17.03.2022 英格蘭足球超級聯賽 第 20 週 愛華頓 對 紐卡素 Goodison Park 賽果： 1:0 (0:0) 入場人數： 39,068 （約 3000 名作客球迷） 門票：44£ 更多相片
想當年一儲夠錢就搵機會去利物浦睇波，可以話曾經對利市非常之熟路，一度連地圖都唔洗睇就可以由球場行返去市中心， 45 分鐘既腳程係夏天黎講當散步係好舒服～ 事隔七年，終於再有機會返去利市。 好可惜唔係去睇利物浦，而係睇愛字頭。
之前咪話廢事日日去睇波無時間陪屋企人既，本來真係決定左只睇兩場波。 突然發現愛華頓仲有極少量波飛剩，仲要可以就咁上網買，真係諗都無諗就買左最後兩張連位。 想話帶埋屋企人去當 day trip 順便睇埋波都唔得。 雖然愛記係死敵，但佢地係市中心海邊起緊新球場，即係呢個球場好快就會拆，又始終呢個係一個好經典既球場，係佢拆之前係要去參觀下既。
星期四同屋企人食完早餐就揸車北上。 之前我都係搭火車或者飛機去利物浦，第一次揸車唔熟路又無留意過邊個可以泊車，上網睇話球場附近有 permit 先可以泊車，市中心更加唔洗講，咁我地就上 Justpark 搵左個車位 7£ 可以泊一日，離球場只需行十分鐘。 點知去到個車位附近發現隔兩條街大把免費車位囉，跟本唔洗比錢泊車！！！誤信左啲人話既球場附近=係正球場對出果條街，但我地從來都唔會將架車泊係球場旁邊…. 開波前係方便呀，但完場後隨時塞兩個鐘都未走到囉。
放低架車之後向大街方向行，唔夠兩分鐘就有路牌指向 Anfield。 我跟住個路牌行已經係 Stanley Park 既另一邊見到 Anfield。 然後向左望就係 Goodison. 老實講，我去過咁多次利物浦都從來無諗過要穿過個公園去望個藍色球場一眼。 今次突然就企左係兩個球場既中間…. 係德國生活左一段時間既我… 覺得好震憾。 咁多年都知兩個球場好近，但呢幾年見慣球場係位於市郊既，唔會隔條馬路就係住宅，唔會企係一個位可以望到兩個大球場…. 呢個亦都係利物浦市既特別之處。 同一家人可以有紅有藍，對德國人黎講呢樣真係不可思義。
兜去 Goodison 外面影左幾張相就繼續向 Anfield 出發， 七年之隔，球場外面唔再係爛地，好多地方都翻新左好靚，連個 fan shop 都大左幾倍！！！！！入去兜左個圈後見到上季波衫只賣 5£ （童裝） 大人10£，買多件當睡衣著都好～～～ fan shop 果面對面啲樓都好似重建左，唔同左樣？ 我地係對面馬路搭巴士去 Liverpool One。 今日係 St Patrick’s day， 但好在市中心都唔係好多人。 一落車就先去醫肚，食飽左就行去 Albert Dock，天公造美今日藍天無雲有大太陽曬住係海邊散步好舒服！！！ 然後就行返入內街搵下啲回憶，行到差唔多就搭巴士去返我地架車坐低休息夠就行去球場。
英國球場其中一個特別就係超窄既入口，入口外係公共地方，一作閘就係球場內範圍。 德國啲大球場通常係主要放東南西北入口，入左閘仲有好多走同空間，然後再分唔同 block 既入口咁。 我地張飛係山頂，行樓梯行左一大半先發現完全有電梯！？ 好先進呀！ 上到最頂就先買野食，都係 chicken balti pie, cheese and onion pie 之類，但呢度仲有 Scouse Pie! 唔知係乜但一睇個名就知係地區限定無理由唔試。 原來係薯仔肉 pie, 唔難食不同我真心對球場pie 無興趣。 食飽左就去我地個位度坐低。
我個位如果向右望出球場係會見到 Anfield 架！！！買飛果陣我地見到係 Restricted view ， 好驚係係正碌柱後面果個位，但我地個位好開揚，只係離遠條柱完全擋住左左邊龍門 😀 不過個波係邊個位入網對我黎講唔重要…. 睇到看台同球迷重要啲！
係球場內我都無諗住用利迷既角度去睇呢場波，純粹以 Groundhopper 既心情去欣賞場內既一切。 近幾年睇利物浦其實都唔係特別開心，最主要係因為見到隊波越黎越商業化，隊波變到好似一個 product 咁淨係用黎賺錢。 仲有擴建球場成功既背後都傷左好多當地球迷既心。 好在有高普聚得返個文化返黎。 但有時候真係會覺得我地而家唔似一個 People’s club, 公園對面果隊波先係 real people’s club.
