16.04.2022
德國西南地區聯賽 第 34 週
Waldstadion an der Kaiserlinde
SV Elversberg - TSV Steinbach
賽果：3:0 (2:0)
入場人數： 2196 （約 15 名作客球迷）
門票：8€ 
更多相片

對上一次去莎蘭已經係新年，即係四個月前。 而對上一次入 Kaiserlinde 睇波原來都已經係半年前既事；中間有睇過幾場作客但估唔到原來已經咁耐無回過家。 有啲朋友因為無打針所以比我更加耐無入過場， 黎到而家終於可以一切如常咁入場！

今場波係復活節假，所以我地係莎蘭留左兩晚 （早知既話我地呢個復活節假就唔會留係德國…. 過多兩個星期話你知點解 😛 ）星期六可以早啲起身食個早餐就出門口，十一點鐘就同朋友係球場外既酒吧集合。 大約一點就慢慢向球場門口出發。

C2 看台幾個月前因為準備重建而要暫時關閉，本來企開 C2 看台既球迷全部過哂黎 C1 看台，好耐無見過一個企左咁多既 C1 看台！ 天氣仲要好靚，本來個天仲有好多雲同好大風，到我地入場後啲雲就越黎越少； 企左一陣個身都開始暖可以淨係著住件 t-shirt 都 ok。

計埋今場在內，今季仲有五場波。 我地同第二位既 Ulm 同分，但我地既得失球差好過 Ulm 所以排緊第一。 即係黎緊只要我地贏哂就可以升班！ 淨返呢幾場話硬戰又唔係，但無論你支持邊隊波都好，我諗你隊波總有啲時間會玩野， 你以為食硬三分既佢比人大炒，以為無可能贏既話佢又可以大炒返人。 所以我都唔敢將說話講得太盡。 但無論點都好，無論黎緊對手係上游定下游，我地既目標好清晰，就係要贏波拎三分。

好在今日隊波表現出佢地點樣企係榜首，上半場輕易領先 2:0， 下半場靠剛上場唔夠一分鐘既 Mustafa 射入第三球埋齋。 呢三個波一啲都唔負碌，特別係第三球由對方甩左個波後由左邊突襲， 去到禁區邊轉邊送個波去 Mustafa 腳下輕盪入網。

看台上既球迷亦都好出力打氣，好耐無試過咁樣一齊唱足 90 分鐘。 對面得十幾個作客球迷到場既情況下我地都有超過二千人入場！ 黎緊我地既對手都係降班區掙扎緊既 Aspach，Stuttgart II 同 FSV Frankfurt，而最後一場係主場迎戰同州宿敵 Homburg。 只要贏哂就可以升班！