22.05.2021 盧森堡甲組聯賽 第 29 週 FC Wiltz - F91 Dudelange Stadion am Poetz 賽果： 0:0 入場人數： 421 （約 50 名作客球迷） 門票：10€ 更多相片
嘩，已經有超過半年無登入過 wordpress 寫任何野。 上一次離開法蘭克福已經係十月既事，當時去左東德幾日睇左場波，無諗過可以突然爆得咁勁，一 lockdown 就 lockdown 到而家。呢七個月每日都在家工作， weekend 去超市，有時去遠少少買外賣順便散下步，無去過餐廳，無見過朋友，無睇過波。好在我地都習慣呢啲無聊既生活，甚至某程度上有啲享受每日唔洗搭車返工既日子。武肺完結後，呢一世都未必有得再次明正言順咁 hea 住過日子。
就係歐洲大部份聯賽慢慢進入暑假之前，疫情開始有啲好轉，有啲國家已經有限度放寬限聚令。盧森堡就係其中一個放寬足球比賽入場人數至 500 人。 當我地睇到新聞之後，就即刻 send e-mail 去問 FC Wiltz 可唔可以留飛。 最先係話只容許 200 人入場，後來政府又話如果球場可以實行「衛生策略」 (Hygiene concept) 就可以比 500 人入場。
呢個球場得一邊係主看台，有大約 200 個座位。對面係兩級高既企位看台，要做到入場球迷都確保可以保持距離，佢地準備左百幾張膠椅分配係球場兩邊，每張椅子相隔大約 1.5 米距離，係企位看台就卡拉卡拉咁放。場內無飲飲供應，廁所每次只准一人使用。 一切準備就係為左迎接球迷回歸。
未搬去法蘭克福之前，我地已經去哂大部份既盧森堡球場。 佢地大部份球場都位於國家既南部，近首都同埋工業城市。 Wiltz 位於北部近比利時，周圍都係山區同埋附近係無高速公路既。正常時候我地唔會想突登揸幾個鐘車去山區睇場垃圾波。 但而家情況唔同，我地好想遊車河，好想睇波，好想離開法蘭克福，但又唔可以過夜；呢個時候 Wiltz 可以話係最適合既地方。 車程大約 3 個半鐘，盧森堡既商店已經正常營業，連餐廳都可以開放室內，只要有 24 小時內既 negative test 就可以室內用餐。 無 test 就坐室外。
比賽日前幾日，收到球隊回信確定可以預留兩張門票，我地就定好行程。 去到盧森堡要先去當地超市買手信。 德國麵包唔係唔好食，但就算佢地整法式麵包都係無地道既咁軟熟好食。 盧森堡同法國無咩分別，所以佢地既超市必有新鮮正宗法式麵包同甜品。 每次我都要買牛角包同白方包 （德國啲白方包假既！！），仲有幾件蛋糕仔同零食。 買左幾十歐手信，去個廁所就繼續攀山越嶺飛過 n 連髮夾彎，終於去到 Wiltz.
去到場外既停車場已經見到幾個德國車牌，我估今場波應該最少有 10％ 係 Groundhopper… 泊低架車後就先係村內行個圈散下步，趁落雨之前好好享受一個陽光。 呢幾日歐洲打風，一時藍天曬到出汗一時烏雲密布落雹又落雪咁。我地都唔敢太遲入場驚搶唔到有瓦遮頭既位。
球隊準備左一張 list，入場前要先報到先可以比錢入場。 我地係開波前大約 40 分鐘入場，看台下既膠椅已經得返幾張，我地拿拿聲衝過去坐低。 唔怪之得無人坐啦，係後備席後面視線受阻。 好可惜全場真係得返呢幾個位係可以唔洗怕落雨。雖然當時太陽好猛，但天氣預報話未來兩個鐘會落兩場暴雨…. 好在個後備席係透明既，視線都唔係100％ 受阻。
Wiltz 係今季既升班馬，去到季尾已經無野好爭，排第六又唔洗護級。不過聯賽冠軍仲未定落黎，現時榜首係同樣都係升班馬既 Hesperange，同分排第二既就係今日既作客球隊 Dudelange. 賽前主隊已經講明雖然佢地無野好爭，但絕對唔會放水。 心諗，作為一個花生友，你唔放水就當然好，但如果係客隊既球迷既話一定勁爭你。 同西布朗一樣，都降左班啦仲出盡力做咩呀，比利物浦輕鬆贏波唔得既？
好啦，呢場波對 Dudelange 咁重要，應該會好睇啦卦？ 又唔知點解場波踢落完全唔覺得佢地好想搶分咁，波又交唔準，射波都龍都唔中。 踢下踢下第一場雨就到左，所謂既衛生策略就係因為呢場雨就收左皮，啲人即刻拎住張椅入看台避雨，用相隔 1.5 米變到大家一齊排排坐。 最慘係班作客球迷，成個作客區都無上蓋，落雨佢地只可以硬食。 今日有大約 50 個作客球迷跟住球隊北上，有大約幾個阿叔間唔中會唱下歌打氣。雖然唔係年輕德國仔，但好開心可以再聽到一班佬打鼓唱歌！到底幾時先可以再可以感受過萬人既氣氛呀！！！！
講返場波… 其實都無咩好講，要搶分既無組織攻上去，無野好爭既就總之見到邊個有波在腳又衝埋去比壓力佢地，對面甩左波之後，自己又無技術保住控球權，一路 loop。就算死球都係入唔到肉，完全無驚無險咁去到完場。 完場前落左第二場大雨，雨都未落完後面已經出緊太陽。 係正我地前面座山出現左兩條彩虹。
完場後，Dudelange 球員嬲爆爆正接走返入更衣室，班球客球迷連想鼓勵佢地好好踢埋剩返果幾場波都唔得。我地就要趁第三場波到之後上車返屋企。 望下有幾多人今場波打左卡… 結果係有 60 人！！！！ 哈哈哈，大部份係德國人，仲有幾個荷蘭人咁。
回程又要爬山，係山上面又見到幾條彩虹（唔係同一條），仲見到彩虹既盡頭！！！三個幾鐘後，我地就返到法蘭克福。 黎到5 月我地終於去左第一次旅行，睇左第一場波～
下星期我地會去莎蘭睇莎蘭盃決定爭入德國盃首圈（場外睇）…. 再下個星期可能會去捷克睇武肺盃，然後…. 可能又要過返平靜既週末。