16.03.2022 英格蘭足球冠軍聯賽 第 38 週 高雲地利 對 候城 Coventry Arena 賽果： 0:2 (0:2) 入場人數： 15587 （501 名作客球迷） 門票：20£ 更多相片
去到英國既第三日，一朝早迎接我地既係烏雲大雨。 因應天氣我地安排左幾個室內活動，第一係去大型超市榮業行，入一堆香港用開既調味料，同埋買左一大包菜心！！！！！好耐無食過菜心啦！！！！然後就返去市中心既唐人街，一心諗住食茶餐廳點知星期三唔開，就轉戰旁邊既中華閣茶樓。
一上到去個姐姐就直接同我地用廣東話講樓下爆水渠所以無蒸物，好在我唔係特別好蒸點心，主要係想食乾炒牛河，係張印有正體中文既點心紙上剔左炒河、星州炒米、煎蘿蔔糕、炸粉果同凍奶茶。 全部都好好食 :'( 食完就係樓下麵包店買左個班蘭海綿蛋糕同朱古力卷蛋返去～ 德國都有卷蛋但係得韓式，一碌成 20€，但呢度街市口味卷蛋 5£ 咋！！！！食到好滿足咁返去，休息一陣我地兩個就自己搭巴士出發。
先搭大約十分鐘車程去到市中心既 New Street 火車站，去售票機拎預先買左既火車飛 （去英國一定要換返一次用黎留念！） 我記得以前一直都係 thetrainline 度買飛，佢有個 cheap fare finder 好好用，試過幾鎊由倫敦去利物浦，而家用返佢要收手續費同埋㨂去車站 print 車飛又要額外收錢？？ 最後睇下 West Midlands Railway 格下價發現唔洗比手續費又可以免費 print 飛！ 拎左飛之後就去 Krispy Kreme 買個原味冬甩，再係樓上個商場行個圈。 行到咁上下就去月台上車。
我地架車由 Birmingham New Street 出發然後會南下去到 London Euston，車程好以兩個鐘唔洗。 我地去 Coventry 中途站都係半個鐘左右，然後再轉車去到 Coventry Arena 係正球場前面落車。 但呢個橫風橫雨，轉車果陣凍到想死，去到球場一陣陣風打埋塊面度。 本來諗住可以開波前去球場旁邊既商場行下，點知兜左大半個圈都搵唔到入口， 成身濕哂已經好嬲。 最後直接入球場算。
呢個球場好多野食！！！有 pie，有 fish and chips （8£ 好好食！！！）, 有 burger 之類，不過我地食飽無耐唔肚餓； 我買左杯茶黎暖身， 係看台外面企到差唔多開波先兜返去我地個位。
高雲地利既主色係天藍色，係個球場會成日見到隻黃蜂 logo，因為呢個球場係高雲地利城足球隊現時同黃蜂欖球隊 (Wasps) 共用。其實高雲地利本來都有一個屬於自己既球場 Highfield Road，呢個球場曾經比德軍炸過，又遇過大火之後四個月內成功重建，去到 1981 年又成為英國第一個全座位球場，可惜最後都係敵不過金錢，球場係 2005 年關閉，塊地皮將會用黎發展住宅項目。 106 年既歷史就係咁完結。 接落黎既係一浪接一浪既惡夢，唔洗講就緊係有新球場先會賣同停用舊球場架啦。點知一開始就因為工程 delay 搞到要去借用人地個球場黎出賽，更加因為財攻問題搞到差啲失去球場既使用權。 因管理不善而導致球隊出現一大堆問題……
好在有一班高雲地利既球迷一直都對球隊不離不棄，我地有聽人講過佢地係 West Midlands 黎講氣氛算唔錯。 我地都帶住期待既心情入場睇啲球迷表情。 聽到佢地有人打鼓帶節奏係有啲驚喜！有人帶個氣氛即刻唔同啲！ 一定好過尋晚場波 n 倍先，我地身邊啲人都間唔中會一齊唱下叫下。
本來我地唔預候城會有好多人，但竟然都有成 500 人週中黎睇波。 賽前佢地排名近榜尾，黎到季尾要出力搶分，估唔到就係今場輕取高雲地利…. 雖然我對兩隊都無咩興趣，但真心好想候城輸波，最主要係因為佢地個龍門竟然一開始就已經玩拖時間戰術，睇到好燥！！！仲有啲球證對眼好似全部都有問題咁，對主隊勁唔公平囉…
完場時場雨終於食左，急急步去返火車站諗住可以搭早一班得一班。 但回程個月台要兜勁遠先可以去到，我地唔識路跟保安佢一開始仲指我地要過橋再兜返座山先得。 後來我地跟人爬斜路行捷徑，唔洗十分鐘就到達火車站。 越行就覺得越唔對路，火車站無咩人既？ 平時睇完一場波唔係會好多人等搭車返屋企架咩？
原來大部份人都係揸車（球隊係咁叫人唔好揸車，要搭交通工具減少塞車），原因係完場後係要等 45 分鐘先會有火車。 可能係場波既重要性低到唔需要開一班特別車黎接球迷走…. 的確我地係暴風下企左 45 分鐘都係得大約 2－30 人係度等車。 成個感覺好差….. 去到 Coventry 要轉車，我地返 Birmingham 班車 delay 左，先黎一班同樣去 Birmingham 既火車 (20min vs 30 min)。 我地借啲意跟大隊上呢架車最後早左10 分鐘返到去～ 返到屋企仲有熱湯飲，係英國越黎越有家既感覺。