13.03.2022
德國足球甲組聯賽  第 26 週
SG Eintracht Frankfurt - VfL Bochum
Waldstadion Frankfurt
賽果： 2:1 (0:1)
入場人數： 24,000 (約 1500 名作客球迷）
門票： 免費
更多相片

賽前既星期三我請左假，攤係梳化碌電話，突然收到封 e-mail 話 RMV (呢度既地區公共交通公司）送法蘭克福波飛，用平時買車飛既積分可以換兩張波飛。二話不說無特別留意佢時間就登入換左先，我已經算係秒速登入但個網都已經塞塞地， 花左大約五分鐘左右就已經收到電子波飛。

可惜場波仍然要跟武肺規矩，一來只限半數人入場，二來球迷組織唔會入場。 但有免費飛去睇德甲都唔會蝕既，特別係張波飛包埋車費，當有個原因出街行下、遊下車河、入場食個包都好。

兩年前 RMV 都有送過波飛，當時係睇歐霸對 Tallinn ， 個位就麻麻係角落頭。 今次送既竟然係上層中線靚位，同電視角度差唔多，望邊都好清楚！

開波前法蘭克福先為剛離世既球隊名宿 Jürgen Grabowski 致敬，呢位名宿係法蘭克福既會歌都有被提到，每位法蘭克福球迷都一定曾經提及過既球員。 球迷組織雖然無入場，但都整左塊橫額掛係西北看台上向 Grabi 告別。

客隊 Bochum 帶左唔少球迷到場；雖然佢地既球迷組織無帶任何打氣物品，但都見到佢地企埋一堆間唔中帶領其他人一齊唱下歌。 成場波佢地既打氣氣勢可以話好過主隊。 後來佢地仲要先入一球波，唱歌越黎越大聲。

點知下半場一開波就失左個烏龍球送分，呢個時間啲主場球迷終於都出下聲叫下球隊名～ 然後去到 52 分鐘鎌田大地幫法蘭克福反超前！ 最後2：1 完場。

老實講，今場波其實真係無咩野好寫，球場看台上半層坐左幾堆免費入場既球迷，大部份位置都係吉既，個諗個好慘好冷清。 聽其他人講咁既氣氛就好似入場睇德國國家隊咁… 間唔中有堆人唱歌唱幾十秒然後就安靜十分鐘咁。

完場都係無野睇好快就走左，去到火車站要等成 20 分鐘先入車返去市中心，另一邊月台既火車仲要 delay 兩個鐘，完全唔明點解啲交通安排可以咁差！！！不過好在都趕到拉麵店關門前入去食返碗麵先再返屋企。

訓幾個鐘去到凌晨三點我地又要起身啦，事關我地要搭早機去英國接屋企人；同埋一口氣連睇三場波！！