04.09.2021
德國西南地區聯賽 第 5 週
TSG Hoffenheim II - SV Elversberg
Dietmar-Hopp-Stadion
賽果: 1:2 (0:1)
入場人數: 250 (55 名作客球迷)
門票： 8€ （企位）
更多相片

德國足球其實如常咁開始左，早幾個星期我地去左睇德丙。然後去左莎蘭睇德國盃首圈就無左返過去睇地區聯賽，但其實已經開左季仲已經踢左四場波。 今次黎到算係係附近既 Hoffenheim，我地就去睇作客先。 時隔一年半，球迷們終於可以帶住幾箱啤酒一齊搭巴士去作客。

我地由法蘭克福出發，沿住條長期塞車既公路南下。導行話呢 120 公里要揸大約個半鐘，最後我地要兩個鐘先到達。 落左車仲要爬山上山頂先去到門口。 好在我地預先 print 定哂防疫表格可以好快咁入到場。

一入場就係小食亭， 雖然要爬山， 但佢地有好好食既豬扒。 點知佢同我地講賣哂！！ 聽其實人講佢地只係準備左八塊扒黎燒，大家係咁投訴有無搞錯呀係咪唔想做生意呀迫人食腸？ 咁我地本來諗住係球場食晏所以好肚餓，無選擇下都要㨂腸黎食。

行到上看台見到其他搭球迷巴士黎既球迷，睇落奇奇怪怪咁，原來佢地唔記得左帶打氣物資。 個個都話已經唔記得睇波作客要準備啲乜… 無物資但仲有我地把聲～ 賀芬咸曾經係呢個蚊型球場踢過乙組，所以基本設備都齊全既。 最重要係作客看台都有上蓋，令我地既打氣聲更加響亮。

話說我地早幾場都踢得麻麻，今場佢地睇落都無咩優勢。 踢左廿幾分鐘，無啦啦有個阿叔拎住兩包橙色既野向我地個看台底行過黎，然後大聲「喂！！！」 我地， 心諗拎住兩袋救生衣做乜？ 佢舉起果兩包橙色野大叫「Schwenker!」－ 佢仲莎蘭文講「豬扒！！」 原來果兩袋唔係救生衣而係豬扒，佢仲要用大家既鄉下話黎話我地知佢特登去左拎豬扒黎燒比我地食。

睇睇下波收到公司電話話有啲事，用左三個字去跟又要緊急寫幾個 email 所以 miss 左第一球波。 上半場未完有啲人已經等唔切走左落去買豬扒話驚陣間又賣哂。 半場時我地去買果陣已經賣完一包勁搶手，因為佢地啲扒真係好好食～～

下半場開波無耐主隊靠十二碼追和左，幾分鐘後佢地有個球員兩黃一紅被逐離場，人多蝦人少既我地入多球再次領先。 入左呢球之後我都差啲唔記得我地其實打多一個，完全睇唔到有咩優勢。 80 分鐘左右佢地再多一個球員兩黃一紅，我地多兩個人既情況下都搵唔到空位插下… 點搞呀？？

好在最後三分已袋，完場後球員同領隊走到作客看台前致謝，逐一同欄後球迷擊掌傾計。 放低左武肺 90 分鐘，我地又係時候要戴返口罩離場，落山返屋企。 回程時我地㨂左山路，傾過左好多個好靚個小鎮。 雖然都係兩個鐘車程，但條路好玩好多。