳下，然後係啲作客球迷抖氣時隱約聽到啲聲，要好留心仲要知首歌既節拍先估到佢地唱緊乜。 不過當佢地唱啲係人都識既歌既時候，全場四萬個球迷都會一齊跟住唱！多得其他球迷幫西看台搶返啲分返黎。
我地開波前兩個鐘就入左場，見時間仲早就一齊企係度。 點知開波後我地前面啲人唔肯坐低，我地要繼續企！ 不過見到啲球迷睇得咁肉緊都好開心，平時都會有人拍膊頭叫人坐低，然後大叫我比左坐位價錢架！
其實我地有啲擔心 FCK 贏波，朋友話我地知如果有咩事佢地會考慮搞到場波要腰斬（例如狂擲煙花落球場）。 到開波之後我地都無諗咁多，最緊要雙方看台有表演同埋場上場波好睇！ 第 17 分鐘，主場靠十二碼射入到一球領先。 半場完之前 FCK 仲食左張紅牌，諗住下半場應該到客隊表演。
果然去到下半場客隊就先狂攻，成功追和。 但唔知點解射入呢球之後佢地越踢越廢，廢到以為佢地先係踢少一個果隊。 57 分鐘主隊射入球靚波，全個球場既氣氛越黎越勁。 呢一刻 FCS 球迷仍然覺得自己有機會再次追和所以仍然好落力打氣。 點知幾分鐘後主場再入一球射成 3:1， 見到隊波表現完全失準，唔好要贏三分啦，一分都唔會搶到囉。 呢個時候作客球迷就開始發癲開始向球場擲野，我地呢邊既球迷係咁自發向住作客看台一齊叫 Scheiss Saarbrücken。好在場波最好可以繼續， 但啲作客球迷係 70 分鐘左右就已經慢慢開始執野。
去到臨完場時， Betzenberg 其中一個傳統出現了！ 每個球迷都拎出左一張紙巾然後拎住黎 fing。 意思係人地輸波咁慘慘要送張紙巾比人抹眼淚！ 😀 😀 係現場睇好好笑，好多張白色紙巾飄飄下～～～啲主場球迷今場用左廿萬個紅白膠袋加四萬幾張紙巾 😀 好在無人衝落場綁自己係龍門柱度姐！
球證吹雞後， 啲球迷好開心咁慶祝，幾乎無人離開球場！！！ 經過武肺既陰霾，可以係一個滿座既主場見證自己既愛隊咁樣收死敵皮，雖然我唔係佢地既球迷，但完全可以感覺佢地到底有幾開心。 今場波唔只係贏死敵，仲令到 FCS 升班之夢幻滅，同時又加固自己企係第三既席位，繼續可以一爭直接升班既資格。
完場後我地都企左差唔多成廿分鐘，見到啲球迷完全無意欲返歸咁，我地決定離場搵野食先… 返去 P+R 既巴士已經一早排哂隊等住接我地。 由離場到上巴士再上自己架車 20 分鐘都唔洗…. 好滿足咁過左復活節，第二日仲係紅日可以大覺訓！兩個星期後我地又搭飛機南下去睇波～～