27.11.2021
德國足球乙組聯賽  第 15 週
FC Schalke 04 - SV Sandhausen
Arena Auf Schalke
賽果： 5:2 (0:0)
入場人數： 46.319 (256 名作客球迷)
門票： 12€ （企位）
更多相片 

今個週末係武肺未再爆之前決定左用今年淨返果日假黎個 long weekend 去比利時睇兩場波，但去到上星期睇 SVE 作客 FCH 時見到 Sandhausen 球迷，講起佢地今個星期會第一次作客史浩克，問我地有無興趣一齊去。作客史浩克球迷…. 有得去 Auf Schalke 就當然一定要考慮下！

比利時場波夜晚 8 點 9 先開波，德乙就 1 點半就開波，如果一切順利既話行程上唔會有咩問題。 諗左兩諗就即刻上網買飛， 12€ 就可以去睇史浩克！ 雖然要做卧底，但都可以當係難得一次機會可以去作客區參觀下呀～

比賽當日 6 點半起身，食完靚早大約八點就起程， 大約 11 點半到達球場外既停車場。 過去咁多次都係搭火車同輕鐵去球場，今次係第一次揸車直達。 佢地既配套做得幾好，如果開賽兩個鐘前入閘既話就可以免費泊車～ 入閘時有人會比張飛仔， 出閘時比佢睇下就睇。 就算要比錢泊車都唔算貴，只需 5€！

為左慳呢 5€ 同避開人群，我地一到達就入左球場。 買埋野食同野飲去到看台得幾個人，慢慢望住個球場越黎越滿， 但望住北看台都心知不妙…. 無人掛橫額無人準備任何野。 我山長水遠黎到，竟然無 UGE 睇！！？ 但其實出發前已經估到… 最近因為武肺再爆所以球迷必須有 2G 證明先可以入場，大部份球迷組織都杯葛疫苗護照… 我地當中都有人因為無打疫苗所以唔可以黎睇波。

開波前大約半個鐘，我地大部份人都齊人啦。 Sandhausen 我地幾年前去過主場睇佢地對 Aue，當時仲未識任何人，佢地既小小球迷組織都仲正正常常咁。 但佢地兩年前內訌，宣布解散組織。 呢段時間佢地都有慢慢籌備組織新既組織，但未有實質行動。 所以今次我地跟佢地到史浩克作客可以話只係陪佢地企係度睇。 本來我以為好多球迷會借呢個機會去平睇史浩克，但最後得二百幾個人到場…

過左無耐，球迷開始播礦工之歌同會歌，我只可以係心入面一齊唱… 主場球迷無左球迷組織既帶領下，大家只可以好似英國球迷咁靠大少部份人帶起唱歌，唱黎唱去都係啲 schalalala 既歌，雖然無咩特別，但佢地期唔中可以帶動到全場大約四萬人一齊唱，對我地呢啲鄉下仔黎講，淨係用聲量都已經夠哂震憾！

成場波都好好睇，上半場無入波但雙方有攻有守，只係送唔到個波入網。 去到下半場開波唔夠兩分鐘，客隊成日偷雞開齋… 全場淨係聽作客球迷係度慶祝，雖然我係卧底但都為朋友鼓掌～～ 就係呢個時候… 主隊球迷終於訓醒開始識踢波… 十分鐘後先追和一球，過多五分鐘就反超前。 然後客隊唔小心黎個老烏… 有啲球迷已經嬲到走去買返杯啤酒降下火先。 呢個時候 SVS 都成功追返一球到 3:2，大家以為又有返啲希望。 但兩分鐘後史浩克又再入多球… 完場前入埋第五球。 即係我總共搣左自己大髀五次… 要記得千奇唔好慶祝 😀

成個作客看台入面應該得我一個心情靚到爆，雖然降左班落德乙，但可以見到隊波唔洗得個輸字建立返信心出黎都幾好。 希望可以盡快升返上德甲唔好好似漢堡咁年年飲恨。。完場後我地就繼續我地既行程去比利時既 Charleroi 出發～