19.08.2021 歐霸外圍賽附加賽 SK Rapid Wien - FK Zorya Luhansk Weststadion 賽果： 3:0 (1:0) 入場人數： 10,300 （約 20 名作客球迷） 門票：26€ （坐位） 更多相片
上個月去完小島之後，好快又請左假要個 long weekend 想黎一個 city trip。 諗住搭火車或者自己揸車，心水地點係荷蘭或者比利時，但請左假既日子佢地無咩好波睇。睇下睇下就㨂左去維也納，因為可以去四晚睇三場波！
計劃行程果陣諗住星期四出發，星期五六日都有波睇。 後來因為 Rapid 原來有場歐霸要踢，如果佢地要先作客既話就變左本來星期六既聯賽會改去星期日，即係我地除時睇少一場波。 好好彩佢地先主後客，即係我地星期四到維也納食完飯之後就可以即刻去睇波！！
有留意球迷文化既話，Rapid 主場可以話係其中一個朝聖之地。 佢地每場比賽都會準備 Choreo 去為球隊打氣，係每場呀，不論週中定週末，總之你去睇佢地比賽就一定有野睇。 呢種創意同堅持，無其他球迷可以做到。 所以去得維也納就一定要去 Hütteldorf 睇返場波。
星期四一早我地由法蘭克福出發，出發前幾日其實好擔心班火車司機工會會㨂我地要搭火車既日子黎罷工。 所以我地都有 plan B 係如果無火車既話我地搵哂路線揸車遠征奧地利東部。 好好彩，出發時一切如常，可以搭直班車直通維也納！
我地今次㨂左 Airbnb， 上年去愛莎尼亞最後因為武肺要改行程 cancel 本來訂左間屋，佢淨係退 airbnb credit 今年年尾到期。 其實武肺間期我會想住連鎖酒店多啲，起碼知道衛生程度有保證同埋有咩事都可以搵人跟。 好在我地呢間屋都唔算差，又近地鐵站可以勁快去到市中心。
休息左一陣我地就去市中心做遊客先，我地係七個鐘車程入面除左早餐就淨係食左啲零食，所以五點鐘我地已經肚餓要搵地方食飯，黎到維也納當然要食 Wiener Schnitzel，維也納炸牛仔扒! 佢唔係普通炸扒咁簡單，係歐洲如果你要叫一塊炸扒做 Wiener Schnitzel ，就要跟足本地既食譜，用一樣既食材先可以叫佢做維也納扒。奧地利既法例仲規定，如果你就咁叫塊扒做 Wiener Schnitzel 就一定要用牛仔肉，否則一定要寫明係 Wiener Schnitzel vom Schwein （維也納炸豬扒）或者叫做 Schnitzel Wiener Art (維也納風格扒)。 係維也納食炸咩扒都一定唔會㨂錯，我連續食左三日 :-)))) 仲有薯仔菜式都係當地必食，我個人推薦薯仔沙律，間間餐廳都有祕方， 間間都咁好食！！
食飽左就係市中心行多個圈消化下就搭地鐵向 Rapid 既鄉下 Hütteldorf，落車前離遠已經見到球場既射燈。 落車後跟住啲球迷行，唔洗五分鐘就已經去到球場外。 我地先去買飛，要先搵紙仔填個人資料。 奧地利現時既武肺政策係要有 3G 證明先可以入餐廳或者娛樂場所，睇波既話就要實名買飛。 買完飛就去 fanshop 買左條頸巾做紀念品～
今次其實係我第二次睇 Rapid。 第一次係九年前係維拉公園睇佢地作客歐霸外圍賽。 我唔係好記得當年既場內氣氛，淨係記得作客球迷既打氣聲好大聲， 睇返舊相我都係話： 作客球迷好正。
