20.08.2021
奧地利東部地區聯賽 第 4 週
First Vienna FC - FC Mauerwerk
Stadion Hohe Warte
賽果： 2:0 (2:0)
入場人數: 1.208
門票： 12€
更多相片

早前計劃行程時以為可以會去睇 Wiener SC，後來先發現睇錯賽程變左只能去睇 First Vienna。 呢兩隊波因為政治取向明確：大愛左翼，所以佢地去對賽被稱為 Derby of Love. 不過今次只能睇其中一隊，亦都係奧利地歷史最悠久既足球隊。

早一日睇完 Rapid Wien 之後，第二日我地就先去維也納既名聖去打下卡先。 我自己對歐洲建築無咩興趣，好似個個國家都差唔多咁，所以都係係咁 e 影張相留個倩影就算。 去到下午就去左著名既 Cafe Central 度食奧地利美食。

Cafe Central 唔只係百年老店，仲有曾經係唔少歷史名人既聚腳地。 運氣好既話仲會有專人係入面彈琴伴奏，文化氣氛濃郁！今次我地叫左 Kaiserschmarrn 同 Apfelstrudel. Kaiserschmarrn 係類似碎 pancake 咁，好香雞蛋同牛油味，通常配搭布冧醬，係大部份餐廳或者雪山上面都會見到既甜品。 佢叫甜品咋，唔好諗住係飯後食既甜品 （除非你多人share 一齊食），因為佢既份量係同正餐差唔多勁大份。 Apfelstrudel 就係酥皮蘋果卷，通常配雲呢拿醬或者雪糕都得，好好食！！！ 間咖啡店仲有好多好精美既蛋糕，如果胃口大啲我都好想食埋蛋糕～～

食飽繼續係市中心行多幾個鐘，然後就去試下維也納既手工啤酒。 質素就一般般啦，但佢有唔少guest beer 都唔錯。 飲左兩杯又開始肚餓，我地就叫左個 homemade burger 食。 唔小心飲多左一杯，搞到時間預得有啲緊， 最後開波前 5 分鐘成功到達球場。

一入場就見到一片草地山坡，前面有一個鐵通看台，隱約見到啲歷史痕跡。 Stadion Hohe Warte 係 1921 年開幕，最多可以容納 8 萬 5 千人，當時係歐洲最先進既球場。 入場見到既山坡曾經係球場看台，係我地既想像中可以見到呢個球隊曾經有幾宏偉，對比起而家只能容納 7 千 5 百人既規模真係差好遠。。

波飛有分企位同坐位，但場內無保安 check 飛買左坐位先可以入看台，因為球隊話相信球迷會自律喎。 咁我地一心都係諗住去鐵通看台坐下，可以望住球場另一邊既主看台。 主看台最後有一大幅塗鴉寫住 „First Vienna Football Club 1894 – Hohe Warte – Kein Platz für Diskriminierung“ ，大字寫明唔會容納任何歧視行為，所以佢地同 Wiener SC 先打愛之打比既稱。

開波後，主看台角落既球迷就開始最歌打氣，應該有五六十人左右。 佢地唱既唔係係德國聽開既歌，而係香港 style 打氣歌。 香港 style 又即係咩 style? … 英國。 佢地10 首有 9 首都係英文歌， We love First Vienna, we do 果啲。 成個感覺就好似睇緊香港波咁。 唔只氣氛似，連歷史都有相似既地方。 First Vienna FC 係由英國人於 1894 年成立， 香港既港會亦都係由英國人係 1886 年成立成為香港第一間足球球會。

有唔少人坐係鐵通看台後面既山坡，我地都走左上去望下。 上到最高可以望通主看台見到維也納一部份既 Skyline。 望返落球場再想像下球場以前既情況，如果坐滿人會係點呢？ 球隊而家只係踢緊地區聯賽（第三級別），但佢地都曾經風光一時，同 Rapid 一樣贏過德國足總盃，同多次贏過奧地利頂級聯賽。

主隊上半場好快入左兩球波，亦都係全場唯一既兩個入球。 除左入球，唯一可以講下既就係比賽中段有隻狗走左入場圍住個球場跑左一圈。 隻狗好叻咁避開哂所以想捉佢既人，搞到個個睇到拍哂手掌。 後來佢玩到咁上下就自己走左上山。

完場後我地帶住疲倦既身軀搭巴士返去。星期六原本係用黎睇 Rapid 踢聯賽，不過佢改左期去星期日，所以我地有一整日可以慢慢係市內行景點，感受下呢個浪漫城市既氣息～