28.11.2021
比利時足球甲組聯賽 第 16 週
KRC Genk - Club Brugge
Genk Arena
賽果: 2:3 (0:1)
入場人數: 18.173 (約 1000 名作客球迷)
門票： 27 （坐位）
更多相片

係 Charleroi 留左一晚，第二朝先係酒店附近食個法式早餐配一杯比利時熱朱古力，走前買多個牛角包帶走，然後就向荷蘭／德國方向出發， 大約兩個鐘車桯就到達 Genk。

落車後要行大約十分鐘路程先到球場， 對比起尋晚 Charleroi 場外安檢既安排，Genk 做得好好多。 閘外勁大個檢查站，最少左二十條隊可以比人㨂黎排，每條隊有兩個工作人員 check 勁流暢咁就過左關。 通過一關之後就見到一個巨型藍色鐵盒….我指藍色既球場外圍。 搵到自己個區就入閘啦。

入場後我地就好快搵自己個位坐低，主隊球迷組織係我地既左邊，客隊就係右邊遠處既角落頭。 球場外貌雖然唔靚，但入面好是正。 四邊都有兩層既看台，場邊同球場草地無距離～ 黎到荷蘭地區，佢地既文化都更加接近荷蘭，就連球場內既音樂都荷蘭化，佢地淨係播 Techno 音樂，好似去左第二個世界咁。

愈近開波啲球迷之間既火藥味就愈重，雙方開始唱歌互相對罵。 雖然今場係 Genk 主場，但以我地所知 Brugge 既球迷係比利時算數一數二，佢地既氣勢應該唔會差得去邊。 Genk 有個日本球員伊東純也，我地前面有幾個後生女拎部巨型相機追住黎影相…. 勾起左一啲童年既追星回憶。 而家老啦。。。。對啲小朋友完全睇唔上眼 😛

主隊係第 12 分鐘就先射入一球… 球場播出 techno 同係場邊噴火慶祝。點知球證話要睇 VAR. 又係反白眼既時間… 明明見到佢睇完之手勢係判入波？就連主隊球迷都再慶祝多次，但原來係犯規在先唔計入波。 最後係客隊成功開齋，點知去到半場完前食左張紅牌踢少一個。

下半場開波主隊就當然趁人多優勢狂攻啦，攻下一球，然後又再射入第二球。 跟住佢啲 techno 音樂跳舞 （拍左片返到屋企聽左幾次） 唔知啲作客球迷知道自己大勢已去所以無咩再點出力打氣。 老實講係有啲失望，但出奇地 Genk 既球迷表現十分好，更加成功帶動到其他球迷一齊出聲唱歌。有好多好易記既歌都比佢地唱到洗左腦，到而家都會哼下佢地啲歌。。

好開心可以有入球 show 睇，正當我地以為主隊會再入多幾粒既時候…. 五分鐘後 Brugge 搵球機會突襲追和！當時仲有大約十分鐘淨，主隊要入多球應該唔係難事… 點知客隊又再射入一球成功反超前，踢少一個都可以反敗為勝！！！！ 我地兩日睇三分鐘總共有 16 個入球！！！班作客球迷終於都出返聲唱下歌，但個氣勢始終都唔係我地想像之中咁好。

睇完呢場好波，我地就要離場去方架車度返屋企啦～ 一離開球場就即刻剝左個佈滿水珠既口罩….. 又成功捱過一場波。 係條街度塞左半個鐘都行唔到一百米，最後要夾硬攝入內街行回頭路先成功離開 Genk.. 又要穿過荷蘭再經過科隆返到法蘭克福。 今年最後一個足球之旅以 16 球波完結，好滿足！