今場波係自武肺爆發後，第一場唔洗出示疫苗護照，唔洗戴口罩仲要係滿座既比賽！！！！ 係兩年來第一場正式既足球賽事呀，內心其實好激動，久違幾萬人一齊睇波既氣氛！！！ 啲球迷一齊叫 Everton, Everton… 既時候真係覺得好正。 特別係我地個位近上蓋勁應聲，差啲就想話： 氣氛好似真係好過利物浦喎？ 不過幻覺黎既姐…. 咪又係英式打氣頭果幾分鐘就係威係勢，或者有攻擊後就會一齊叫幾秒 Everton 咁。
好在對方係紐卡素，週中帶左三千人入場，作客球迷永遠都 high 過主場球迷。 加上有 St Patrick’s day 既加持我估啲人未入場已經令到爛醉，唱歌唱得更加興奮，唱足 90 分鐘。 係場內我地係咁話終於見到真正英國球迷，有肥佬光頭佬，有著得好正式既，我地旁邊就坐左個拎住報紙戴住 flat cap 既阿伯，後面有個唔知有無十歲既小朋友都一口流利粗口咁狂鬧。
拖肥已經連輸 N 場諗住今日都可以見證佢地輸波，但客隊都唔係好爭氣攻極都攻唔入。 去到下半場球證無啦啦吹停左場波，見到啲工作人員圍住條龍門柱 （就係我地比柱擋住左果邊既龍門），以為有球員撞親。 然後聽到後面話有人扣左自己係條柱度。 事後睇返先知有個 Just stop oil 既 on9 仔用索帶綁住自己條頸係條柱度，啲工作人員要搵工具剪開條帶。 其間有另一個人係看台上衝落去打條友， 兩個事後都被帶離場。 大約十分鐘後場波終於可以繼續，去到近 90 分鐘時 Allan 食左張紅牌，諗住紐卡素應該有機啦卦？ 點知去到 90 分鐘都仲未有入球。
旁證指示加時 14 分鐘，好癲！ 睇到咁上下已經唔知到底仲有幾多分鐘，啲球迷就越睇越激動無人提早離場。 場波越踢就越有劇本既味道，就係踢少一個人既果隊上哂身然後借一個機會就絕殺對方。 果然，原本拍緊大巴既主隊開始黎料，去到 99 分鐘拖肥靠一個反擊入波…. 我都忍唔住拍左一下手，因為我堅唔想 0:0 完場，只係估唔到竟然係愛字頭入波…. 呢個入球將球場氣氛推到最高，突然之間個個一直企哂起身睇波唱歌直到完場後啲球迷都唔捨得離場。
我地都留多十分鐘先走，穿過幾條街返到去自己架車，一心以為自己好醒泊遠少少可以唔洗塞車。 點知好似得一條路可以上公路咁，塞左半個鐘先離開到利市。 返去到伯明翰附近又遇上封路，又塞左差唔多成個鐘！！ 返到屋企已經一點… 連睇三晚夜波真係好攰，明天終於無行程可以好好訓一覺。
今次一個星期既英國之旅好滿足，有屋企飯食，有茶餐廳食又有波睇！ 黎緊仲可以經常週末就去英國兜個圈～～～ 希望法蘭克福 T3 快啲起好等啲廉航可以返黎！