02.04.2022 瑞士超級聯賽 第 28 週 FC Zürich - Grasshopper Club Zürich Stadion Letzigrund 賽果：1:1 (0:0) 入場人數： 15,327 （約 2000 名作客球迷） 門票： 70 CHF 更多相片
瑞士係一個人生必到既國家，12 年前曾經到此一（窮）遊。 上年武肺第二波爆之前都有諗過去瑞士幾日睇波，以為做左幾年野應該可以去瑞士豪洗一下，睇完酒店同車費即刻放棄瑞士（泊車20€一晚）。 上個月碌碌下見到今個星期有兩場好波，認真計劃下之前發現可以係德國邊境過夜，然後搭車過境就平好多，睇多兩睇就買左波飛。
由法蘭克福出發一上 A5 公路就見到路牌寫住 “Basel” 既方向，一路直落三個鐘左右就到達邊境城市 Weil am Rhein. 呢度係德法瑞邊境，繼續向南下就係瑞士，向西行就係法國！ 我地間酒店距離德瑞邊境 100 米都無，唔洗 70€ 一晚包免費泊車。 泊低架車行過對面街就係電車站，雖然我地仍然位於德國，但由於呢條電車路線係由瑞士公司營運，部售票機已經係以瑞士法郎黎收錢… （出發半路先發現我無帶銀包，身上完全無任何身份證明文件。 好在瑞士都係神根地區，過境正常唔會有人查身證份， 亦都好好彩無遇上 random check，同埋瑞士已經再無任何防疫限制，唔係呢程 trip 就玩完！）
首先由 Weil am Rhein 搭電車去到 Basel SBB 火車站，第一時間就係呼吸自由空氣！由呢個週末起瑞士解除所有防疫限制，連口罩都唔洗戴！ 上個週末天清氣朗，仲邀請左朋友黎屋企食飯，著住短袖衫坐係露台睇日落。 今個星期….. 氣溫突然下降都算，佢竟然一踏入四月同我黎落雪！！！星期五下午開始落，落到第二朝我地出門口都仲落緊。去到瑞士… 繼續落！
由 Basel 去 Zürich 呢程我地買左直通快車，只需 55 分鐘。 去到 Zürich 迎接我地既仍然係雪！不過落雪好過落雨，啲雪落係身上係乾既，或者只會打落身上然後彈走，基本上得鞋底係濕既，身上其餘地方都係乾爽。係雪中好浪漫咁係市中心行左一陣，去到湖邊搭電車去球場。
嘟飛入閘後有一班保安企係度，係德國既話就已經打開對手準備比佢搜身。 係呢度係可以直行直過，連袋都無睇過！！ 我地上網買飛時特登㨂個可以望到哂主客球迷區既靚位，點知主場球迷因為上星期搞事所以被罰唔可以企係自己既看台，今場佢地聚集係近我地個看台多啲。 視線都係好清楚既，只係一定要擰頭先可以望到佢地，唔可以睇波又睇人～
瑞士啲大球隊既球迷係球迷界好出名， 由於瑞士大部份地區都可以合法係場放煙花，只要㨂岩比賽入場就一定有野睇。 （就算唔合（足總）法，佢地都只會罰球迷唔會罰球隊，唔似德國咁拉埋球隊落水）。 相同片我地都睇過好多， 但要親眼見到先知到底場內氣氛係點。 仲有想知去到啲有錢國家啲球迷係咪都係睇落無工開咁？
入場時仲有大半個鐘先開波，主場球迷組織已經入哂場蓄勢待發，唱幾首歌熱身先。 去到作客球員同球迷入場熱身時佢地就開始互罵下咁。 雙方球迷今場好似分左工咁，主場球迷唱足全場，而作客球迷就黎視覺表演玩煙花。 班作客球迷應該都係唱足全場，但我地坐得太近主場球迷所以一啲作客既打氣都聽唔到。無論點都好，今場係兩年來第一次入場睇波係唔洗被 check 任何野，仲要兩邊都有有質素既 ultras 打氣。
FCZ 看台寫住佢地成日叫既口號 Nie usenand gah，上下一心團結一致。GCZ 就係看台前掛起一大塊寫住自己球隊名既大橫額。通常來自同一個城市既球隊，佢地既代表顏色都會有鮮明分別。 但呢兩隊波既顏色都係天藍同白色，係街見到 graffiti 要望多兩眼先知係來自邊隊波。
球員入場後， GCZ 球迷開始放煙，看台兩邊仲有煙花表演。 當我地目不轉睛向右望既同時，左邊既主場球迷雖然無準備啲咩，但佢地一直用叫聲黎助陣。上個月睇英國波時講過啲球迷唱歌唱幾秒或者成日唱到一半就突然完左，係 FCZ 佢地每首歌都最少唱 5-10 分鐘，仲要唔會越唱越細聲。 我諗成場波佢地只係唱左六七首唔同既歌，呢啲真心係 quality 既表現！
今場係第 278 場蘇黎世打比… 客隊雖然係贏得最多瑞士聯賽冠軍既球隊，但其實佢地今季先由乙組升班返返黎頂級聯賽可以同同市死敵較量。而瑞士地方細細唔係有好多球隊，超聯連埋列支敦士登既首都球隊 Vaduz 總共有十隊參賽球隊，每季每隊會碰面四次（主客各兩次）。
FCZ 上半場靠 VAR 得返黎既十二碼本來係大好機會入波領先，大家望住個波過埋對方門將以為入硬，有人仲已經 yeah 左出聲，點知中柱彈出！去到下半場場波先好睇返啲。 半場休息時去完廁所返黎個球場變左白色， 場雪越落越勁，差啲唔記得已經係四月，我仲以為就黎聖誕節！！
多得場雪我地可以唔洗靠電腦分析都可以睇到啲攻勢分布係點，下半場開波後，近我地呢邊塊草皮好快變返綠色，而對面一直都係一遍白色。 唔夠 5 分鐘，GC 先入一球領先。 主場狂攻之下終於係80 分鐘成功追和。 對 FCZ 黎講今場踢得堅差，佢地係聯賽榜遙遙領先已經捧住半隻盃，對手係下游掙扎緊要搶分護級，最後咁樣送兩分比死敵。
完場後場雪咁岩停左， 本來諗住搭電車返市中心，但見場外啲路封哂就決定跟電車軌行返去應該仲快，又可以等個身郁下暖返啲手手腳腳。 咁岩遇上主場 Ultras 咁岩離場，同佢地同一方向行左大約十分鐘。 沿路佢地好安靜咁咩口號都無嗌。 頭先咪話想知有錢球迷裝扮係點既… 瑞士球迷睇落真係有錢啲，同埋有文化啲 😀
行左大半個鐘由天光到天黑去到火車站，去左間餐廳食瑞士芝士焗薯餅 （Rösti），超好食～～ 但去餐廳食飯=銀包出血。 兩個日最後食左 80€ 左右，係德國食同一樣既野應該 40€ 左右埋到單….
搭一個半鐘火車返到去 Basel，再轉電車返去德國邊境過夜～ 第二日我地又要再過境去瑞士睇多一場國家打比 :-)))