27.11.2021 比利時足球甲組聯賽 第 16 週 Sporting Charleroi - RSC Anderlecht Stade du Pays de Charleroi 賽果： 1:3 (0:1) 入場人數： 10,816 (約1500 名作客球迷） 門票：23€ 更多相片
上回講到我地好即興咁去左睇史浩克，一完場就向西南方向出發去比利時。 中間要穿過荷蘭，大約三個鐘後我地就到左 Charleroi！
途中見到有人 check in 左另一場比利時波，心諗唔係真係又黎世界真細小嘛？ 我話佢知我地去緊 Charleroi，佢好快就覆我佢都係，然後發現大家買飛都係買左同一區，只係相隔兩行！！
我地係 Charleroi 市中心訂左一晚酒店，因為今晚場波睇完都好夜，同埋明天回程時可以順路睇多一場波～ 係酒店 check in 後，休息一陣就出去搵地方醫肚。 係比利時要食咩？ 當然係薯條啦！！ 但唔知點解… 完全搵唔到薯條店。 咁諗住去球場小食亭買野食算啦… 去球場路上無啦啦有人係度 hey hey，原來係撞到岩岩睇完另一場比利時波既朋友。
佢話佢地去緊薯條店，咁我地都搵唔到野食就跟佢地行。 我地一見面就即刻講返五年前係香港同多哈一齊睇波，四年前係德國都一齊睇過場德國盃，然後今次就係比利時相遇～ 佢地比我睇地圖間野係邊，話好近球場。 但頭先明明我地就到球場， 佢地帶我地行回頭路，穿過左十幾條街，行左成十五分鐘…. 終於係條巷仔搵到一間好 up dup 既薯條店！！！！ 啲男人叫左中 size ，我叫左細 size， 一路行一路食。
原來頭先我地兜左勁大個圈，由薯條店行多兩分鐘就有條橋，一過橋就係球場囉。 行到去球場我差唔多食完啲薯條，覺得自己超勁。 但後來睇返張單先發現佢比左小朋友 size 我 ._. 唔怪之後我食得哂啦….
比利時係歐洲第一個國家發現 Omikron 確診… 同德國一樣過去幾個星期既確診率係咁爆升，所以佢地由原來放寛哂所有措施到而家要重新黎過。 本來我地好擔心佢地會宣布閉門作賽，感激佢地仍然比球迷入場，但所有入場球迷都要有疫苗護照同戴口罩。 反正天寒地凍，有個口罩暖下塊面都唔算太差。
其實我對呢啲措施無咩所謂，但佢地安排得勁差囉。 Ok, 你想確保場內所有人都要健康所以要 check 左先入得場。 但場外個個係堆一哂一齊咁爭住入場… 勁反智。 當時離開波只有大約半個鐘，好擔心咁多人塞係度排隊會唔夠時間入場。 所以我地夾硬迫入去攝下攝下唔洗十分鐘就入到直路尾，見到佢地好認真咁要 scan QR code 同對身份證先可以再嘟飛入場，排係隊尾果啲應該唔會係開波前入到場囉。
上到看台就見到主隊球迷組織係我地左邊龍後後，而作客球迷就係我地既右邊龍門後。 除左我地呢邊既主看台有兩層之外，其餘都係得返一層。 呢個球場係 2014 年係荷蘭-比利時歐國盃既其中一個比賽場地。 同其他比利時球場一樣，比賽場地都為左歐國盃加建，Charleroi 球場一度加層到總共有三層。 直到歐國盃完結就拆返加建既看台得返一層去慳返維修收費用。
本來以為戴住口罩係好事，但因為內暖外凍，入場後未開波個口罩就已經積左勁多一滴滴既水珠。 好在我地係戴唔貼面既韓國口罩，口鼻唔會掂到積落既水珠，但有一兩下唔小心掂到啲水珠真係覺得好嘔心… 完全唔知其他戴普通口罩既人點樣可以接受到？？
就係我研究緊其他人既口罩既時候，雙方球員開始入場。 主場球迷組織打開準備左既橫額，叫球隊為大家爭取三分！然後係同作客球迷同時間係看台上放煙。 眾所周知比利時係雙語國家，布魯賽爾以北係講荷蘭文，以南就講法文，東邊近德國既地方仲識講德文。 Charleroi 係來自法語地區，而 Anderlecht 係來自荷蘭地區。雙方球迷即使係來自同一個國家，但打氣文化已經有好大分別！
Charleroi 就連我地買薯條同入場時同人溝通都要講法文， Petit frites, oui, merci… 佢地唱既歌都係法文，而客隊唱既唔係荷蘭文… 而係英文！ 唔知你有無去過比利時，佢地好多地方既建築都好重英國味，球場位於住宅區既中文，而住宅區有好多由紅磚而建既排屋等等.. 淨係睇相會以為係睇緊英國！ 不過始終都係比利時球隊，佢地都有一兩首係法甲常聽既打氣歌 Olele, Olala， Allez Allez Allez 果啲。 但最洗腦既係 We are Anderlecht 同埋 Everywhere we go.
再加上 Anderlecht 踢得好多主隊好多，作客球迷就更加落力打氣。 上半場先領先一球，下半然領先兩球。 Charleroi 雖然追返粒但都禁唔熄客隊團火。 去到完場前球證用 VAR 判左個十二碼比客隊，真係好憎 VAR. 係電視睇你可能覺得唔錯，但係現場既球迷完全唔知發生咩事，成個感觀真係好差。 有幾場波我地係電視睇既VAR 都完全唔知用途係乜，明明睇唔到有犯規但球證都照判犯規？？？客隊最後射入埋個十二碼以 3:1 輕鬆全取三分～
離場後我地冒雨行返去酒店，經過漫長既一日終於可以攤低休息下！！！ 已經唔記得上次係幾時一日內睇兩場波，係武肺疫情下實在難得，亦都唔知下一次會係幾時！！！ 明天仲有一場波等緊我地，過埋呢個週末我地可以又要等到暑假先可以再入場啦….