15.03.2022 英格蘭足球冠軍聯賽 第 38 週 伯明翰 對 米杜士堡 St Andrew's Stadium 賽果： 0:2 (0:1) 入場人數： 15,852 （2800 名作客球迷） 門票：20£ 更多相片
2022 年二月，我地係德國搬左屋，細屋搬大屋，搬左去一個好好多既市郊區；三月，我兩老都正式由香港搬去英國，最主要都係想住近啲我同我細佬，由十二個鐘機程變到一個鐘機程，另一方面就係香港而家真係唔係人住。
兩老搬到英國，將來都無咩特別原因會吸引我返香港，要食既話我去英國啲唐人街食仲好，想食日本野法蘭克福都有唔少好食既日本餐廳；如果要飛十二個鐘不如直飛日本仲好 🙂 好好彩係香港出事之前可以帶到我另一半遊盡香港，當時仲係學生既我地有的是時間，一留就留係香港幾個星期，去左好多我自己係香港咁多年都未去過既地方。
我對上一次見屋企人已經係 2019 年 12 月，就係傳緊中国爆緊武肺既時候。再過幾個月就開始全球大爆，開始 lockdown，開始 work from home，plan 個 weekend trip 都要諗定 plan abcde 如果突然又封城咁點，如果我地賴左野咁點。 當我地諗住咩都唔怕啦，諗下照返香港家居隔離當陪下屋企人都好，點知原來只可以住隔離酒店，哪有錢？
鬧下鬧下，講下講下，我屋企人就話佢地決定左去英國。 咁岩我又見到 Ryanair 有平機票， 9€ 一程，來回 20€ 都唔洗…. 諗都唔諗就即刻買左先。（我地買左上年12月去倫敦來回機票 200€ 🙂 仲要加多70€ 改期）就算最後去唔成蝕左20€ 都唔會肉痛。 不過佢咁平呢，一來係飛 London Stansted，離倫敦都要一個鐘車桯，二來就係只包一個可以放落座位底下既行李。係呀，連 7kg hand carry 都無，唔可以放上頭頂架。 不過我地飛呢程佢無捉得咁嚴… 但都唔敢搏囉。
去到出發日子越黎越近，我地就開始睇下有咩波睇，好好彩今個星期有週中波，可以去睇伯明翰 （但我其實係小半個維拉 fan, 加上謝拉特而家執教緊維拉！！！）。買多兩張飛等屋企人到埗就可以去睇下波。 我之前雖然係英國都睇過幾場波，但我幾乎無試過自己買波飛。 睇過幾場利物浦係跟香港官方球迷會買，睇過獌係朋友唔知係邊度 r 到人地張季票拎黎去睇，睇維拉又係咁岩識人可以有飛睇，米禾爾就係球場門口買。 本來睇中左三場係 Birmingham 附近既比賽，伯明翰、高雲地利同埋狼隊定唔知西布朗。但諗諗下覺得難得見到屋企人都係唔好日日跑去睇波，加上英超既話又唔知易唔易買。就一早決定左睇 Brum 同 CCFC. 因為係英冠同埋唔係咩大球隊，所以買飛好簡單。 上官網開個戶口，入哂個人資料就買到。 不過伯明翰個球場而家只開一半（球場下層用哂黎放廣告），所以都未必場場都有飛剩。
星期一我地凌晨三點就要起身，四點出門口，五點左右去到機場； 七點上機，七點半（連時差）落機。 大約九點拎到架車，十點半去到希斯路機場接我爸媽，然後就上伯明翰。 路上雖然多車但一啲都唔塞，大約一點就去到新屋。 第一日既行程去 IKEA 同超市買必須品，係英國係完全唔洗戴口罩！！！！佢會建議你戴但都無咩人戴，一開始我地都驚驚地戴定一個係身同埋怕自己會唔慣無啦啦係多人地方唔戴罩，但好快就習慣左… （後來返到德國即刻覺得德國係地獄）
