13.09.2020
德國足總盃 第一圈
SV Elversberg - FC St. Pauli
Waldstadion an der Kaiserlinde
賽果：4:2 (2:1)
入場人數： 500 + N 
門票：免費，場外爬牆睇／視線受阻
更多相片

因為武肺，世界各地既足球聯賽盃賽賽程都亂哂。幾乎全歐洲既聯賽都要腰斬，而腰斬前企係榜首既球隊就可以升班。不過盃賽無分計就難啲，大部份盃賽都仲算可以順利進行。

2019/20 賽季既莎蘭盃 (Saarlandpokal) 順延到八月尾堆埋一齊一口氣踢哂佢，SVE 入到決賽對死敵 FC Homburg。 近幾年既莎蘭盃決賽都係 SVE 主場上演，今季亦唔例外。係決賽我地鬥足 120 分鐘後要靠互射十二碼分勝負，多得我地最愛既門將 Frank Lehmann 係突然死亡階段守住大門，最後 SVE 以莎蘭盃冠軍身份晉身 2020/21 德國足總盃既第一圈！

呢場決賽之前，足總一早已經抽左籤，我地一早就知對手會係德乙既聖保利。佢地既球迷我地已經見識過，但都仲係好希望可以係主場同佢地較量下。好可惜，一來足總現時禁止作客球迷入場，二來莎蘭足總同市政府決定只開放比 500 人入場。東德果邊開放比近萬人入場囉，同一個國家可以完全有唔同既世界，好羨慕呀！！！

呢 500 張飛球隊仲要同足總同贊助商分，即係最後只有大約一半既門票係比返自己人。 球隊決定只限季票持有人可以買飛，完全係一個合理既決定！警察同球隊溝通話想球迷組織可以入場（容易啲管理），球隊話ok, 叫我地計下有幾多人要飛，然後比張名單佢地。比左名單之後球隊反口話比飛我地。是但囉， 反正我地呢個「森林球場」係場外望到球場既地方多的是。係 C1 看台後面就已經有斜坡可以比我地聚集～

我地星期六就已經去左莎蘭睇場莎蘭聯賽（第六級），今日就同朋友約好兩點半係球場外等霸靚位。天氣超好，心情超靚，自三月聯賽腰斬後我地第一次行上球場。雖然有啲馬後炮，但賽前我真心覺得場波會爆冷，我地會係少數可以係主場贏波晉級既弱隊。

呢個時候入場都未必係一件好事，因為入場要全程戴住口罩！係 30 度高溫太陽當下戴口罩戴足九十分鐘會唔會焗死人？

雖然話就話無作客球迷，但聖保利既職員係看台上面都叫下自己隊波名打下氣。我地當然要即刻回應下話比佢地知呢個係邊個既主場啦。

點知開波六分鐘，客隊好輕鬆禁區橫傳一個唔該射入左第一隊。果幾個聖保利球迷好開心咁慶祝。主場球迷好失望，唔係咁快就話我地知柏林之路咁就完左嘛？

又點知原來呢六分鐘只係班球員仲發緊夢。聖保利入波後，SVE 就開始越踢越有，要組織有組織，要走位有走位，係咁迫到客隊無氣抖。十分鐘後我地成功追和！！！幾乎同聖保利第一球波既組織一樣，佢地做到既我地都做到！再過多十分鐘，我地係禁區邊有個自由球，一斬一射，反超前 2：1！如果把握得好啲或者有運既話，上半場我地絕對可以入多兩三球囉！！

同兩年前對禾夫斯堡相比，當時我地都有控球權，但就係差埋門一腳。今日我地踢出超水準，聖保利似係地區聯賽球隊多啲囉！我地係上半場入左兩場未夠喉，下半場開波三分鐘角球開出頂入！三比一！！但係未完場都唔可以放心住，早一日先有場波係補時階段連入五球。要贏得穩陣就要入多幾球波。

去到六十七分鐘，今場為 SVE 射入第一球既 Schnellbacher 梅開二度，4：1。 如果我地全季可以保持到呢個水準既話，下季應該可以丙組見！呢個時候見到遠處有警察黎緊，大家即刻提水戴口罩。佢地爬上黎話我地可以打氣唱歌做乜都得，唔戴口罩都得，但要保持距離。 佢講到一半，球證吹罰十二碼！ 我地領先5：1 既機會黎啦！！！完全無人理班警察 😀 唔知係咪無壓力定乜，飛機。不過大家都係拍哂手一笑置之。

我地唔只係領先，場上水準都高聖保利一班。當時真係完全唔會覺得自己會倒輸返轉頭。去到近完場時，客隊射入多一粒。睇聖保利班球員既反應好似連佢地自己都唔覺得呢球可以幫球隊翻生咁。去到九十分鐘，主場球迷一路拍手倒數完場。

球證吹雞，jaaaaaa! 十年後，我地終於再次晉級第二圈。 贏多四場波我地就可以去柏林，贏五場波我地就可以踢歐洲賽啦！！！

好想快啲知道第二圈會對邊隊，但唔知做乜唯獨拜仁果場十月中先踢囉。抽籤都要等多個月先會進行。 希望等到第二圈開賽時，球迷可以如常入場。

我地好好彩就算真係閉門作賽（例如莎蘭盃決賽），我地都仲可以爬上斜坡爬上樹度睇波。今日企係斜坡上，唔知點解有種想喊出黎既感覺。 過去三個月我係有去唔同地方睇波，但可以同一班熟悉既人一齊睇波既感覺突然之間變到好難得咁。今日我地可以係場外聚埋一齊，唔知下個星期會唔會又爆第 n 輪然後又黎新既限聚令。 唔只為足球，大家而家最大既希望係可以一切回復正常。