17.10.2020
德國東北地區聯賽 第 10 週
VfB Auerbach - BSG Chemie Leipzig
VfB-Stadion Auerbach
賽果：0:2 (0:1)
入場人數： 999 （約 250 名作客球迷）
門票： 10€ （座位）
更多相片

今次行程一改再改，本來諗住去匈牙利，點知當地八月尾武肺又開始爆。諗住改去波蘭，然後成個歐洲都開始狂爆。然後諗住去瑞士，但睇完酒店果啲發現自己完全負擔唔起帶埋架車去瑞士旅行。最後去到出發前幾日先決定去位於東德既 Dresden。

如果有得㨂我地一定會㨂出國，所以借呢個機會去下平時未必有機會 day trip 既國內城市都係一個唔錯既選擇。我一直都好中意呢個充滿歷史既城市，之前去過兩次都係走馬看花，今次可以花啲時間慢慢睇！ 除左 Dresden，我地仲去左邊境城市 Görlitz，同波蘭只係一河之隔。 呢個小鎮未必有人識，佢特別在有幾套荷里活電影都係呢個小鎮取景，當中包括 The Grand Budapest Hotel。

我地係 Dresden 住左三晚，但睇波就要去到 150 公里以外既 Auerbach/Vogtland。呢隊波無咩特別，㨂呢場波主要都係因為客隊！ 我講左好耐想見下年輕既德仔，Chemie Leipzig 既球迷應該唔會令我失望！

德國既疫情呢排都越黎越差，各地政府都開始收緊限制，例如有啲地方已經唔再比球迷入場睇波。 睇數字應該黎緊都唔會好轉，可能隨時我地又唔可以再去睇波。所以大家都會把握機會入場。 Auerbach 限一千人入場，今場波最後售罄有 999 人入場！好在我地特登早啲到買到飛入場！

入場前同其他球場一樣要填個人資料，然後比10€ 買飛。 我地坐係龍門後面，對面係同右邊既看台都係作客看台。 接近開始時間班作客球迷終於入場，場內開咪叫大家記得要保持社交距離，大家要乖乖守規矩先可以有得繼續入場睇波～

Chemie 球迷都好乘度哂手位咁分開企滿左對面龍門後既看台。 聽到佢地百幾人一齊叫口號好感動，好耐無係現場聽德國球迷唱歌打氣啦！Chemie 係一隊經歷過散班再由球迷重組既球隊，所以球迷可以話係球隊既話事人。 支持得呢隊波既球迷入到場都會一齊打氣，我地呢邊都有幾個中年作客球迷，完全無視主場球迷跟住自己人一齊唱歌～

Auerbach 都有一班迷你組織，成場波都有幫球隊打氣。 呢場波一啲都唔悶，但完全唔知佢地係場上做緊咩。好似每眨一下眼個控球權就會去左另一隊波咁，完全無組織同策略可言。呢場波其實應該係 0：0，但一開波客隊就負負碌碌咁入左球波。然後佢地啲球員就賓迪基上身門前兩碼飛機，空門唔入之類。 主場就好似連禁區都入唔到毫無目標咁，所以都明點解果兩個球迷咁激動既。 睇積分榜，Auerbach 現時位於下游；我估佢地場場波都係咁上下水準。完場前客隊入多粒連希望都唔比你～ 作客球迷就開始接力唱歌唱到完場。

完場後我地揸大約個半鐘車返到 Dresden，休息一下就去舊城睇下呢個曾經被二戰摧殘過既城市。同一個週末，鄰國開始收緊針對疫情既政策，包括宣布唔再比球迷入場睇波。係捷克，各地既球迷組織走哂去首都布拉格抗議，最後係警暴收場。都係果個，到底幾時先回復正常。。。