03.04.2022 瑞士超級聯賽 第 28 週 FC Basel - BSC Young Boys St. Jakob-Park 賽果： 2:2 (1:0) 入場人數： 25,760 （約 1500 名作客球迷） 門票：48 CHF 更多相片
去得咁遠過夜就緊係唔會只睇一場波啦～ 星期六去完 Zürich，星期日就係邊境城市 Basel 睇多一場比賽。 尋日落完大雪之後，今朝起身竟然見到藍天同太陽，可惜當我地出得門口時佢又變返陰天同落毛毛雪。
FCB 張波飛好似德國咁包埋車費，即係今日我地唔洗買車飛就可以由 Weil am Rhein 搭電車過境去 Basel 做幾個鐘遊客先。 先沿住萊恩河散步，然後去舊城到睇風景，再到市中心 window shopping。 最後離開波前兩個鐘左右去左間餐廳食埋飯先出發。 唔知你知唔知阿華田係來自瑞士既呢？ 尋日係球場旁既士多買左枝凍華田黎飲，今日係餐廳配既甜品係熱華田，好濃厚好好飲！！！（好似話佢地係用熱牛奶黎沖華田）
係餐廳出面已經有電車可以直達 St Jakob 球場，係正門口落車唔會驚唔識路。 一路車就見到一大班球迷係度同啲防暴對待。 啲防暴既背後係作客球迷區既閘口，德國啲防暴好似通常手上無拎野，呢度啲防暴手上拎住既係橡膠子彈槍… 原來啲球迷唔係對待緊，只係等緊啲警察開路比佢地通過隧道行去球場另一邊，應該要等所有作客球迷入哂場先開路，以防有衝突。
個球場外圍勁醜，對住大路（即係電車站果邊） 係一座幾層高既大廈黎， 望落有種共產建築物既感覺，好似上年去黑山首都個球場咁。兜左半個圈就去到我地個入口，終於見到球場外圍既真身，係漲卜卜既半透明硬膠殼（積左好多塵灰灰黃黃咁）。 同尋日一樣嘟完飛就直行入場，無人搜身無人 check 任何野。
一入到場有一種身在香港大球場既感覺，德國啲球場通常係下層看台後面係小食亭，只有行入看台果個位可以望到草皮。St Jakob 既下層座位後面係好開揚既，你可以企係下層看台最後一行後面睇波，再入少少先係啲小食亭。
上到看台埋位後，直望可以見到作客看台，向左望就係同樣已經企滿左既主場球迷看台。 未坐定就已經留意到 FCB 準備左一個覆蓋成個看台既大型 Choreo，慢慢見到一班人著起哂同色 tshirt，然後又有啲人拎住旗仔，到差唔多開波時佢地由看台底向上拉起幾塊張膠布。 去到球員入場時，作客球迷先放煙吸引左我地既注意，影左幾張相後就聽到主場球迷係度倒數 3-2-1。 即刻轉去左邊望下…. 佢地倒數係因為有一部份球迷向天撒碎紙同紙條，我地只有幾秒時間去捕捉 choreo 完整一刻！
原來佢地將看台分左八部份，將所有可以用黎做 choreo 既材料集合為一砌成球會會章！！有邊八種？睇封面相既話由左至右： 紙條/膠條、長膠布、碎紙（所以佢地要倒數一齊撒紙）、海報、氣球、t-shirt/垃圾膠袋(平d）、橫膠帶/紙帶同埋旗仔。 好老實講我地睇返相認真睇返先知原來佢地係想砌個會章出黎，雖然效果最後唔完美，但佢地既創意同心思真係無可挑剔。
然後兩邊就間唔中放下煙～ 係 Basel 地區既球場內放煙火係完全合法。 尋日 Zürich 場波當啲球迷放煙時，球場會有廣播警告放煙係違法。 今場波係完全無廣播，全場有 pyro 放題！ 如果你想入場睇下有氣氛又有表演既歐洲波，強烈建議去睇瑞士啲打比戰。
有睇開歐聯歐霸既應該對呢兩隊波都唔會覺得陌生， 我成日講笑話有生之年一定要入場睇 Young Boys 聽佢地一班男人唱 We love you Young Boys~ 今日終於夢想成真！！！ 佢地其實通常都係叫自己做 YB。 隊名既由來係因為當時有一隊來自 Basel 既球隊叫 Old Boys，一班來自 Bern 既人好小學雞咁就組左隊波叫做 Young Boys 。德文既 Y 係讀 “Ypsilon” 如果下下叫 Ypsilon-B 咁幾難聽… 所以佢地將個 y 當 i 咁讀，所以佢地其實係叫 依b。 作為首都球隊同近年多次贏過聯賽冠軍，佢地既球迷氣氛都唔錯。
今場波除左球迷好睇，場波都好好睇，完全無悶場！！！ 雖然兩隊波都爭冠無望，但始終都係第二位之爭，雙方實力都差唔多，有攻有守。 主隊係完半場前先射入一球；下半場一開波客隊就追和。 然後仲有超靚入球直入同埋靚組織造成既入球。更正既係每個入球之後都有好多 pyro 睇。
臨完場個天竟然又開始落雪！ 去到就完場都無咩人提早離場，連我地都睇到好肉緊嘩嘩聲。可能係因為Basel 市既交通安排做得超好，啲人唔驚要等好耐先返到屋企。 一離場就已經有好多架電車等住接球迷離場，唔似 Zürich 咁電車同路都封左囉。 唔洗 10 分鐘就已經上左電車向返市中心出發，然後轉車返去 Weil am Rhein 間酒店拎車，最後出預期早左大半個鐘返到屋企。
回復正常既生活真好，希望可以用呢兩場波黎紀念武肺日子既完結。