22.08.2021 奧地利足球甲組聯賽 第 5 週 SK Sturm Graz - FK Austria Wien Stadion Liebenau 賽果： 2:2 (0:1) 入場人數： 12.529 （約 500 名作客球迷） 門票： 32€ 更多相片
係奧地利既第三場波，我地去左維也納以南既 Graz. 之前話怕 Rapid 場波改期去星期日，就係因為怕去唔到呢場波。 因為 Graz 係另一個球迷必到既地方。 所以如果由本來可以睇兩場好波，到最後只可以睇一場好波既話一定會好唔憤氣。多得天公造美，我地可以一次過睇哂 Rapid 同 Sturm!
Graz 離維也納大約兩個鐘半火車車桯，中間相隔阿爾卑斯山山脈。 但我地架車唔會穿過隧道，而係沿住身邊咁南下，沿途好多有山有水睇下。以為會好多人趁週末會搭火車去另一個城市day trip， 但我地架火車幾乎無人，好安樂咁坐係大窗旁邊享受下大自然景色。
大約十一點左右到達 Graz，先係市中心行下，搵間地道餐廳食午餐， 以炸芝腿扒 (Cordon Bleu) 同埋 Käsespätzle 作為我地係奧地利既最後一餐正餐。 出發前天氣預告話會天清氣朗， 大太陽下我地走左上山去當地既名勝打卡。 上到山見到遠處有啲黑雲，感覺都好似越黎越濕焗咁，好驚佢會突然間落雨。
Graz 大鐘係當地必到既地方，如果唔想花 15 分鐘行上山，可以選擇搭小火車或者電梯，唔想行落山既仲可以比錢 sir 滑梯落山。 我地咁姑寒就當然用自己對腳行上行落啦。 然後就去搵間 cafe 食今次行程最後一件朱古力蛋糕 Sachertorte. 差唔多諗住走果陣個天竟然開始落毛毛雨！！ 咁我地都廢事再 hea, 拿拿聲搭車去左球場先。
由市中心搭電車要搭 10 分鐘左右，係正球場門口落車。 當時仲有一個鐘先開始，但場外已經超多人，聽到場內都有人係度唱緊歌。 我地先買飛，個姐姐話得返最後一行，我地不嬲都中意坐最後一行緊係 ok 啦，買完飛就去 fan shop 買紀念品，淨係排隊比錢都排左十分鐘。 呢個球場你可以入場時先 show 針卡，或者係場外有人會幫你預先 check 然後比條手帶你戴，咁入場前 show 手帶就 ok。
入場後望下張飛，寫住第一行？唔通呢個球場啲行數係由頂數落去？ …最後原來我地係坐第一行 -_- 睇波同睇主場球迷個 view 其實幾好，但係比個龍門完全擋住左班作客球迷囉… 同埋個天越黎越黑好驚佢落暴雨果陣無得避。 但係今場波好似好賣得，應該唔可以求奇換位。
望住係我地左手邊既主場球迷看台，心花怒放～ 仲有排先開波但已經企滿哂人，大大小小既旗幟隨節奏擺動。然後作客球迷又開始造下勢，主場球迷就即刻開汽水回敬佢地。 無論佢地有無咩特別準備呢個打比戰都好，淨係聽兩邊球迷互鬧對唱都已經好心滿意足。
Austria Wien 既球迷係賽前準備左 choreo，係球員入場時展示紅銀色既旗海，仲放左一枝煙。 然後兩邊就各自出力為自己既城市同球隊打氣！ 主隊球迷當然人多勢眾啦，場波其實好好睇，但出左勁多次 VAR, 入左波啲球迷慶祝完回頭先發現原來等緊球證判決。 係場內既人又完全唔知咩事，唔知球證到底睇緊乜，最後見到球證指明係入球，但又唔知點解係開龍門球，總之睇到一頭霧水。
雖然比 VAR 搞亂左，不過客隊最後都係開齋果個。 作客球迷搶先放煙慶祝。 去到半場我地決定搵個高啲既位，起碼可以望到個作客看台先。 半場時班維也納球迷係看台借旗幟掩蓋自己換衫，一開始就放出代表自己球隊既紫白色煙。 煙都未放完，主隊就成功追和。 不過好快又比客隊再入一球。 雙力係均勢下最後以 2:2 完場。
離場時落大雨，好在門口已經有電車等緊，去返市中心再轉車搭去火車站。 係火車站買麥當勞上車食，天黑哂無風景睇就只好玩下電話或者睇下球場入面影左既相。同時計劃下明天既行程。
返法蘭克福果程我地遇上罷工，本身每兩個鐘有一班火車由維也納直達法蘭克福，全部取消哂。 好在佢地仲有當地火車去慕尼黑（罷工既只係德國火車司機工會），去到慕尼黑仲有每兩個鐘車去法蘭克福。 好好彩我地係大城市去大城市所以仲有車搭。 但我地都有哂最壞打算，睇下機票，巴士，租車之類。
去到第二朝一早就先去左火車站先，睇下邊班可以去到慕尼黑就搭左先，因為 miss 左一班車就可以要等兩個鐘先再有一班，同時我地又唔會佢地而家話會開車姐，點知最尾係咪真係會開？ 最後我地先搭車去 Salzburg，然後再轉車去慕尼黑。 係德國邊境遇正有邊境警察上車逐個查護照，等左差唔多20 分鐘。 三個鐘後我地終於到左慕尼黑。
見到去法蘭克福架火車已經企左係月台，雖然仲有 9 個鐘先開車，我地都即刻衝去個月台企係近車頭既其中一道門度等佢開門… 等到夠鐘佢地唔開門…. 然後廣播話前面卡車壞左，所以請所以人去後面果卡上車… shit! 即刻衝去後面攝上車，好好彩搵到個位（但中途有人訂左位），都唔理啦，唔通企足 4 個鐘咩…
坐低左大約 10 分鐘，佢又開咪話，我地會換左前面架壞車佢，你地想既話可以去返前面等換車。 我地有位坐就廢事再郁啦。 過多五分鐘佢又開咪： 呢架車唔會開架啦，請大家落車去對面月台睇新車 -_- 全車即刻媽聲四起。 落車後我地再走到最前少人啲既地方等上車… 緊張左個半鐘終於可以坐低，架車終於開車，我地可以好好休息一下….
返到法蘭克福仲要搭多一程車先返到屋企，平時每 15 分鐘一班而家得返每個鐘一班。 我地先搵間餐廳食埋飯先返屋企。 過左差唔多 12 個鐘，我地終於返到屋企…..