第二日先休息下然後再去超市買埋第一日買唔切既日用品，然後就搭車出市中心行下，慢慢向球場方向出發。 由於兩老龜速慢行所以我地 miss 左架巴士， 睇 google 見到有另一架巴士都可以去到球場，同時問左一個戴住伯明翰冷帽既人去確定下。 佢上車果陣都問個司機係咪去到球場，但司機話封路未必停到果個站，但講左一堆野話唔知可以係邊個站落車。 （頭果幾日仲未習慣到啲千變萬化既英國口音，有時我地完全唔知佢地原來講緊英文） 去到某個站，個路人就叫我地一齊落車，指比我地睇要向邊個方向行，佢就好快咁走左。
由落車行到去球場行左差唔多廿分鐘囉… 上到山去到個球場，但原來我地個位係球場既另一面，要再兜一大個圈先去到自己個閘.. 途中經過 fan shop，我爸買左啲紀念品紀念佢係英國既第一場波！完全唔明點解佢以前係英國既時候可以一場波都未睇過…?? 可惜今場只係英冠又坐唔滿，無得感受萬人齊噓既感覺。 伯明翰現時係中下遊徘徊，而米堡就係中上遊。 我爸話佢要支持主隊所以買左主隊贏 2:1。
以前睇利物浦時，一直覺得晏菲路最有氣氛，利迷氣勢最勁～ 無咩特別留意過其他球迷。 後來對球迷文化開始有深入既認識後，主要都係留意歐洲既球迷文化，已經對英國果面無咩興趣。 有幾隊波係歐洲都幾出名，例如水晶宮同格拉斯哥流浪。 今場波伯明翰雖然係大城市，但伯明翰城同其他球隊比較個規模同 fan base 其實相對係較細。 係場內亦都容易感受到。 而客隊係週中動員到近 2800 名球迷到場為球隊打氣，成場波就係靠佢地搞氣氛。
英國職業球隊既球場通常都好四正，睇慣左德國同歐洲啲有圍欄既球場，黎到英國見到看台同球場只係一條欄杆之差，呢個感覺好正。 係看台上無人食煙又唔洗怕比人掟啤酒，但英國人侮辱人既功力真心世一，連小朋友都識粗口橫飛。 係機場周圍都貼哂告示叫啲人注意自己既言語，係巴士又有，係 d 超市 cashier 又有，係球場場外有，場內都有。 好似要提啲蝗唔好周街柯屎咁，不是常識嗎？？
場波其實無咩特別， 只係睇左全場波我都要擰個頭向左搞到條頸好攰。 米堡上半場先由我地呢邊向左攻，佢地又唔係㩒住伯明翰黎攻，但主隊完全搵唔到機會埋門。 我爸媽本身都已經因為時差所以好攰，加埋差波麻麻地搞到佢地都差啲合著。米堡上半場先射入一球波；近完半場時佢地入左球越位詐糊， 我仲笑我爸輸錢，點知取消左個入球佢地叫緊糊。
半場時我地入左去小食部買熱飲暖身同食球場既 pie! 係 instagram 有好多人除左用 #groundhopping 呢個 hashtag 之外，仲有個英國人成日推人用 #chickenbaltichronicles ，我地一齊都唔知到底係咩意思。 直到今日我地想買 pie 時發現。。。！！！ （我睇過咁多場英國波都無係球場食過野）。。。 其中一個 pie 叫 chicken balti，即刻恍然大悟！！！！ 又即刻買左個黎試… 完全即係咖哩雞pie??? 係幾香口既，但我對呢啲飛機餐咁既食物無咩興趣，個酥皮唔新鮮焗到淋哂覺得好嘔心。
食飽就上返看台繼續睇埋下半場，有野暖下肚之後兩老都有返啲精神。 下半場好睇返少少，開波無耐米堡有個十二碼， 我叫我爸仲唔把握機會拍下片同啲朋友分享下，但佢話佢就黎輸錢無心情 😀 點知米堡竟然射唔入！！！ 成個球場即刻有返啲氣氛，笑死。 可惜主隊大難不死係無後福既；最後輸多一球仲要食張紅牌。
完場後我地就搭巴士返屋企（！ 我係英國有屋企！！） 我同佢地講下次我地要睇維拉，球場靚啲場內有氣氛啲同埋有謝拉特～ 黎緊幾日就朝早去買立雜野，做下遊客， 晚上就去睇波。 之前去過幾次伯明翰但都無遊覽過個城市，今次發掘到唔少地方可以下次去 chill 下。
