19.09.2020
德國東北地區聯賽 第六週
Berliner AK - FC Carl Zeiss Jena
Poststadion
賽果：1:5 (0:3)
入場人數： 516 （約 200 名作客球迷）
門票：10€
更多相片

上星期係 Saarland 睇完德國盃賽後，本來今個星期係諗住去捷克既，但歐洲多個國家無啦啦近呢兩星期狂爆。最後得返德國最安全，我地㨂左去最唔安全既城市，柏林！

一早請左假就係想去其他地方，總之離開法蘭克福就得。柏林係我最中意既德國城市，雖然唔想住係果度，但做遊客就係去幾多次都唔會覺得悶！ 柏林好大，每個地區都好似自己一個世界咁，個個地區都唔同，有好有壞，好靚有醜，但去到邊都好有生氣咁。

今次去柏林其實主要係同屋企人替補四月未能去香港既行程，黎柏林既目的除左飲飲食食，當然仲要去睇波啦！ 東德城市對疫情好似無咁緊張咁，以足球為例，有幾個城市批准近萬人入場。 柏林每星期都有抗議啲臨時抗疫政策既遊行，話限聚令同限罩令果啲侵犯人權果之類。 去到柏林街上都唔見啲人保持距離，餐廳外面坐到密密麻麻咁。

星期六我地 pit 低家長們自己走去睇柏林體育會迎戰耶拿。 Poststadion 係中央火車站附近，係民居旁邊。去到場外要先填 form 寫個人資料用黎防疫追蹤。去到售票處要比佢地睇身份證， 去到入口要用消毒酒精消毒雙手，再比佢地搜身先入得場。

全國現時其實係禁止開放作客看台同企位看台，不過有近二百名 Jena 球迷都係隨隊上柏林。 佢地無正式既作客區，只係係主看台分開左面一大區比佢地坐。 反正 BAK 本來都無咩球迷入場，賺埋呢二百條友既入場費好過無。現時既限聚制度令到所有球迷組織都講明唔會打氣，只會等到一切回復正常先出山。 呢班作客球迷都係一般既阿叔球迷， 間唔中開心就唱下歌咁。 （幾時先可以再見到年輕德仔！！）

球場內面好靚好懷舊，好中意見到呢啲超大企位看台然後想像企滿哂人既情景。遠望看台圍欄外既樹叢中，隱約見到樹底有好多紅色既欄杆。 即係球場看台本來更加大。 舊看台已經舊到連樹都生到咁高….

除左禁作客球迷之外，好多球場都禁止飲酒，以防球迷飲完酒就唔識守規距。不過我地係柏林呢個自由開放城市～ 禁酒係無可能既！要好好珍惜可以係場內飲酒既時光～～ 雖然柏林有自由，但場內都仲係要保持距離。看台上面每兩個座位都貼左張 A4 紙唔比人坐。邊個一坐係張紙上面就會有保安衝上黎叫你分開坐。 不過我唔明既係，球迷係場內走動要戴口罩，但點解走黎走去賣啤酒既唔洗戴口罩？

BAK 既土耳其文化奇重。球隊係 1907 年成立，去到 2004 年同兩隊柏林土耳其球隊合併之後，土耳其文化越種越深，可以話係柏林既慕尼黑土耳奇力量。球場小食亭賣既係清真雞肉腸同中東牛／羊肉腸 Sucuk。

呢場波既水準唔錯，有攻有守，不過 Jena 把握力好好多，輕鬆以五比一大炒主隊。客隊有前 SVE 球員 Maximilian Oesterhelweg 為隊友傳左勁多靚波。當年佢離隊大家都覺得球隊走寶，佢離隊後去左當時踢丙組既 Lotte，兩年後又重回地區聯賽。 但見到佢仲踢得咁好都好鄧佢開心～～～