我地㨂左主場球迷既正對面看台，即係另一邊既龍門後面，可以舒舒服服咁欣賞 Rapid 班球迷打氣。 因為咁我地要圍住個球場行一個大圈，經過球場附近既公屋，係呢啲平民地方成立既球隊，佢地既球迷一定唔會差得去邊！！去到球場門口，佢地要睇我地既電子針卡，好認真咁對埋身份證先放我地入場。 係奧地利，只要你過左驗證你有 3G 之後，係場內就唔洗戴口罩，唔似得德國咁明明證明左自己無病都仲要戴口罩。
所以我地入左球場之後就好似突然返左正常既世界咁，可以收埋個口罩又唔洗同人保持距離咁一齊坐。 入場後仲有差唔多成個鐘先開波，但時間過得好快，開波前半個鐘左右球場會停播音樂同廣告，比班球迷有一段屬於自己既時間先為球隊造勢。 年輕既奧地利仔！！！ 我好耐無見過一個人山人海既看台，同之前係德國睇過果幾場波，今場先係真正正常既比賽。
係我地既左邊角落係作客看台，今場無開放因為來自烏克蘭既 Luhansk 無咩作客球迷。 不過係我地個看台聚集左一班來自烏克蘭球迷，間唔中都有一齊拍手唱歌打氣。 Luhansk 都有一段歷史， 佢地曾經贏過前蘇聯聯賽，近年受到烏克蘭戰爭影響搞到要係唔同球場遊走，好似香港球隊咁無一個特定主場。要堅持到而家一啲都唔容易。
Rapid 既歷史相對更加豐富，佢地係贏過 32 次奧地利聯賽冠軍，係贏得最多次聯賽既紀錄保持者，亦曾經贏過兩次德國足總盃，自 1911 年一直在最高級別比賽無降過班。 而 Ultras Rapid 更加係奧地利最老既球迷組織。上面講過佢地每場波都會準備 chroeo 陪球隊去迎戰，佢地仲有一個傳統就係 「 Rapid 時刻」（Rapidviertelstunde）！ 每場波既最後 15 分鐘，全場球迷都會一齊企起身為球隊吶喊。 呢個傳統自 1920 年左右開始，開始既原因有唔同既講法。 有啲人話當年 Rapid 成日係最後 15 分鐘先發到力贏啲重要既比賽，有啲人就話以前會係最後 15 分鐘開放球場大門等無錢買飛入場既人可以入場一齊睇波，所以最後 15 分鐘係氣氛最勁既時間！ 就係咁， 佢地 keep 過近百年既傳統，由第 75 分鐘起就會一齊唱歌打氣～
等到球員入場時，西看台既球迷就打開由其中一個球迷組織 Tornado 準備左既 choreo。 今次係簡簡單單用大布將看台變到屬於球隊既綠白色。 如果唔係歐洲賽，佢地好大機會會放下煙。 奧地利足總半容許球迷放煙，唔似德國足總咁會罰球隊錢，不過如果比人捉到你係球場放煙既話都係會罰球場禁制令。 不過今次既主辦單位係見錢開眼既 UEFA ，班球迷就要忍下手黎個乾乾淨淨既 choreo~
開波大約五分鐘後佢地先收起塊大布然後揮動佢地既旗幟！ 雖然開波前已經見識佢地既既氣勢，但我地而家終於可以同時睇波同睇球迷，感受真正既球場氣氛！啲球迷仲好聽話，佢地準備左啲大字報，每次要展時大字報時， Capo 會大叫「放低啲旗～～～」 然後啲人就會收旗，等啲大字報可以搶 fo 展現係西看台上。 一兩分鐘後，佢又會叫「繼續 fing 旗～～」啲人就會舉高返啲旗黎fing。
Rapid 上半場先入一球，去到下半場可以睇得出客隊好想追返球，可惜力不從心硬係差埋門一句。 主隊係最後 15 分鐘入多兩球，令到 Rapid 時刻既氣氛更加高漲～～ 而我既眼前就即刻發光， 因為對面成個看台都剝哂衫。 哈哈，一細班人半裸成日見，今次真係第一次見肉色既看台。黎緊一段時間我應該會 prefer 奧仔多過德仔^^
完場後我地離開球場門口就有電車可以直達 Airbnb ，漫長既一日好滿足咁完左。 黎緊仲有兩場波等緊我地！一星期後Rapid 作客烏克蘭贏3－2 成功晉身歐霸小組賽，輸家就跌落歐協聯小組賽～