05.12.2021
德國西南地區聯賽 第 21 週
Kickers Offenbach - SV Elversberg
Stadion am Bieberer Berg
賽果： 3:1 (1:1)
入場人數： 5171 （30名作客球迷）
門票： €13
更多相片

住左係法蘭克福郊外三年，終於撞岩時間可以係我地既「地區主場」度睇 SVE 作客。 如果唔係武肺我地應該會善用月票搭車去球場，不過而家都係揸車去球場好。

由屋企到球場車程只需 20 分鐘， 係作客球迷停車場泊好車就要行過幾十個泥氹先去到球場。

最近因為武肺所以每日都有新既措施，除左 3G 之外而家仲有2G Plus ，即係打左針都要做測試。 而賽會宣佈企位要 2G+， 坐位 2G 就得。 咁我地就諗住比多少少錢買坐位算，想入場支持球隊爭分升班。Offenbach 竟然賣大包話會以企位價錢去賣坐位價錢！

其實我地本來有哂心理準備可能又會暫停甚至腰斬賽季，或者賽事要閉門作賽。 德甲大部份都要閉門，但足總好似學識左唔應該用同一把尺去度職業聯賽同非職業聯賽。 職業聯賽就算閉門都仲有電視轉播收入，但低組別球隊你要佢地閉門即係想佢地死。 而現時地區足總都有有限度比球迷入場，所以我地黎緊都仲可以間唔中去睇下波！

今日陽光普照好好天，入到場仲有可以曬下太陽。 Offenbach 既球迷無咩特別，但勝在人多同球場夠細，好容易集到氣同球迷一齊唱啲簡單既歌為球隊打氣。 我就對隊波無咩好感，更加唔中意黎呢個球場，因為每次都係激氣而回。

今次…. 都唔例外。 我地先黎個超靚 volley 勁射入網領先一球。 本來都仲踢得好地地，點知送左個勁無謂既十二碼比人，然後就越踢越差。 唔明點解可以完全控唔掂個波，又完全無身體，比人掂一掂就彈開左或者跌低。

主隊越踢越有… 最後成功反超前炒我地 3:1… 完場後大家都問我地做乜要浪費時間黎捱凍睇波….. 就係咁睇左我地今年最後一場既 Elversberg。最近好似睇親都輸波咁，係咪我地剋住隊波？？