04.03.2022
德國西南地區聯賽 第 27 週
1.FSV Mainz 05 II - SV Elversberg
Stadion am Bruchweg
賽果：0:2 (0:2)
入場人數： 810  （約 250 名作客球迷）
門票： 6€ （企位）
更多相片

黎到 2022 月 3 月，歐洲終於慢慢走出武肺既陰影。雖然係德國每日都仲有十幾二十萬人確診，但政府已經訂立三步放寬限制，去到 3 月 20 日將會係解放日，唔會再有咩 2G3G 限制，只會要求民眾係室內戴口罩。 而比賽當日就係第二步既開始，主要針對娛樂場所放寬限制。 我地入場前仍然要被檢查針卡，係看台以外地方要戴口罩。

今場波係榜首既 Mainz 二隊迎戰排第二既 Elversberg，係對爭升班好重要既一場波。 賽前我地踢少一場落後四分，無論如何點都要搶到分返黎拉近距離。 正因為呢場波好重要，唔少球迷都想跟隊波去作客，連球會都出一分力。 平時球迷巴士車票要十歐，今次有球會補貼車票半價！即使係星期五晚既比賽，無阻球迷們想去助陣既心情，三架大巴都滿哂！ 球會仲每人分派黑白旗仔希望可以係人地個場度黎一個黑白旗海。

大家到場後都超興奮，好耐無咁多人一齊搭巴士去作客！ Mainz 二隊既球迷係佢地一隊既舊球場，細細地每附合德甲規定，就連作客看台都有上蓋！ 我地聚哂大部份人上去坐位區，好開心竟然可以係莎蘭以外有咁多人一齊去作客睇波～ 大家一齊唱起歌黎堅有氣勢！！！！

近期因應俄烏戰爭，每場比賽前都有一分鐘靜默儀式，最近睇左幾場波場內既廣播員都會代表球隊球員同球迷講下對戰爭既睇法，希望戰爭快啲平息。 一分鐘完結後，我地就開始黎料唱歌打氣。 多得個看台上蓋令到我地聲勢增強多幾倍！

開波前其實大家好緊張亦都唔敢期待太多； 因為我地係 Bruchweg 既戰績麻麻，加上通常我地動員到全村人黎打氣時隊波既表現就會反常，一係就踢屎波，一係就要雖敗猶榮臨尾香飲恨。 一開波我地真係踢得好好，㩒住人地黎攻，一路都側身睇波，一路好驚對面一個反攻我地就玩完。 去到 20 分鐘，我地一個勁流暢既組織由中場分波去左路，再傳入禁區輕輕射入，全部都係一腳波！！！！ 大家一路慶祝一路唔敢相信咁輕易就入左波？？

SVE 有個令球迷又愛又恨既前鋒 Koffi，一時賓迪基上身門前兩碼飛機，但一時又神來之筆拯救成隊波。 今場一如以往唔知佢想點，成日慢兩拍咁比波又唔岩位，但球迷們又成日好中意9叫佢個名要佢加油。 臨完上半場前我地又有個機會，見到 Koffi 篤中左個波慢慢碌緊入龍門咁， 但又見到個龍門飛撲好似救到，然後 Koffi 同啲球員向住球角旗方向踢我地先意會到個波入左網！！？ 看台上個個都慢左兩秒先慶祝，大家都 Koffi??? Koffi!!!!!!!!!! 笑死 ，成件事好 Koffi, 好似無人預個波會入網咁。

領先一球最危險，多謝 Koffi 幫我地入多球拎個 buffer. 本來驚會好凍所以著左勁多衫又戴埋手襪，點知又唱又跳到出哂汗，有人仲係 3 度之下淨係著住 t shirt?!

下半場諗住我地踢得咁好，佢地向我地呢面攻應該可以唔洗側身睇波。 但主隊出盡力想反擊，好在我地既後備龍門上哂身救左好多球靚波！！！ 不過我地都唔係見領先兩球就泊大巴， 一路都組織左唔少攻勢， 今場波左右柱同門楣都中哂，如果唔係有兩球在手， 呢三下就會係之前所講 typical 飲恨贏唔到三分果類。

看台上既球迷好落力咁唱足哂 90 分鐘！ 尾段越唱越有，時間過得勁快，球證吹雞完場！球員們即刻衝過黎同我地慶祝，好似贏左冠軍咁 😀 大家都超開心～～～～ 我地成功搶三分追到踢少一場波只落後一分！！ 淨返仲有 11 場波… 如果我地可以一路踢到今場波既水盡，下季我地可以係德丙見 ！